XIDONDZRO 46
Ha Yini Hi Fanela Ku Tinyiketela Ni Ku Babatisiwa?
U tinyiketela ka Yehovha hi xikhongoto, u mu dumbisa leswaku u ta gandzrela yene ntsena u tlhela u zrangisa ku zrandzra kwake a wuton’wini byaku. (Amapsalma 40:8) Ntsrhaku ka leswo, wa babatisiwa. Hi ku yentxa leswo, u komba vambeni leswaku u tinyiketelile. Ku tinyiketela kwezru ka Yehovha i xiboho xa lisima swinene ku tlula hinkwaswu leswi hi nga swi tekaka. I yini lexi nga ku susumetelaka ku yentxa xiboho lexi txintxaka wutomi xa ku fana ni lexi?
1. I yini lexi susumetelaka mhunu akuva a tinyiketela?
Ku tinyiketela kwezru ka Yehovha ku susumeteliwa hi lizrandzru. (1 Yohan 4:10, 19) Bibele dzri hi kutxa leswi: ‘Zrandzra Hosi, Xikwembu Nkulukumba waku, hi mbilu yaku hinkwayu, ni hi moya waku hinkwawu, ni hi ku yanakanya kwaku hinkwaku, ni hi ntamu waku hinkwawu.’ (Marka 12:30) Hi kombisa leswaku ha mu zrandzra Xikwembu Nkulukumba hi leswi hi swi hlayaka ni leswi hi swi yentxaka. Ku fana ni leswi wanuna ni wansati lava zrandzranaka va gamaka va txhata, lizrandzru dzrezru ha Yehovha dzri hi susumetela kuva hi tinyiketela kwake ni kuva hi babatisiwa.
2. Xana Yehovha a ti tovokisa hi ndlela yini Timboni take leti babatisiwiki?
Loko u babatisiwa, u ta va xizro xa ndangu wa Yehovha lowu nyonxiki. U ta vona lizrandzru dzrake hi tindlela tinyingi, nakone u ta va kusuhi ngopfu na yene ku tlula swoswi. (Dondzra Malaki 3:16-18.) Ku yengesela ka leswo, Yehovha a ta va Papayi waku nakone u ta va ni vamakwavu a misaveni hinkwayu, lava zrandzraka Yehovha va tlhela va zrandzra na wene. (Dondzra Marka 10:29, 30.) I ntiyiso leswaku ku ni swa kukazri leswi u fanelaka ku swi yentxa na u nga si na babatisiwa. U fanela ku dondzra ha Yehovha, u mu zrandzra u tlhela u kombisa lipfumelo ka N’wanake. Hi wugamu, u fanela ku nyiketela wutomi byaku ka Yehovha. Loko u yentxa leswo u va u babatisiwa, u ta va u nghene ndleleni ya ku hanya hi ku nyonxa hi la ku nga helikiki. Zritu dzra Xikwembu Nkulukumba dzri li: ‘[Babatiso dzri] huluxa na n’wine swoswi.’—1 Petros 3:21.
KELISISA
Kambisisa leswaku ha yini swi li swa lisima kwaku ku tinyiketela ka Yehovha ni ku babatisiwa.
3. Hinkwezru hi fanela ku hlawula lweyi hi taka mu tizrela
A Israyeleni wa khale, vhanu vambeni a va pimisa leswaku va nga gandzrela Yehovha va tlhela va gandzrela xikwembu xa madzrimi lexi vitaniwaka Baal. Kambe Yehovha a zrumele muprofeta wake Eliya akuva a ya lulamisa mavonela wolawo ya ku hoxeka. Dondzrani 1 Tihosi 18:21, mi gama mi bulisana hi xivutiso lexi:
-
Xana he kwini ku hlawula loku Vaisrayele a va fanela ku ku yentxa?
Ku fana ni Vaisrayele, na hine hi fanela ku hlawula lweyi hi taka mu tizrela. Dondzrani Luka 16:13, mi gama mi bulisana hi swivutiso leswi:
-
Ha yini swi nga koteki ku gandzrela Yehovha ni mhunu kumbe ntxhumu wa kukazri hi nkama wun’we?
-
Xana hi mu kombisa kuyini Yehovha leswaku hi hlawula ku gandzrela yene?
