ELONGESO 46
Oityi Wesukisila Okulipakula ku Siovaa, Ombatisalwa?
Okulipakula oityi? Okulikuambela ku Siovaa, omupopila okuti okutuka umwe onthiki oyo, oe vala mofende, apeho molingi tete etyi ekutuma. (Salmo 40:8) Tyina wamelipakula ngotyo, pahe ombatisalwa, opo ovanthu aveho vetyimone okuti welipakula-le ku Siovaa Huku. Okulipakula ku Siovaa, otyipuka otyinene vali omunthu apondola okulinga. Oityi matyikupe ondundo, ohatili owoma, olipakula umwe ku Siovaa?
1. Oityi omunthu elipakulila ku Siovaa?
Onthwe tulipakula ku Siovaa mokonda tumuhole. (1 Suau 4:10, 19) Ombimbiliya yati: “Humba Siovaa Huku yove, muhumba nomutima wove auho, nohande yove aiho, nonondunge mbove ambuho, nononkhono mbove ambuho.” (Maluku 12:30) Naina omunthu wokuhole Siovaa, ketyipopi vala komulungu, mahi novipuka alinga vimoneka umwe okuti umuhole. Ovanthu vevali tyina velihole umwe unene, vetupu owoma wokulinepa. Onthwe no onthwe tutupu owoma wokulipakula ku Siovaa atumbatisalwa. Omokonda yatyi? Omokonda tumuhole.
2. Ine umbatisalwa, oviwa patyi momono?
Okutuka umwe onthiki mombatisalwa, mokala mombunga ya Siovaa. Siovaa Huku mekulingila ovipuka ovinyingi, otyimono umwe okuti ukuhole unene. Oupanga wove na Tate yetu Siovaa, maupame vali. (Tanga Malaquias 3:16-18.) Mokala nombunga onyingi ouye auho, muati umwe omo muna ovakulu vove, nonondenge mbove, nonomphange mbove. Aveho ovanthu ovo, vati umwe ovo vekuhole, ovo vehole unene Siovaa. (Tanga Maluku 10:29, 30.) Mahi tete una ovipuka vimwe una okulinga tyina wehenembatisalwe. Una okunoñgonoka nawa Siovaa, una okumuhumba, una okuyumba onthumbi Momona wae Sesusi. Tyina wamalingi ovipuka ovio, opo pahe upondola okulipakula ku Siovaa, ombatisalwa. Ine ulikuatehila olingi ovipuka ovio, mokakala-ko apeho nehambu. Ombimbiliya Ondaka ya Huku yati: “Ombatisimu . . . tupu pehepano imuyovola.” — 1 Petulu 3:21.
KUHANDE OKUNOÑGONOKA VALI?
Monoñgonoka oityi wesukisila okulipakula ku Siovaa ombatisalwa.
3. Atuho tuna okuholovona olie matufende
Kohale ova Isilayeli vamwe vasokele okuti ankho vapondola okuti, ovo vafenda Siovaa, ovo vafenda ono huku ononkhuavo. Mahi Siovaa watumine omukulu umwe utiwa o Eliya ekevepopile okuti otyipuka otyo ankho veli nokulinga, Siovaa ketyihande. Tangei 1 Reis 18:21, amutomphola epulo eli:
-
Oityi ankho ova Isilayeli vena okulinga?
No onthwe tuna okuholovona ine matufende Siovaa Huku ine kamatumufende. Tangei Luka 16:13, amutomphola omapulo aa:
-
Okuti tyitavela okuti, onthwe tufenda Siovaa, onthwe tufenda vali ovipuka ovikwavo? Oñgeni otesitu tuatanga yetyipopia?
-
Oityi matulingi opo Siovaa etyimone okuti oe umwe vala tuaholovona okufenda?
4. Soka vala otyipuka Siovaa ekuhole
Siovaa wetuavela ovipuka ovinyingi. Pahe oityi matumukondolela tumupandule-vo? Talei OVIDIU.
