ƐZUKOALƐDEƐ 46
Duzu Ati A Ɔwɔ Kɛ Ɛyila Ɛ Nwo Zo Na Bɛsɔne Wɔ A?
Ɛyila ɛ nwo zo ɛmaa Gyihova wɔ mekɛ mɔɔ ɛbabɔ ye ɛwɔkɛ wɔ asɔneyɛlɛ nu kɛ ɛbazonle ɔ ngomekye na wɔava ye ɛhulolɛdeɛ wɔalimoa wɔ ɛbɛlabɔlɛ nu la. (Edwɛne 40:8) Nzinlii, akee bɛsɔne wɔ. Saa ɛyɛ zɔ a, ɛmaa menli nwu ye kɛ wɔyila ɛ nwo zo. Kpɔkɛ mɔɔ yɛsi kɛ yɛyila yɛ nwo zo yɛamaa Gyihova la a le kpɔkɛzilɛ mɔɔ hyia kpalɛ mɔɔ ɔwɔ kɛ yɛsi a. Duzu a bahola aha wɔ yeamaa wɔazi kpɔkɛ zɛhae mɔɔ anwo hyia mɔɔ bahola ahakyi wɔ ɛbɛlabɔlɛ la ɛ?
1. Duzu a ka awie maa ɔyila ɔ nwo zo a?
Ɛlɔlɛ a ka yɛ maa yɛyila yɛ nwo zo yɛmaa Gyihova a. (1 Dwɔn 4:10, 19) Baebolo ne tu yɛ folɛ kɛ: ‘Yɛva yɛ ahonle muala nee yɛ ɛkɛla muala nee yɛ adwenle muala nee yɛ anwosesebɛ muala yɛhulo Gyihova yɛ Nyamenle ne.’ (Maake 12:30) Yɛdua mɔɔ yɛka nee mɔɔ yɛyɛ la azo yɛkile kɛ yɛkulo Nyamenle. Kɛ mɔɔ menli nwiɔ mɔɔ kulo bɛ nwo kpalɛ gya la, zɔhane ala a ɛlɔlɛ mɔɔ yɛlɛ yɛmaa Gyihova la ka yɛ maa yɛyila yɛ nwo zo yɛmaa ye na bɛsɔne yɛ a.
2. Nyilalɛ boni mɔ a Gyihova maa ye Alasevolɛ mɔɔ bɛyila bɛ nwo zo la nyia a?
Saa bɛsɔne wɔ a, ɛbaraboka Gyihova abusua ne mɔɔ anyelielɛ wɔ nu la anwo. Akee ɛbanwu ɛlɔlɛ mɔɔ ɔlɛ ɔmaa wɔ la wɔ ndenle dɔɔnwo azo, na ɛbabikye ye kpalɛ wɔadɛla kɛ mɔɔ ɔde ye kɛkala la. (Kenga Malakae 3:16-18.) Gyihova bayɛ ɛ Ze, eza ɛbanyia sunsum nu mediema mrenyia nee mraalɛ wɔ ewiade amuala mɔɔ bɛkulo ye na bɛkulo ɛdawɔ noko la. (Kenga Maake 10:29, 30.) Noko, ɔwɔ kɛ ɛyɛ ninyɛne bie mɔ kolaa na bɛazɔne wɔ. Ɔwɔ kɛ ɛsukoa Gyihova anwo debie, ɛkulo ye na ɛnyia ɔ Ra ne anu diedi. Akee ɔwɔ kɛ ɛyila ɛ nwo zo ɛmaa Gyihova. Saa ɛyɛ ninyɛne ɛhye mɔ na bɛsɔne wɔ a, ɛbahola wɔanyia dahuu ngoane. Nyamenle Edwɛkɛ ne ka kɛ: “Ɛzɔnenlɛ . . . noko ɛlɛdie bɛ ngoane kɛkala.”—1 Pita 3:21.
SUKOA DƆƆNWO
Sukoa deɛmɔti ɔhyia kɛ ɛyila ɛ nwo zo ɛmaa Gyihova na bɛsɔne wɔ la anwo debie.
3. Ɔwɔ kɛ yɛ muala yɛkpa awie mɔɔ yɛbazonle ye la
Wɔ tete Yizilayɛ, menli bie mɔ nyianle adwenle kɛ bɛbahola bɛazonle Gyihova nee adalɛ nyamenle Beeyale. Noko Gyihova zoanle ye ngapezonli Yilaegya ɔmaanle ɔdenrɛle adwenle ɛtane ɛhye mɔɔ bɛnyianle la. Kenga 1 Arelemgbunli 18:21, na akee bɛzuzu kpuya ɛhye anwo:
-
Kpɔkɛ boni a ɛnee ɔwɔ kɛ Yizilayɛma si a?
Ɔwɔ kɛ yɛdayɛ noko yɛkpa awie mɔɔ yɛbazonle ye la, kɛ mɔɔ Yizilayɛma yɛle la. Kenga Luku 16:13, na akee bɛzuzu kpuya ɛhye mɔ anwo:
-
Duzu ati a yɛnrɛhola yɛnrɛzonle Gyihova nee awie anzɛɛ debie gyɛne a?
-
Kɛ ɔkɛyɛ na yɛamaa Gyihova anwu kɛ yɛzi kpɔkɛ kɛ yɛbazonle ye ɛ?
4. Dwenledwenle kɛzi Gyihova kulo wɔ la anwo
Gyihova ɛmaa yɛ ahyɛlɛdeɛ dɔɔnwo mɔɔ sonle bolɛ a. Duzu a yɛbahola yɛava yɛamaa ye a? Ye VIDIO ne.
