ЛЕКЦИЈА 46
Соске те де лафи е Јеховаске кај ка служине леске хем те крстине тут?
Ту деа лафи е Јеховаске кај ка служине леске аѓаар со ки молитва ветинеа кај ка обожавине само ле хем кај лескири волја ка чхиве ко прво тхан ко тло живото (Псалм 40:8). Пало адава крстинеа тут хем аѓаар сикавеа е јаверенге кај ту денѓан завет е Јеховаске. И одлука те да завет е Јеховаске тани и најважно одлука со ваљани те ана. Адалеске те дикха со шај те поттикнинел тут те ане асавки важно одлука која со ка менинел тло живото.
1. Со поттикнинела некас те дел лафи е Јеховаске кај ка служинел леске цело живото?
Амен даја лафи е Јеховаске кај ка служина леске адалеске со мангаја ле (1. Јованово 4:10, 19). И Библија охрабринела амен: „Манг е Јехова, тле Девле, са тле вилеа, хем са тле душаја, хем са тле гоѓаја, хем са тле силаја“ (Марко 12:30). Амен сикаваја амаро мангипе е Девлеске на само амаре лафенцар него хем амаре постапкенцар. Исто сар со дуј џене венчинена пе адалеске со мангена пе, аѓаар амаро мангипе спрема о Јехова поттикнинел амен те да леске завет хем те крстина амен.
2. Кола берекетија дела о Јехова пле крстиме слугенге?
Кеда крстинеа тут, ту овеа дело тари е Јеховаскири бахтали фамилија. Тегани, ту ка осетине лескоро мангипе ко бут начинија хем ка ове леа попаше него со сиан акана. (Читин Малахија 3:16-18.) На само со тегани о Јехова ка овел тло Дад, него исто аѓаар ка овел тут духовно фамилија таро пхраља хем пхења ко цело свето, кола со мангена е Девле хем мангена тут. (Читин Марко 10:29, 30.) Џанѓола пе, англедер те крстине тут ваљани те кере несаве буќа. Ваљани те сикљове башо Јехова, те манге ле хем те овел тут вера ко лескоро Чхаво. Ко крајо, ту мора те де лафи е Јеховаске кај ка служине леске цело живото. Ако кереа са акала буќа хем крстинеа тут, ту ка шај те ове бахтало засекогаш. Е Девлескоро Лафи вакерела: „О крстибе... акана спасинела тумен да“ (1. Петрово 3:21).
ДОЗНАЈН ПОВИШЕ
Дознајн соске тано важно те де завет е Јеховаске хем те крстине тут.
3. Сарине амен ваљани те одлучина каске ка служина
Несаве мануша ко пурано Израел мислинѓе кај шај те служинен хем е Јеховаске хем е ховавне девлеске е Ваалеске. Ама, о Јехова бичхалѓа е пророко е Илија те испрајнел адава погрешно стави. Читин 1. Царевите 18:21, а пало адава керен лафи башо акава пучибе:
-
Сави одлука ваљани сине те анен о Израелција?
Исто сар о Израелција, амен да мора те одлучина каске ка служина. Читин Лука 16:13, а пало адава керен лафи башо акала пучиба:
-
Соске нашти те служина хем е Јеховаске хем некаске јавереске?
-
Сар сикаваја е Јеховаске кај одлучинѓем те служина само леске?
4. Размислин башо адава кобор мангела тут о Јехова
О Јехова денѓа амен бут скапоцена поклонија. Со шај амен те да леске? Дикх о ВИДЕОКЛИПИ.
Ко кола начинија сикавѓа о Јехова кај мангела тут? Читин Псалм 104:14, 15 хем 1. Јованово 4:9, 10, а пало адава керен лафи башо акала пучиба:
-
Башо кова поклон таро Јехова сиан посебно благодарно?
-
Со осетинеа спрема о Јехова кеда размислинеа башо адава?
Ако некастар добинаја јекх поклон кова со керела амен бахтале, амен мангаја те сикава леске кај сием благодарна. Читин 5. Мојсеева 16:17, а пало адава керен лафи башо акава пучибе:
-
Кеда размислинеа башо са адава со керѓа туке о Јехова, со сиан поттикнимо те де леске?
5. Адава со ка де лафи е Јеховаске кај ка служине леске ка анел туке берекетија
Бут мануша мислинена кај и слава, и кариера или о паре шај те керен лен бахтале. Ама, дали адава тано чаче аѓаар? Дикх о ВИДЕОКЛИПИ, а пало адава керен лафи башо акала пучиба:
-
Соске акава мануш чхинавѓа пли кариера, иако бут мангела сине те кхелел фудбал?
-
Ов одлучинѓа те дел пло најшукар башо Јехова, а на башо фудбал. Со мислинеа, дали ов анѓа исправно одлука? Соске мислинеа аѓаар?
О апостол Павле англедер те овел христијани шај сине те овел ле успешно кариера. Ов проучинѓа о еврејско закони ко јекх познато учители. Ама, ов мукхља са адава те шај те овел христијани. Дали о Павле некогаш жалинѓа баши пли одлука? Читин Филипјаните 3:8, а пало адава керен лафи башо акала пучиба:
-
Соске о Павле дикхела сине сар ѓубре ко адава со керела сине англедер те овел христијани?
-
Со добинѓа о Павле адалеске со мукхља пли кариера?
-
Со мислинеа со ка керел тло живото пошукар — о служибе е Јеховаске или нешто јавер?
Кеда о Павле уло христијани, ов добинѓа бут повише таро адава со нашавѓа
НЕСАВЕ ШАЈ ВАКЕРЕНА: „Џанава кај акава тано о чачипе, ама на сиум спремно те крстинав ман“.
-
Со мислинеа, соске тано шукар те де лафи е Јеховаске кај ка служине леске хем те крстине тут?
СО СИКЛИЛЕМ
О мангипе поттикнинела амен те да лафи е Јеховаске кај ка служина леске цело живото хем те крстина амен.
Сар ка одговорине?
-
Соске о Јехова заслужинела те манга ле цело вилеа хем те обожавина ле?
-
Сар о Јехова наградинела пле крстиме слуген?
-
Дали мангеа те де лафи е Јеховаске кај ка служине леске цело живото?
ИСТРАЖИН
Дикх соске јекх оперско пеачка хем јекх рагбисти одлучинѓе те ден завет е Јеховаске.
Младите прашуваат — на што да го посветам мојот живот? — Навраќање на минатото (6:54)
Дикх јавера шукар причине соске те де завет е Јеховаске.
„Зошто да му се заветуваш на Јехова?“ (Стражарска кула таро 15 јануари 2010)
Ко акава музичко споти, дикх кобор тане бахтале окола со денѓе завет е Јеховаске.
Ко искуство е насловеа „Со години се прашував: ’Зошто постоиме?‘“, читин со поттикнинѓа јекхе џувља те размислинел башо адава сој лаке најважно ко живото.
„Библијата менува животи“ (Стражарска кула таро 1 ноември 2012)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
