46 NUENƆ
Ena Anua O Kiīloo Nɛ Sa Liamaā A?
O kiī oloo nɛ Jɛhova tɛ̄maloo eyira yii ye nɛ bu kara kɔ o taāŋaebah aba alɛ, sa su dodoo nu a gbī nua tuatua bu o dum. (Le-yɔɔ 40:8) Lɛɛ o liamaā sɛ̄. Sɔ̄ o doo wo, o tɔgɛ pya dɔɔ̄na kɔ o ebee kiīe o dum nɛ Jɛhova. Biaɛfii lo ekiī i dum nɛ Jɛhova na biaɛfii a kuī eera bu dum a. Ena a a dap zū kɔ o doo gbɛnɛ biaɛfii a wee nyaana dum nɛɛ ama ani?
1. Ena a zū nɛɛ kɔ a kiīloo ye nɛ Bari a?
Nu a i zū kɔ i kiīloo i nɛ Jɛhova na wereloo. (1 Jɔn 4:10, 19) Baibol yere i mɛm loo kɔ: “Wereloo Nɛɛ-a-i-ɛrɛ o Bari aā bu dɛ̄dɛɛ̄ o beenyiɛ, le bu dɛ̄dɛɛ̄ o piogi, le bu dɛ̄dɛɛ̄ o ekɛɛrɛ, le bu dɛ̄dɛɛ̄ o ekpo.” (Maak 12:30) I tɔgɛ kɔ i wereeloo Bari bu i ekɔa ue le dogo. Dookɛ̄ baɛ nɛɛ a wereloo ziī wee iya ziī doo, kɛ̄ wereloo i ɛrɛ loo Jɛhova i zūnage kɔ i kiīloo i ye nɛ sa liamaā doolo.
2. Pya amunu leelee na Jɛhova nɛ pya ye Ekeebee ba eliamaā a?
Sɔ̄ o liamaā, o lu ziī yɛɛ pya butɔ Jɛhova ba le bu ɛɛbu tɛɛ̄ ɛŋɛnɛ nyɔuwe. O muɛnage kɛ̄ etɔgɛ a ye wereloo bu gbɛnɛ-edo sīdee doo, sa o sikɛ̄ ye tɔɔ̄ waɛloo ee kɛ̄ o doo a nyaawo. (Buū Malaki 3:16-18.) Gbaāloo ɛ’ɛrɛ Jɛhova nua o Tɛ, o ɛrɛnage pya gā wuga nɛɛdam le nɛɛwa bu yira tɛɛ̄ ɛŋɛnɛ nyɔuwe ba wereloo Bari sa weenɛgeloo olo. (Buū Maak 10:29, 30.) Bu kaka, ɛrɛ pio nu o ɛrɛge edoo lɛɛ o gae liamaā. Lu ebɛɛ̄ kɔ o nɔ nu akiiloo Jɛhova, ye wereloo, sa ɛrɛ yira bu ye Nwiīnɛɛdam. Kpɛdumɛ nu o doo na ekiīloo nɛ Jɛhova bu kara. Sɔ̄ o edoora pya nu ama sa liamaā, na dee ekpaā a nɛ lo e’ɛrɛ dum a naatah a. Muɛ̄ Ue Bari kɔ: “Baptism . . . Kpɔā i a nyaawo.”—1 Pita 3:21.
NƆ YERELOO
Ɛp nu anua alu ebɛɛ̄ kɔ o kiīloo nɛ Jɛhova sa liamaā.
3. Ziī ziī ii ɛrɛ esagɛ nɛɛ i taāŋabah
Bu Izrɛl a dee kere a, pio nɛɛ bee kɛɛrɛ kɔ ba dabe taāŋabah Jɛhova le ekwɔ bari a kura Beel. Mɛ Jɛhova bee yere ye nɛɛ mɔmanudɛɛ̄ a kura Elaija kɔ a lere wa ekwɔ ekɛɛrɛ ama. Buū 1 Pya Mɛnɛ-Buɛ̄ 18:21, lɛɛ o agara ebip ama:
-
Amunu biaɛfii na pya Izrɛl bee ɛrɛ edoo a?
Doodoo pya Izrɛl, ili ɛrɛnage esagɛ nɛɛ i taāŋabah. Buū Luk 16:13, lɛɛ o agara pya ebip ama:
-
Ena anua ii le edap taāŋabah dɔɔ̄na nɛɛ, ale dɔɔ̄na nu gbaāloo Jɛhova a?
-
Mɛ sīdee na i tɔgɛ Jɛhova kɔ i sagɛe lo etaāŋa ye bah ani?
4. Ɛrɛ ekɛɛrɛ nyɔɔ wereloo Jɛhova a ɛrɛ loo
Jɛhova enɛa i gbɛnɛ-edo dɔɔ̄nu a si gbɛnɛ du. Ena ili dap ye nɛ a? Bira lo VIDIO.
