IREN MEHN KASUKUHL 46
Dahme Kahrehda Ke Anahne Inoukihong Koht Omw Mour oh Papidaisla?
Ke kin inoukihong Siohwa omw mour nan kapakap me ke pahn kaudokiong ih kelehpw oh mwohneki wia kupwure nan omw mour. (Melkahka 40:8) Mwurin mwo ke kin papidaisla. Ni omw wia met, ke kin kasalehiong meteikan me ke inoukihongehr Siohwa omw mour. En inoukihong Siohwa atail mour iei pilipil me keieu kesempwal me kitail kak wiahda. Met pahn wekidala atail mour. Dahme kak kamwakid uhk en wiahda pilipil kesempwal wet?
1. Dahme kin kamwakid emen en inoukihong Koht eh mour?
Limpoak kin kamwakid kitail en inoukihong Siohwa atail mour. (1 Sohn 4:10, 19) Paipel kin kangoangehkin kitail: “Poakohng Siohwa omw Koht ni omw mohngiong unsek oh omw mour unsek oh omw lamalam unsek oh omw kehl unsek.” (Mark 12:30) Kitail kin kasalehda me kitail poakohng Koht kaidehn sang dahme kitail kin ndahte ahpw dahme kitail pil kin wia. Duwehte meh riemen ar kin uhdahn poakohngala emenemen oh pwopwoudla, atail limpoak ong Siohwa pahn kamwakid kitail en inoukihong ih atail mour oh papidaisla.
2. Kapai dah kan me Siohwa kin ketikihong Sounkadehde kan me papidaislahr?
Ni omw papidaisla, ke pahn wiahla kisehn sapwellimen Siohwa peneinei peren ehu. Ke pahn pehm sapwellime limpoak ni ahl tohto, oh ke pahn karanihala ih laudsang ahnsou wet. (Wadek Malakai 3:16-18.) Patehng omw pahn wiahkihla Siohwa Semomw, e pahn mie riomw Kristian kan nan sampah pwon me kin poakohng ih oh poakohng uhk. (Wadek Mark 10:29, 30.) Ahpw mie soahng kei ke pahn anahne wia mwohn omw papidaisla. Ke anahne esehla Siohwa, poakohng ih oh pwosonla sapwellime Ohlo. Mwuri, ke anahne inoukihong Siohwa omw mour. Ma ke wia soahng pwukat oh papidaisla, ke pahn kakehr mi pohn elen pereperenki mour kohkohlahte. Mahsen en Koht mahsanih: “Papidais . . . pil kin komourkumwailla ahnsou wet.”—1 Piter 3:21.
KALAUDEHLA OMW ESE MET
Tehk dahme kahrehda e kesempwal ken inoukihong Siohwa omw mour oh papidaisla.
3. Kitail koaros anahne pilada ihs me kitail pahn papah
Mahso, nan Israel, ekei aramas kin medewe me re kak kaudokiong Siohwa oh pil koht likamw Paal. Ahpw Siohwa ketin poaronehla sapwellime soukohp Elaisa en kapwungala madamadau sapwung wet. Wadek 1 Nanmwarki 18:21, oh mwuri koasoiapene peidek wet:
-
Dahme mehn Israel kan anahne pilada?
Duwehte mehn Israel ko, kitail pil anahne pilada ihs me kitail pahn papah. Wadek Luk 16:13, oh mwuri koasoiapene peidek pwukat:
-
Dahme kahrehda kitail sohte kak kaudokiong Siohwa oh pil emen de mehkot tohrohr?
-
Ia duwen atail kak kasalehiong Siohwa me ih me kitail pilada en kaudokiong?
4. Medemedewe sapwellimen Siohwa limpoak ong uhk
Siohwa ketikihong kitail kisakis kaselel tohto. Dahme kitail kak patohwanohng ih? Kilang KISIN KASDO.
Ia duwen Siohwa eh ketin kasalehda me e poakohng uhk? Wadek Melkahka 104:14, 15 oh 1 Sohn 4:9, 10, oh mwuri koasoiapene peidek pwukat:
-
Kisakis dah kan me ke uhdahn kalahnganki sang rehn Siohwa?
-
Ia omw pepehm ong ih ni omw medewehla kisakis pwukat?
Ni atail kin alehdi kisakis ehu me kitail uhdahn perenki, kitail kin men kasalehiong aramas me kisikise kitailo atail kalahngan. Wadek Deuderonomi 16:16b, 17, oh mwuri koasoiapene peidek wet:
-
Ni omw medewehla mehkoaros me Siohwa ketin wiadahr ong uhk, dahme ke men patohwanohng ih?
5. Inoukihong Siohwa omw mour kin wahdo kapai tohto
Aramas tohto kamehlele me irail pahn nsenamwahu ma re ndandla, ahneki doadoahk mwahu de naineki diren mwohni. Met mehlel? Kilang KISIN KASDO, oh mwuri koasoiapene peidek pwukat.
-
Mendahki sounsensu me mi nan kasdou kin perenki soccer, dahme kahrehda e uhdi?
-
E pilada en inoukihong Siohwa eh mour a kaidehn soccer. Ke medewe me e wiahda pilipil pwung? Dahme kahrehda?
Mwohn wahnpoaron Pohl eh wiahla Kristian men, e kin nantihong alehdi doadoahk mwahu ehu. E kin sukuhlki kosonned en mehn Suhs kan rehn sounpadahk ndand men. Ahpw e pwilikihdi met pwe en wiahla Kristian men. Pohl koluhkihla met? Wadek Pilipai 3:8, oh mwuri koasoiapene peidek pwukat:
-
Dahme kahrehda Pohl nda me soahng kan me e kin wia mwohn eh wiahla Kristian men wia “mehn lekdekla kei,” de kihd?
-
Dahme e alehda?
-
Ia omw madamadau, dahme pahn kihong uhk mour nsenamwahu, papah Siohwa de wia soahng teikan?
Ni Pohl eh wiahla Kristian men, e alehdi mehkot me mwahu sang dahme e pwilikihdi
EKEI ARAMAS KIN NDA: “Ke sohte anahne poadidiong Koht. Pereperenkihte mour.”
-
Ia omw madamadau, dahme kahrehda e mwahu ken inoukihong Siohwa omw mour?
DAHME KE SUKUHLKIER
Limpoak kin kamwakid kitail en inoukihong Siohwa atail mour oh papidaisla.
Kousapahl
-
Dahme kahrehda e konehng kitail en poakohng Siohwa ni mohngiong unsek oh kaudokiong ih?
-
Kapai dah kan me Sounkadehde kan me papidaislahr kin alehdihsang rehn Siohwa?
-
Ke men inoukihong Siohwa omw mour?
PIL TEHK
Kilang dahme kahrehda sounkoul men oh sounsensu men pilada ira en inoukihong Siohwa ara mour.
Young People Ask—What Will I Do With My Life?—Looking Back (6:54)
Tehk kahrepe teikan me ke anahne inoukihong Siohwa omw mour.
“Dahme Kahrehda Ken Inoukihong Siohwa Omw Mour?” (Kahn Iroir, January 1, 2010)
Kilang peren me irail kan me inoukihong Siohwa ar mour ahneki.
Kilang dahme kamwakid lih emen en medewe dahme keieu kesempwal ong ih nan oaralap “For Years I Wondered, ‘Why Are We Here?’”
“The Bible Changes Lives” (The Watchtower, November 1, 2012)
