LEKCIJA 46
Soske das amaro dživipen le Jehovaske?
Tiro dživipen deha le Jehovaske avka, hoj leske andre modľitba des vera, hoj pro furt služineha ča leske a hoj ov tuke ela furt pro peršo than andro dživipen. (Žalm 40:8) A paľis tut deha te bolel. Oleha sikaveha le manušenge, hoj diňal tiro dživipen le Jehovaske. Ňič nane bareder sar te dživel predal o Jehovas! So cirdela tiro jilo, kaj oda te kames te kerel?
1) Soske das amaro dživipen le Jehovaske?
Keras oda bare kamibnastar. (1. Jána 4:10, 19) E Biblija phenel: „Kameha le Jehovas, tire Devles, cale tire jileha, caľa tira dušaha, caľa tira goďaha the caľa tira zoraha.“ (Marek 12:30) Sar šaj sikavas, hoj kamas le Jehovas? Na ča oleha, hoj ada phenas. Aľe oleha, sar dživas. Avka sar duj džene len vera, bo pes igen kamen, ta avka the amen das amaro dživipen andre modľitba le Jehovaske a das pes te bolel, bo les igen kamas.
2) So lačho del o Jehovas olen, so pes den te bolel?
Te tut des te bolel, chudes igen bari fameľija, so igen rado dikhel le Jehovas. A ola phrala pheňa kamena the tut. (Pregen Marek 10:29, 30) O Jehovas tuke presikavela ajso kamiben sar o dad peskere čhaveske. Vašoda les kameha buter a buter. (Pregen Malachiáš 3:16–18) So tuke kampel te kerel anglal o boľipen? Te sikhľol pal o Jehovas, te kamel les, te paťal andro Ježiš a te del vera le Jehovaske andre modľitba, hoj služineha ča leske. Pal o boľipen chudeha te dživel oda nekfeder dživipen, so ľikerela pro furt. Imar achaľuvas soske e Biblija phenel: „O boľipen tumen ...zachraňinel.“ (1. Petra 3:21 NZ)
DODŽAN TUT BUTER
Soske kampel, kaj čačes te des tiro dživipen le Jehovaske a des tut te bolel?
3) Ňiko amendar našťi bešel pro duj stolki
Sar dživelas o prorokos o Eliáš, varesave Židi služinenas the le Jehovaske, the le modlenge. Vašoda o Jehovas bičhaďa le Eliaš, kaj lenge te dophenel. Pregen 1. Kráľov 18:21 a paľis vakeren jekhetane:
-
Maškar kaste peske o Židi majinde te kidel avri?
Avka sar o Židi, the amen peske mušinas te kidel avri, kaske služinaha. Pregen Lukáš 16:13 a paľis vakeren jekhetane:
-
Soske našťi služinas a das jilo the le Jehovaske, the le svetoske?
-
Sar sikavas le Jehovaske, hoj peske kidňam avri, hoj služinaha ča leske?
4) Rozmišľin, sar igen but tut o Jehovas kamel
O Jehovas imar ajci kerďa predal amende. A so amen šaj das le Jehovaske? Mukh o VIDEJO.
Soha tuke o Jehovas presikavel o kamiben? Pregen Žalm 104:14, 15 the 1. Jána 4:9, 10 a paľis vakeren jekhetane:
-
Vaš soske nekbuter paľikeres le Jehovaske?
-
So ciťines ko Jehovas, te džanes, so savoro tut diňa?
Le tuke, hoj varekastar chudňal fest šukar darčekos. Isto the tu kameha predal leste vareso te kerel, kaj te dikhel, hoj oda na les ča kavka. Pregen 5. Mojžišova 16:17 a paľis vakeren jekhetane:
-
O Jehovas tut furt vareso del. A tu so, na cirdel tut o jilo tiš les vareso te del?
5) Ňič nane feder sar te služinel le Jehovaske!
But manuša peske mišľinen, hoj te zarodena bare love, te len ena rajikane khera the pherdo somnakaj, akor ena bachtale. Aľe čačes hin oda kavka? Mukh o VIDEJO a paľis vakeren jekhetane.
-
Soske oda murš preačhiľa te el fotbalistas, te o fotbaľis igen kamelas?
-
Oda murš diňa peskero dživipen le Jehovaske. So mišľines, kerďa mištes? Soske?
Sigeder, sar o apoštolis o Pavol ačhiľa kresťanoske, sas les rajikano dživipen. Sas les bare školi. Sas maškar o bare manuša. Aľe sar lestar ačhiľa kresťanos, imar na kamelas avka te dživel. Bajinelas pal oda? Pregen Filipanom 3:8 a paľis vakeren jekhetane:
-
Soske o Pavol phenďa, hoj savoro, so omukhľa, sas predal leste ča šmeci?
-
So feder chudňa?
-
So phenes, ela tiro dživipen feder, te služineha le Jehovaske? Soske avka odphenes?
O Pavol na bajinelas, hoj ačhiľa kresťanoske, bo chudňa buter sar omukhľa
VAREKO ŠAJ PHENEL: „Na mušines tut odoj te prebolel, ča phir tuke odoj.“
-
So tu phenes, soske hin mištes, hoj deha tiro dživipen le Jehovaske?
SO SIKHĽIĽAM
O kamiben ko Jehovas amen cirdel, kaj leske te das amaro dživipen a kaj pes te das te bolel.
So bi phenehas
-
Soske kamas le Jehovas cale jileha a ča leske služinas?
-
So lačho del o Jehovas olen, so pes den te bolel?
-
Kames the tu te del tiro dživipen le Jehovaske?
DIKH TUKE BUTER
Dikh tuke, soske jekh spevačka the športovcos dine peskero dživipen le Jehovaske.
So o terne phučen: Savo dživipen kamav? – Mukhle pal peste (6:54)
Pregen tuke, soske hin lačhes te del tiro dživipen le Jehovaske.
„Prečo sa oddať Jehovovi?“ (Strážna veža z 15. januára 2010)
Dikh tuke, save bachtale hine ola, so dine peskero dživipen le Jehovaske.
Andro člankos „Roky som uvažovala nad tým, prečo sme tu“ tuke pregen, sar jekh džuvľi avľa pre koda, so hin nekfeder te kerel andro dživipen.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
