FIANARA 46

Manino Iha ro Tokony Hanokam-bata Noho Hatao Batisa?

HANENTY

Manokam-bata ho ani-Jehovah iha lafa miresaky aminy amy vavaky, le mampitamà azy hoe hanompo azy raiky avao sady hanao ty sitrapony ho vatan-draha marè amy ty fiainanao. (Salamo 40:8) Atao batisa iha afarani-zay, mba hampisehoa amin’olo iaby hoe fa nanokam-bata iha. Ty fanokanam-bata ho ani-Jehovah ro fanapahan-kevitsy bevata hataonao satria hanova tanteraky ty fiainanao raha zay. Ino ty hanosiky anao hanao ani-fanapahan-kevitsy bevata io?

1. Ino ty raha manosiky ty olo raiky hanokam-bata?

Fitiava ro manosiky antsika hanokam-bata ho ani-Jehovah. (1 Jaona 4:10, 19) Mampirisiky antsika ty Baiboly hoe: “Tiavo Jehovah Ndranaharinao amy fonao iaby noho ty vatanao iaby noho ty sainao iaby voho ty herinao iaby.” (Marka 12:30) Tsy mivola avao tsika hoe tea a-Ndranahary, fa asehontsika amy ty raha ataontsika mihintsy ty fitiavantsika azy. Lafa mifankatea, ohatsy, ty olo roe le manapa-kevitsy hifanambaly rozy. Laha tea ani-Jehovah koa tsika, le hanokam-bata ho azy sady hatao batisa.

2. Ino ty fitahia ameani-Jehovah ty Vavolombelony vita batisa?

Lasa anatini-fianakaviani-Jehovah iha lafa vita batisa. Ho tsapanao hoe tea anao ie, sady asehony amy fomba sankarazany raha zay. Hihamarìny marè azy koa iha. (Vakio Malakia 3:16-18.) Hanjary Babanao Jehovah, sady hahazo rahalahy noho anabavy baka amy tany toy iaby iha. Tea anao rozy sady tea ani-Jehovah manahaky anao koa. (Vakio Marka 10:29, 30.) Fe mbo misy raha mila ataonao tse, zay iha vo azo atao batisa. Mila mianatsy mikasiky ani-Jehovah noho tea azy voho mino ani-Anakilahiny iny iha. Afaky manoka ty fiainanao ho ani-Jehovah amy zay iha afarani-zay. Laha manao ani-reo noho atao batisa iha, le ho afaky hahazo fiaina zisiky farany. Mivola ty Safà-Ndranahary hoe: ‘Manavotsy anareo koa henanizao ty batisa.’—1 Petera 3:21.

DINIHO LALIKY

Hodinihintsika hoe manino iha ro tokony hanokam-bata ho ani-Jehovah noho hatao batisa.

3. Mila mifily tsika hoe ia ty hotompoentsika

Nieritseritsy ty Israelita sisany hoe azon-drozy ampiarahy amy fanompoa ani-Bala ndranahary diso, ty fanompoa ani-Jehovah. Fe naniraky ani-Elia mpaminaniny Jehovah mba hanity ani-hevitsy dison-drozy zay. Vakio 1 Mpanjaka 18:21, bakeo iaraho midiniky fanontanea toy:

Ino ty safidy tsy maintsy nataon’Israelita reo?

Mila mifily koa tsika henanizao hoe ia ty hotompoentsika. Vakio Lioka 16:13, bakeo iaraho midiniky fanontanea retoa:

Manino ro tsy azontsika afangaro amy fanompoa raha hafa, ty fanompoa ani-Jehovah?
Akory ty ampisehoantsika amy Jehovah hoe mifily ty hanompo azy tsika?

4. Vetsevetseo ty fitiavani-Jehovah anao

Maro ty fanomeza nameani-Jehovah antsika. Ino koa ty mba azontsika amea azy? Alefaso VIDEO toy.

VIDEO: Manolora Fanomeza ho a-Ndranahary (3:04)

Ino ty raha sisany nampisehoani-Jehovah ty fitiavany anao? Vakio Salamo 104:14, 15 noho 1 Jaona 4:9, 10, bakeo iaraho midiniky fanontanea retoa:

Ino amy fanomeza baka amy Jehovah rey ro tena teanao?
Ndranahary manao akory Jehovah laha hentea fanomeza nataony rey?

Lafa nahazo fanomeza tena teantsika tsika, le ta hisaotsy marè ani-ze olo nanome ani-raha zay. Vakio Deoteronomia 16:17, bakeo iaraho midiniky fanontanea toy:

Voatosiky hanome ino ani-Jehovah iha, lafa mandiniky ty raha iaby nataony ho anao?

5. Mahazo fitahia maro ze manokam-bata

Mieritseritsy ty ankamaroan’olo hoe ho sambatsy ie laha malaza, soa asa, na be drala. Marina va zay? Alefaso VIDEO toy, bakeo iaraho midiniky fanontanea reo.

VIDEO: Tsy Nisy Natakaloko ty Laboly (5:45)

Tena tea laboly lahilahy tamy video teo iny, fe nanino ie ro niala tamy raha zay?
Nanapa-kevitsy hanoka ty fiainany ho ani-Jehovah ie, fa tsy amy laboly. Akory ty hevitsinao, mety va ty fanapahan-kevitsiny? Ino ty antony?

Niezaky hana pilasy ambony apostoly Paoly tamy ie mbo tsy lasa Kristiana. Nianatsy mikasiky lalàna jiosy ie sady mpampianatsy malaza ro nampianatsy azy. Fe nengany iaby raha iaby rezay lafa nanjary Kristiana ie. Naneny va Paoly? Vakio Filipianina 3:8, bakeo iaraho midiniky fanontanea retoa:

Manino Paoly ro nivola hoe “fako miavotsy” ty raha iaby nataony talohani-naha Kristiana azy?
Ino ty fitahia niazony?
Misy raha hafa hahasoa anao mandilatsy ty fanompoa ani-Jehovah va?