LESONA 46
Aiseā e Tatau ai Ona Tuuina Atu ma Papatiso?
E tuuina atu lou ola iā Ieova e ala i le taʻutino atu iā te ia i le tatalo, o le a e tapuaʻi tau lava o ia ma faamuamua lona finagalo i lou olaga. (Salamo 40:8) Pe a uma lenā, ona e papatiso loa lea. O le faia faapea e faailoa atu ai i isi ua uma ona e faia se tuuina atu. O le tuuina atu o tatou ola iā Ieova, o le filifiliga sili lea ona tāua e tatou te faia. O le ā e ono uunaʻia ai oe e faia lenei filifiliga?
1. O le ā e uunaʻia ai se tasi e faia le tuuina atu?
O le alofa e uunaʻia ai i tatou e tuuina atu o tatou ola iā Ieova. (1 Ioane 4:10, 19) Ua faalaeiau mai le Tusi Paia iā i tatou: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Mareko 12:30) E faailoa atu lo tatou alolofa i le Atua i a tatou upu ma gaoioiga. E pei lava ona faaipoipo se ulugalii pe a alofa moni le tasi i le isi, e faapena foʻi ona uunaʻia i tatou e le alofa mo Ieova, e tuuina atu iā te ia ma papatiso.
2. O ā faamanuiaga ua folafola mai e Ieova i ana Molimau ua uma ona papatiso?
Pe a e papatiso, ona avea loa lea o oe o se sui o le aiga fiafia o Ieova. O le a e iloa ai lona alofa mo oe i le tele o auala ma atili ai ona e vavalalata atu iā te ia. (Faitau le Malaki 3:16-18.) E lē gata o le a avea Ieova ma ou Tamā, ae o le a iai sou aiga faaleagaga o uso ma tuafāfine i le lalolagi aoao, o ē e alolofa iā Ieova ma alolofa iā te oe. (Faitau le Mareko 10:29, 30.) Peitaʻi, e iai laasaga e manaʻomia ona e ausia ae e te leʻi papatiso. E manaʻomia ona e aʻoaʻo e faatatau iā Ieova, alofa iā te ia, faaalia le faatuatua i lona Alo, ma tuuina atu lou ola iā Ieova. Pe a e ausia na laasaga uma ma papatiso, o le a e uia ai le ala i se olaga fiafia e faavavau. Ua faapea mai le Afioga a le Atua: ʻO le papatisoga ua faaolaina ai nei outou.’—1 Peteru 3:21.
SAʻILIʻILI ATILI
Iloilo pe aiseā e tāua ai lou tuuina atu iā Ieova ma papatiso.
3. E tatau ona filifili po o ai tatou te auauna i ai
Na manatu nisi tagata Isaraelu anamua, e mafai ona latou tapuaʻi iā Ieova ma le atua sesē o Paala i le taimi e tasi. Ae na auina mai e Ieova lana perofeta o Elia e faasaʻo lenā manatu sesē. Faitau le 1 Tupu 18:21, ona talanoa lea i le fesili lenei:
-
O le ā se filifiliga na tatau ona faia e tagata Isaraelu?
I le pei o tagata Isaraelu, e tatau foʻi ona tatou filifili po o ai tatou te auauna i ai. Faitau le Luka 16:13, ona talanoa lea i fesili nei:
-
Aiseā e lē mafai ai ona tatou tapuaʻi iā Ieova, ae i le taimi e tasi o loo tapuaʻi foʻi i se isi atua, po o se isi mea?
-
E faapefea ona faailoa atu iā Ieova o loo tatou filifili e tapuaʻi iā te ia?
4. Manatunatu loloto i le alofa o Ieova mo oe
Ua foaʻi mai e Ieova iā i tatou le anoanoaʻi o meaalofa tautele. O le ā e mafai ona tatou avatu iā te ia? Faaali le VITIŌ.
