LESON 46

Poukosa of out vi Bondieu é fé batiz aou ?

ÉKOUT AN

Of out vi Jéova, sé promèt ali dan in priyèr ke ou va ador rienk ali touseul é ke ou va mèt son volonté an premié (Psom 40:8). Aprésa, nou fé batiz anou pou fémont devan tout domoun ke nou la of nout vi Bondieu. Of out vi Jéova, sé le désizion le plus inportan. Kosa i pe pous aou pou pran désizion la ?

1. Kosa i pous in moun of son vi Bondieu ?

Sé lamour ki pous in moun of son vi Jéova (1 Jan 4:10, 19). La Bib i di : « Ou doi èm Jéova out Bondieu avèk tout out keur, avèk tout out lam, avèk tout out pansé é avèk tout out fors » (Mark 12:30). Nou mont ke nou ièm Bondieu, pa rienk kan nou koz, mé osi par nout bann zaksion. Kom in lamour for i pous in mesieu èk in madam pou maryé, lé parèy, nout lamour pou Jéova i pous anou of ali nout vi é fé batiz anou.

2. Kèl bénédiksion Jéova i akord son bann Témoin ke lé batizé ?

Le batèm va fé rant aou dan le fami Jéova ke lé ereu. Ou va voir lamour Jéova pou ou diféran fason, é ou va kos ankor plus koté li (lir Malaki 3:16-18). Jéova i sra out Papa, é ou va fé parti in gran fami frèr é seur, su tout la tèr, ki ièm Jéova é ki ièm aou (lir Mark 10:29, 30). Kom nou la finn vu, na bann zafèr pou fé avan le batèm. An premié, ou doi aprann konèt Jéova é èm ali, é avoir foi an son Garson. An deuzièm, ou doi of out vi Jéova. Kan ou sra finn fé tousala é ke ou sra batizé, ou sra su le chemin pou la vi pou toultan. La Parol Bondieu i di : « Le batèm [...] i sov azot » (1 Pièr 3:21).

ALON APRANN PLUS

Alon voir poukosa of out vi Jéova é fé batiz aou lé inportan.

3. Nout tout nou doi choizi kisa nou sar sèrvi

Dann tan lontan, désèrtin Zisraélit té pans ke zot té pe ador an mèm tan Jéova é le fo bondieu Baal. Mé Jéova la anvoiy son profèt Éli pou korij zot fason pansé. Lir 1 Roi 18:21 é koz su késtion la :

Kèl choi bann Zisraélit té doi fé ?

Kom bann Zisraélit, nou doi choizi kisa nou va sèrvi. Lir Luk 16:13 é koz su bann késtion la :

Poukosa nou pe pa ador an mèm tan Jéova é in not moun oubien in not nafèr ?
Koman mont Jéova ke nou choizi ador ali ?

4. Pran le tan réfléchi su lamour ke Jéova néna pou ou

Jéova la donn anou in bonpe kado, ke néna in bonpe la valeur. An retour, kosa nou pe donn ali ? Gard le VIDÉO.

VIDÉO : Alon donn bann kado Bondieu (3:04)

Par kèl fason Jéova la montré ke li ièm aou ? Lir Psom 104:14, 15 é 1 Jan 4:9, 10 é koz su bann késtion la :

Kèl kado Jéova ou ièm le plus ?
Kosa ou resan pou Jéova kan ou majinn son bann kado ?

Kan in moun i donn anou in kado ke nou ièm vréman, nou ve mont ali nout rekonésans. Lir Detéronom 16:17 é koz su késtion la :

Kan ou pans tout sak Jéova la fé pou ou, kosa ou la anvi donn ali ?

5. Of nout vi Jéova i aport in bonpe bénédiksion

In bonpe d’moun i pans ke èt sélèb, avoir in bon plas travay oubien gingn larjan va rann azot ereu. Mé èske sa lé vré ? Gard le VIDÉO, é koz su bann késtion ki vien apré.

VIDÉO : Mi té viv rienk pou foutbol (5:45)

Mèm si Andreï té ièm joué foutbol, akoz li la lès se karyèr la dèryèr li ?
Li la désid donn tout son vi Jéova olèrk joué foutbol. Èske té in bon désizion ? Poukosa ?

Avan ni in krétien, lapot Pol la étudié la loi juif èk in lansénian sélèb. Li la komans in gran karyèr, mé li la abandonn tousa pou ni krétien. Èske li la regrété ? Lir Filipien 3:8 é koz su bann késtion la :

Poukosa Pol la di, ke li té konsidèr sak li lavé fé avan kom « in ta déché » ?
Kosa li la ganié a la plas ?
Dapré ou, kosa va rann aou plus ereu : sèrv Jéova oubien fé in not nafèr dan out vi ?