Ninyɛne mɔɔ Gyihova ɛyɛ mɔɔ kile kɛ ɔkulo wɔ la bie mɔ a le boni? Kenga Edwɛne 104:14, 15 yɛɛ 1 Dwɔn 4:9, 10, na akee bɛzuzu kpuya ɛhye mɔ anwo:
-
Ahyɛlɛdeɛ mɔɔ Gyihova ɛva ɛmaa yɛ la boni mɔ a ɛ nye die nwo kpalɛ a?
-
Duzu a ahyɛlɛdeɛ zɔhane mɔ maa ɛnwu ye wɔ ɔ nwo a?
Saa awie kyɛ yɛ debie mɔɔ yɛ nye die nwo kpalɛ la a, yɛkile nwolɛ anyezɔlɛ yɛmaa ɔnwu ye. Kenga Ditilɔnomi 16:17, na akee bɛzuzu kpuya ɛhye anwo:
-
Saa ɛnea debie biala mɔɔ Gyihova ɛyɛ ɛmaa wɔ la a, duzu ɛkulo kɛ ɛfa ɛmaa ye a?
5. Ɛyila ɛ nwo zo a ɛbanyia nyilalɛ dɔɔnwo
Menli dɔɔnwo die di kɛ dumalielɛ, gyima kpalɛ anzɛɛ ezukoa bamaa bɛ nye alie. Asoo ɛhye le nɔhalɛ? Ye VIDIO ne, na akee bɛzuzu kpuya ɛhye mɔ anwo.
-
Ɛnee nrenyia ne mɔɔ wɔ vidio ne anu la kulo bɔlo ɛbɔlɛ ɛdeɛ, noko duzu ati a ɔgyakyile a?
-
Ɔzile kpɔkɛ kɛ ɔbayila ɔ nwo zo yeamaa Gyihova, na tɛ bɔlo ɛbɔlɛ ɔ. Ɛnea a ɔzile kpɔkɛ kpalɛ ɔ? Kɛmɔti ɛ?
Kolaa na ɛzoanvolɛ Pɔɔlo arayɛ Kilisienenli la, ɛnee gyima kpalɛ bie gyi ɔ nye zo. Ɔzukoale Dwuuma mɛla ɔvile kilehilevolɛ bie mɔɔ ɛlie duma la ɛkɛ. Noko ɔgyakyile ɛhye ɔziele ɛkɛ amaa yeayɛ Kilisienenli. Asoo Pɔɔlo nlunle ɔ nwo? Kenga Felepaema 3:8, na akee bɛzuzu kpuya ɛhye mɔ anwo:
-
Duzu ati a Pɔɔlo hanle kɛ ɔbu ninyɛne mɔɔ ɔyɛle kolaa na yeayɛ Kilisienenli la kɛ “ewula dɔɔnwo” anzɛɛ bɔla ɛ?
-
Duzu a ɔnyianle ɔziele ɔ bo zo a?
-
Saa ɛfa Gyihova ɛzonlenlɛ ɛtoto debie gyɛne biala anwo a, boni a ɛnea a ɔbamaa wɔ ɛbɛlabɔlɛ awie wɔ boɛ a?
Mɔɔ Pɔɔlo rayɛle Kilisienenli la, ɔnyianle dɔɔnwo ɔdɛlale mɔɔ ɔvale ɔbɔle afɔle la
BIE MƆ KA KƐ: “Nrɛlɛbɛ ɛnle nu kɛ ɛbayila ɛ nwo zo wɔamaa Nyamenle.”
-
Duzu ati a ɛnea a nrɛlɛbɛ wɔ nu kɛ ɛbayila ɛ nwo zo wɔamaa Gyihova a?
EDWƐKƐ TITILI
Ɛlɔlɛ a ka yɛ maa yɛyila yɛ nwo zo yɛmaa Gyihova na bɛsɔne yɛ a.
Ndinu
-
Duzu ati a ɔfɛta kɛ yɛfi yɛ ahonle muala anu yɛkulo Gyihova na yɛsonle ye a?
-
Kɛzi Gyihova yila ye Alasevolɛ mɔɔ bɛzɔne bɛ la ɛ?
-
Ɛkulo kɛ ɛyila ɛ nwo zo ɛmaa Gyihova ɔ?
KPONDƐ DƆƆNWO
Nea deɛmɔti awie mɔɔ to edwɛne nee awie mɔɔ bɔ bɔlo la zile kpɔkɛ kɛ bɛbayila bɛ nwo zo bɛamaa Gyihova la.
Mgbavolɛ Nee Mbɛlɛra Biza Kɛ—Duzu A Mebava Me Ngoane Meayɛ A?—Dɛba Ne (6:54)
Nea debie bieko mɔɔ ɔti ɔwɔ kɛ ɛyila ɛ nwo zo la.
“Duzu Ati A Ɔwɔ Kɛ Ɛyila Ɛ Nwo Zo Ɛmaa Gyihova A?” (Ɛzinzalɛ Arane, January 15, 2010)
Wɔ edwɛne ɛhye mɔɔ bɛyɛ ye vidio la anu, nea kɛzi menli mɔɔ yila bɛ nwo zo maa Gyihova la anye die la.
Wɔ anwubielɛ ne mɔɔ se “Wɔ Ɛvolɛ Dɔɔnwo Anu Membizale Me Nwo Kɛ, ‘Duzu Ati A Bɛbɔle Yɛ A?’” la anu, nea mɔɔ boale raalɛ bie ɔmaanle ɔzuzule ninyɛne mɔɔ anwo hyia ye kpalɛ anwo la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
