LÈS 46
Dikon Ta Bon pa Bo Dediká Bo Mes na Yehova i Batisá?
Bo ta dediká bo mes na Yehova ora bo hasi orashon na dje i primintié ku lo bo sirbi e so i pone su boluntat na promé lugá den bo bida. (Salmo 40:8) Despues, bo por batisá. Ora bo batisá, bo ta mustra otro hende ku bo a dediká bo mes na Yehova. Dedikashon na Yehova ta e desishon di mas importante ku lo bo tuma den bo bida. E ta asina importante ku lo e kambia bo bida. Pero kiko por motivá bo pa tuma e desishon akí?
1. Kiko ta motivá un hende pa dediká su mes na Yehova?
Amor pa Yehova ta motivá nos pa dediká nos mes na dje. (1 Huan 4:10, 19) Beibel ta bisa nos: “Stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Marko 12:30) Nos ta demostrá ku nos ta stima Dios no solamente ku loke nos ta bisa pero tambe ku loke nos ta hasi. Ora un pareha ta stima otro di bèrdat, nan ta kasa ku otro. Di mes manera, nos amor pa Yehova ta motivá nos pa dediká nos mes na dje i batisá.
2. Ki bendishon Yehova ta duna su sirbidónan ku ta batisá?
Ora bo batisá, bo ta bira parti di Yehova su famia, un famia ku ta masha felis. Komo parti di Yehova su famia, lo bo sinti su amor den vários manera i lo bo hala mas i mas serka dje. (Lesa Malakías 3:16-18.) Fuera di tin Yehova komo bo Tata, lo bo forma parti di un hermandat mundial ku ta stima Yehova i ku ta stima bo. (Lesa Marko 10:29, 30.) Pero, tin algun kos ku bo tin ku hasi promé ku bo por batisá. Bo mester siña konosé Yehova, siña stim’é i pone fe den su Yu. Despues, bo mester dediká bo bida na Yehova. Ora bo hasi e kosnan ei i batisá, lo bo por disfrutá di bida pa semper. E Palabra di Dios ta bisa: ‘Boutismo ta loke ta salba boso tambe awor.’—1 Pedro 3:21.
KIKO MAS NOS POR SIÑA?
Laga nos wak dikon ta importante pa bo dediká bo mes na Yehova i batisá.
3. Nos tur mester disidí ken nos ta sirbi
Den Israel di antigwedat, tabatin hende ku a pensa ku nan por a sirbi tantu Yehova komo e dios falsu Baal. Pero Yehova a manda un profeta di dje ku tabata yama Elías pa korigí e idea robes ku e hendenan ei tabatin. Lesa 1 Reinan 18:21. Despues, analisá e siguiente pregunta:
-
Ki desishon e israelitanan mester a tuma?
Meskos ku e israelitanan, nos tambe mester skohe ken nos lo sirbi. Lesa Lukas 16:13. Despues, analisá e siguiente preguntanan:
-
Dikon nos no por adorá Yehova i na mes momento adorá un otro persona òf un otro kos?
-
Kon nos por mustra Yehova ku nos ta skohe pa sirbié?
4. Pensa riba e amor ku Yehova tin pa bo
Yehova a duna nos hopi regalo presioso. Awor kiko nos por duna Yehova? Pasa e VIDIO.
Kon ta algun manera ku Yehova a mustra su amor na bo? Lesa Salmo 104:14, 15 i 1 Huan 4:9, 10. Despues, analisá e siguiente preguntanan:
-
Kua di e regalonan ku Yehova a duna nos bo ta apresiá mas?
-
Ora bo pensa riba e regalonan ei, kiko bo ta sinti pa Yehova?
Ora nos haña un regalo ku nos ta gusta mashá, nos ke mustra apresio na e persona ku a duna nos e regalo ei. Lesa Deuteronomio 16:17. Despues, analisá e siguiente pregunta:
-
Ora bo pensa riba tur e kosnan ku Yehova a hasi pa bo, kiko esei ta motivá bo pa dun’é?
5. Ora bo dediká bo mes na Yehova, bo ta haña hopi bendishon
Hopi hende ta pensa ku fama, bon karera òf plaka lo hasi nan felis. Pero, esei ta bèrdat? Pasa e VIDIO. Despues, analisá e siguiente preguntanan:
-
Aunke e deportista den e vidio tabata gusta hunga futbòl, dikon el a skohe pa laga e karera ei?
-
El a skohe pa dediká su bida na Yehova, i no na futbòl. Bo ta haña ku el a tuma e desishon korekto? Dikon sí, òf dikon nò?
Promé ku Apòstel Pablo a bira kristian, e tabatin un bon karera. El a studia lei hudiu serka un maestro bon konosí. Sinembargo, el a laga tur esei pa e bira un kristian. E desishon ei a duel Pablo? Lesa Filipensenan 3:8. Despues, analisá e siguiente preguntanan:
-
Dikon Pablo a bisa ku e kosnan ku e tabata hasi promé ku el a bira kristian tabata manera “kos di benta afó”?
-
Kiko el a haña na lugá di e kosnan ku el a laga atras?
-
Bo ta kere ku bo bida lo bira mihó si bo skohe pa sirbi Yehova? Dikon sí, òf dikon nò?
Ora Pablo a bira kristian, el a haña muchu mas tantu kos ku el a laga atras
LOKE HENDE SA BISA: “Mi sa ku esaki ta e bèrdat, pero mi no ta kla pa batisá ainda.”
-
Bo ta pensa ku ta bon pa dediká bo bida na Yehova? Dikon bo ta pensa esei?
RESÚMEN
Amor ta motivá nos pa dediká nos bida na Yehova i batisá.
Repaso
-
Dikon Yehova meresé pa nos stim’é ku henter nos kurason i sirbi e so?
-
Ki bendishon Yehova ta duna su sirbidónan ku ta batisá?
-
Lo bo ke dediká bo bida na Yehova?
MAS INFORMASHON INTERESANTE
Wak kiko a motivá un músiko i un deportista pa dediká nan mes na Yehova.
Hóbennan Sa Puntra—Kiko Lo Mi Hasi ku Mi Bida?—Ora Mi Wak Bèk (6:52)
Wak ki motibu mas tin pa dediká bo bida na Yehova.
“Pakiko Dediká Bo Mes na Yehova?” (E Toren di Vigilansia di 1 di yanüari 2010)
Den e vidio musikal akí, wak kuantu goso hende ku dediká nan mes na Yehova tin.
Lesa e artíkulo “Pa Hopi Aña Mi Tabata Puntra Mi Mes Dikon Nos Ta na Bida” i wak kiko a motivá un señora pa pensa riba loke ta mas importante p’e den bida.
“Beibel Ta Kambia Bida di Hende” (E Toren di Vigilansia di 1 di novèmber 2012, na spañó)
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
