Дес то животос е Йеховаске, като йекхе молитвате дес совел, кай ка служинес само леске тай кай ов ка овел ко първо тхан тере животосте. (Псалм 40:8) После ащи те покръстинес тут. О покръстване сикавел околенге, кай динян то животос е Девлеске. Те дес то животос е Йеховаске си о най-важно решение, ковато ка лес. Со ащи те традел тут те лес кавка важно решение, ковато ка променинел то животос?

1. Со традел йекхе манушес те дел по животос е Девлеске?

Аме мангас те дас амаро животос е Йеховаске, соскето дехас лес. (1 Йоан 4:10, 19) И Библия пхенел аменге: „Дехе тере Девлес, е Йеховас, те целоне сърцеса, те целоне вогиеса, те целоне гогяса тай те целоне силаса.“ (Марко 12:30) Аме сикавас, кай дехас е Девлес ма само амаре думенца, ама е букиенца-да, колато керас. Йекх ром тай йекх ромни пранденен, соскето бут дехен йекх аверес. Аме-да дас амаро животос е Йеховаске тай покръстинас амен, соскето бут дехас лес.

2. Саве благословиес ка дел тут о Йехова, ако покръстинес тут?

Кана покръстинес тут, е Йеховаскоро щастливо семейство ка ачшовел торо-да семейство. Тогава ка дикхес сар о Йехова сикавел пи любов кариг туте още по-бут тай ка ачшовес още по-лачшо амал леса. (Четине Малахия 3:16-18.) О Йехова ка ачшол то Дад тай ка овел тут бут пхрала тай пхеня тари цело пхув, колато дехен лес тай дехен тут-да. (Четине Марко 10:29, 30.) Ама требе те керес десаве букя англал те покръстинес тут. Требе те сикльовес е Йеховаске, те дехес лес тай те верувинес лескере Чшесте. Тогава вече ащи те дес то животос е Йеховаске. Ако керес калка букя тай покръстинес тут, тогава ка пхирес ко дром, ковато ингалел жи ко вечно животос. Е Девлескоро Слово пхенел: „О покръстване... спасинел тумен-да.“ (1 Петър 3:21)

 РОДЕ ПО-ХОРЕСТЕ

3. Секо йекх амендар требе те решинел каске ка служинел

Ко пуране диеса десаве таро израилтяня мислиненас, кай ащи те служинен хем е Йеховаске, хем е хохавне девлеске Ваал. Ама о Йехова бичшалгяс е пророкиес Илия те пхенел ленге, кай на приеминел салка букя. Четинен 3 Царе 18:21 тай хоратинен калке въпросиеске:

• Саво решение требелас те лен о израилтяня?

Аме-да сар о израилтяня, требе те решинас каске ка служинас. Четинен Лука 16:13 тай хоратинен калке въпросиенге:

• Соске нащи те поклонинас амен хем е Йеховаске, хем декхаске авереске или даже авере букиенге?

• Сар сикавас е Йеховаске, кай решингям те служинас само леске?

4. Мислине кизом бут дехел тут о Йехова

 5. Ако дес то животос е Йеховаске, ка овен тут баре благословиес

 СО СИКЛИЛЯМ

Аме дехас е Йеховас, аке соске мангас те дас амаро животос леске тай те покръстинас амен.

О най-важна букя таро уроки

• Соске о Йехова заслужинел те дехас лес тай те служинас леске са вогиестар?

• Сар ка благословинел тут о Йехова, ако покръстинес тут?

• Мангес ли те дес то животос е Йеховаске?