4. Yanakanyisisa hi ndlela leyi Yehovha a ku zrandzraka ha yone
Yehovha a hi nyike tinyiko tinyingi ta lisima. Xana hine hi nga mu nyika yini? Vonani VHIDIYU.
He tini tindlela tin’wana leti Yehovha a swi kombisaka ha tone leswaku awa ku zrandzra? Dondzrani Amapsalma 104:14, 15 na 1 Yohan 4:9, 10, mi gama mi bulisana hi swivutiso leswi:
-
He tini tinyiko ta Xikwembu Nkulukumba leti nga ta lisima ngopfu kwaku?
-
Tinyiko toleto ti ku yentxa u titwisa kuyini ha yene?
Loko mhunu a ku nyika nyiko leyi u yi zrandzraka swinene, u navela ku mu tlangela lweyi a ku nyikaka yone. Dondzrani Deuteronoma 16:17, mi gama mi bulisana hi xivutiso lexi:
-
Loko u yanakanyisisa hi hinkwaswu leswi Yehovha a ku yentxeliki swone, xana u susumeteleka ku mu nyika yini?
5. Ku tinyiketela swi tisa matovoko manyingi
Vhanu vanyingi va kholwa ka leswaku ndhuma, ntizro lowu holelaka swi phela kumbe mali swi ta va yentxa va nyonxa. Xana i ntiyiso? Vonani VHIDIYU, mi gama mi bulisana hi swivutiso leswi landzrelaka.
-
Nambileswi lweyi hi mu voniki ka vhidiyu a a swi zrandzra ku bela bola, ha yini a wu tsrhikile ntizro lowu?
-
A tiyimisele ku tinyiketela ka Yehovha, ku nga li ka bola. U yanakanya leswaku a yentxe xiboho lexinene? Ha yini?
Na a nga si va mukriste, mupostola Pawulo a a ni mukhandlu wa ku va ni ntizro wa xiyimu xa le henhla. A a dondzrisiwe nawu wa Xiyuda hi mudondzrisi wa ndhuma. Kambe a swi tsrhikile akuva a va mukriste. Xana Pawulo a tisolile? Dondzrani Ba-le-Filipi 3:8, mi gama mi bulisana hi swivutiso leswi:
-
Ha yini Pawulo a hlaye leswaku leswi a a li swone loko a nga si va mukriste a swi li ‘swa ku ka ndlela’ kumbe nsila?
-
Xana a bindzrule yini hi kola ka leswi a swi tsrhikiki?
-
Xana ku ni ntxhumu wa lisima swinene a wuton’wini ku tlula ku tizrela Yehovha?
Loko Pawulo a ve mukriste, a kume mabindzru manyingi ku tlula leswi a nga swi luza
VAN’WE VA LI: “A swi twali ku nyiketela wutomi byaku ka Xikwembu Nkulukumba.”
-
U swi vonisa kuyini, xana swa twala ku nyiketela wutomi byaku ka Yehovha? Ha yini?
NKATSRAKANYU
Lizrandzru dzri hi susumetela ku tinyiketela ka Yehovha ni ku babatisiwa.
Mpfuxeto
-
Ha yini hi fanela ku zrandzra Yehovha hi tlhela hi mu gandzrela hi mbilu hinkwayu?
-
Xana Yehovha a ti tovokisa hi ndlela yini Timboni leti babatisiwiki?
-
Xana wa swi djula ku nyiketela wutomi byaku ka Yehovha?
HANDZRISISA
Vona leswaku ha yini mutxhayi ni mubeli wa bola va hlawule ku tinyiketela ka Yehovha.
Vampswha Va Vutisa—Xana U Ta Yentxa Yini Hi Wutomi Byaku?—Loko U Lavisa Ntsrhaku (6:54)
Vona swivangelo leswi yengetelekiki swa ku tinyiketela.
“Ha yini U Fanela Ku Tinyiketela Ka Yehovha?” (Xihondzro Xa Ku Zrindzra, 15 ka Janeru wa 2010)
Ka wuyimbeleli lebyi bya vhidiyu, vona ku nyonxa loku lava tinyiketelaka ka Yehovha va ku kumaka.
Ka mfambu lowu liki “Ku Dzringana Malembe A Ni Tivutisa Leswi: ‘Ha Yini Hi Li Lani?’” vona leswaku i yini lexi nga kutxa wansati wa kukazri ku kambisisa leswi a a swi zrangisa.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Novhembru wa 2012)