O ā nisi o auala ua faaalia ai e Ieova le alofa iā te oe? Faitau le Salamo 104:14, 15 ma le 1 Ioane 4:9, 10, ona talanoa lea i fesili nei:
-
O ā meaalofa mai iā Ieova e sili ona e lotofaafetai ai?
-
O ā ou faalogona e faatatau iā te ia ona o na meaalofa?
Pe a maua se meaalofa tatou te fiafia lava i ai, e tatou te faailoa atu le talisapaia i lē na aumai ai. Faitau le Teuteronome 16:17, ona talanoa lea i le fesili lenei:
-
Pe a manatunatu i mea uma ua faia e Ieova mo oe, o le ā e uunaʻia ai oe e avatu iā te ia?
5. O le tuuina atu e maua ai le tele o faamanuiaga
E manatu le toʻatele o tagata o le a latou maua le fiafia pe a iai se tulaga taʻutaʻua, se galuega lelei po o tupe. Pe e moni lenā manatu? Faaali le VITIŌ, ona talanoa lea i fesili nei:
-
I le vitiō, e ui na fiafia le tagata e taalo i le soka, ae aiseā na ia tuua ai le taaloga?
-
Na ia filifili e avatu le mea sili na te mafaia mo Ieova, ae lē o le soka. Pe e te manatu na ia faia le filifiliga saʻo? Aiseā?
A o leʻi avea le aposetolo o Paulo ma Kerisiano, sa ia tuliloaina se olaga taʻutaʻua. Na ia aʻoaʻoina le tulafono a Iutaia mai se faiaʻoga lauiloa. Ae na ia tuua na mea uma ina ia avea o ia ma Kerisiano. Pe na salamō Paulo i lana filifiliga? Faitau le Filipi 3:8, ona talanoa lea i fesili nei:
-
Aiseā na faapea mai ai Paulo, o mea uma na ia faia a o leʻi avea ma Kerisiano o ni “otaota” po o lapisi?
-
O le ā na ia mauaina?
-
E faapefea ona e faatusatusa le auauna iā Ieova, ma se isi lava mea na ono mafai ona faaaogā ai lou olaga?
Ina ua avea Paulo ma Kerisiano, e tele atu mea na ia maua nai lo mea na ia lafoaʻia
UA FAAPEA MAI NISI: “Ua ou iloa o le upu moni lea, ae lē mafai ona ou ola ai.”
-
Aiseā e tatau ai ona tuuina atu lou ola iā Ieova?
AOTELEGA
O le alofa e uunaʻia ai i tatou e tuuina atu o tatou ola iā Ieova ma papatiso.
Fesili Autalu
-
Aiseā e tatau ai ona tatou alolofa ma tapuaʻi atu iā Ieova ma le lotoatoa?
-
E faapefea ona tauia e Ieova ana Molimau ua uma ona papatiso?
-
Pe e te manaʻo e tuuina atu lou ola iā Ieova?
MANATU FAAOPOOPO
Mātau pe aiseā na filifili ai se tagata fai musika ma se tagata taalo e tuuina atu o la ola iā Ieova.
Ua Fesili Mai Talavou—O le a Faapefea Ona Faaaogā Loʻu Olaga?—Toe Tepa i Tua (6:54)
Iloilo isi māfuaaga e tatau ai ona e faia se tuuina atu.
“Aiseā E te Tuuina Atu ai iā Ieova?” (Le Olomatamata, Ianuari 15, 2010)
I lenei vitiō musika, mātau le fiafia o i latou ua tuuina atu o latou ola iā Ieova.
I le tala, “E Tele Tausaga o Ou Tuufesili ai, ʻAiseā ua Tatou Iai i Inei?’” mātau po o le ā na uunaʻia ai se fafine e toe iloilo mea na ia faamuamua.
“E Mafai e le Tusi Paia Ona Suia Olaga” (Le Olomatamata, Novema 1, 2012)