Pya amunu sīdee na Jɛhova etɔgɛ kɔ a weree a loo ani? Buū Le-yɔɔ 104:14, 15 le 1 Jɔn 4:9, 10, lɛɛ o agara pya ebip ama:
-
Amunu dɔɔ̄nu Jɛhova nɛ na a a nia kaāna a?
-
Ena pya dɔɔ̄nu ama doo kɔ o kɛɛrɛ ye kumaloo a?
Sɔ̄ ziī nɛɛ dɔɔ̄ ziī nu a wee i nia i nɛ, i wee gbī edoo yaa nɛɛ a bee i nɛ lo dɔɔ̄nu. Buū Deuteronomi 16:17, lɛɛ o agara ebip ama:
-
Sɔ̄ o muɛ dɛ̄dɛɛ̄ pya nu Jɛhova edora a nɛ, ena a a zū kɔ o doo ye nɛ a?
5. Kiīloo nɛ nua gbɛnɛ-edo leelee
Gbɛnɛ-edo nɛɛ yiga kɔ siābee le tam esi, ale kpugi na edoo kɔ ba a ɛrɛe ɛɛbu a. Luge kaka doo wo ni? Bira lo VIDIO, lɛɛ o agara pya ebip a nyɔɔnɛ ama.
-
Kere nɛɛ a wee teera tee a le bu vidio ama bee wereloo bira ekɔ, Ena anua a bee lɛɛbaloo ebira a?
-
A naa bee biaɛfii lo ekiīloo nɛ ekɔ, mɛ Jɛhova. O kɛɛrɛge kɔ biaɛfii a bee doo ama lee ni? Ena anua a?
Lɛɛ nɛɛ lɛɛratam Pɔɔl gae lu Nɛɛ Kraist, a gaa bee si tam a bee doo kɔ a siābee. A bee nɔ lok pya Juu aābah ziī gbɛnɛ nɛɛ tɔgɛnu. Mɛ a bee lɛɛbahloo pya nu ama bie dumɛ lokwa alu Nɛɛ Kraist. Pɔɔl bee ɛrɛge ekiɛ̄nu ni? Buū Pya Filipai 3:8, lɛɛ o agara pya ebip ama:
-
Ena anua Pɔɔl bee kɔ a ɛbe pya nu a bee dooe lɛɛ a gae lu Nɛɛ Kraist nua “ekpaɛkɛ̄,” ale kpo ekpaɛkɛ̄ a?
-
Amunu biī na a bee ɛrɛ a?
-
Bu mɛ sīdee na o dap su taāŋabah Jɛhova dooreloo pya dɔɔ̄na nu o dap su o dum daā a?
Sɔ̄ Pɔɔl bee lu Nɛɛ Kraist, a bee ɛrɛ nu a eenyɔɔ pya nu a bee lɛɛbahloo
PIO NƐƐ KƆ: “Suānu naale bu su dɛ̄dɛɛ̄ i dum siātam nɛ Bari.”
-
Ena anua o kɛɛrɛ kɔ suānu le bu kiīloo nɛ Jɛhova a?
TƐƐ̄NYƆƆ
Wereloo zū i kɔ i kiīloo nɛ Jɛhova sa liamaā.
Ebip Tɛ̄ma Nyɔɔ
-
Ena anua a bɔloo kɔ i wereloo aba Jɛhova sa ye taāŋabah aābu dɛ̄dɛɛ̄ i beenyiɛ a?
-
Mɛ sīdee na Jɛhova wee nɛ leelee pya ye Ekeebee ba eliamaā a?
-
Eniage a ekiīloo nɛ Jɛhova ni?
GBĪTƐ̄ NU
Muɛ nu anua ziī nɛɛ a wee uɛ yɔɔ le nɛɛ a wee bira ekɔ bee biaɛfii lo ekiīloo nɛ Jɛhova.
Pya Zege Bip—Ena M Su Na Dum Daā Ani?—Kɛɛrɛbu Loo Nu Ebee Sira (6:54)
Naa kɛɛrɛ pya dɔɔ̄na nu anua alu ebɛɛ̄ lo ekiīloo nɛ Jɛhova.
“Ena Anua Alu Ebɛɛ̄ Kɔ O Kiīloo Nɛ Jɛhova A?” (The Watchtower, January 15, 2010)
Bu vidio ama, muɛ ɛɛbu pya a kiī wa loo nɛ Jɛhova ɛrɛ.
Bu eloh a kura “Bu Gbɛnɛ-edo Zua M Bee Kɛɛrɛ Kɔ ‘Ena Anua I Le Akɛāma A?’” yere nukuādɛɛ̄ loo nu a bee zū ziī wa kɔ a sikɛ̄ ɛp nu a seeasī.