Ovipuka patyi Siovaa ekulingila, no ove otyimono umwe okuti ukuhole? Tangei Salmo 104:14, 15 na 1 Suau 4:9, 10, amutomphola omapulo aa:
-
Povipuka Siovaa ekulingila, ovipi uhole vali?
-
Tyina usoka kovipuka ovio, umona okuti Siovaa ukahi ñgeni?
Tyina wamapewa otyipuka tyimwe otyiwa, ukala ñgeni? Uhambukwa, omunthu watyo omupandula, ine hatyo? Tangei Deuteronômio 16:17, amutomphola epulo eli:
-
Tyina usoka kovipuka aviho Siovaa ekulingila, tyikupa-vo okulinga-tyi?
5. Okulipakula ku Siovaa tyeeta vala oviwa
Ovanthu vamwe vasoka okuti opo vakale umwe nawa, vena okukala nonombongo, vena okunkhimana. Okuti otyo otyili umwe? Talei OVIDIU, amutomphola omapulo aa:
-
Omukuendye ou tuamona movidiu, ankho tyokusana ombola utyihole unene. Mahi pahe oityi etyiyekela-po?
-
Wayeka-po ombola alingile Siovaa. Ku ove, walinga nawa? Oityi wapopila ngotyo?
Apositolu Paulu etyi ehenekale Omukilisitau, walongesilwe unene, amono ovilinga vimwe ankho vikahi nawa. Mahi etyi ahula umwe vala ku Huku, ovipuka ovio aviho eviyeke-po. Mahi okuti wekelivelele? Tangei Ova Filipu 3:8, amutomphola omapulo aa:
-
Oityi Paulu apopila okuti ovipuka asapo etyi akala Omukilisitau, uvitala ‘ngatyina olisu’?
-
Ovipuka patyi oviwa pahe akala navio?
-
Tyina utala ñgaa, okuti ine ulingila umwe vala Siovaa, mokala nawa? Oityi wapopila ngotyo?
Etyi Paulu akala Omukilisitau, wamona vali oviwa tyipona evi asapo
OVANTHU VAMWE VATI: “Kuesukisile-ale okupopila Siovaa okuti momulingila atee-tee.”
-
Ku ove, oityi omunthu esukisila okulipakula ku Siovaa?
ETYI WELILONGESA
Welilongesa okuti omunthu tyina tyili ehole umwe Siovaa, ulipakula kwe ambatisalwa.
Okupitulula
-
Omokonda yatyi tuesukisila okuhumba unene Siovaa, ngae vala tufenda?
-
Oviwa patyi omunthu akala navio tyina amambatisalwa?
-
Okuti no ove uhanda-vo ñgeno ulipakula ku Siovaa?
KUHANDE OKUOVOLA VALI?
Omukuendye umwe utiwa o Levi ankho uyumba ombola otyo afetwa. Omuhikuena umwe utiwa Susan ankho wiimba afetwe. Oityi veviyekela-po?
Ovakuendye Vapula — Oityi Mandyilingi Momuenyo Wange? — Okuhinangela Evi Viaendelepo (6:54)
Onthele ei ipopia ovipuka vimwe, ine uvisoka umwe nawa mohande okulipakula ku Siovaa.
“Omokonda Yatyi Wesukisila Okulipakula ku Jeova?” (Omutala Womulavi 1 ya Janeiro yo 2010)
Ovidiu ei ilekesa otyipuka ovanthu vahambukwa tyina velipakula ku Siovaa avambatisalwa.
Tanga onthele ei yati: “Ankho Ndyilipula Oityi Tueya Okulinga Kouye,” utale etyi tyakuatesako Rosalind John atale umwe nawa etyi ankho ena okulinga tete.
“Ombimbiliya Ipilulula Omuenyo Wovanthu” (onthele Yomutala Womulavi)
