PĚNGANGĚNDUNGANG 46
Kawe Nụe Měgělị Watangeng si Yehuwa kụ Ibaptisẹ̌?
I kau něgělị watangengu si Yehuwa su tempong nẹ̌doa nẹ̌diandi kětạeng měněmbah si Sie kụ i Sie sarung makoạ kahumotongange su pěbawiahu. (Mazmur 40:8) Bọu ene, i kau botonge ibaptisẹ̌. Su tempong nibaptisẹ̌, i kau něnodẹ su taumata wal᷊inẹ i kau seng něgělị watangengu si Yehuwa. Měgělị watangeng si Yehuwa ene kai putusang sěbạe penting botonge koateng i kitẹ. Putusang penting ini, sarung makawal᷊ui pěbawiahu. Apa makawahangsang si kau gunang měkoạ putusang sěbạe penting ini?
1. Apa makawahangsang si kitẹ měgělị watangeng si Yehuwa?
I kitẹ měgělị watangeng si Yehuwa ual᷊ingu i kitẹ makěndagẹ̌ si Sie. (1 Yohanes 4:10, 19) Alkitapẹ̌ němahangsang si kitẹ, ’Kěndagẹ̌kong [Yehuwa] Ruatanu ringangu kaguwạu naungu, ringangu kaguwạu laěnnanu ringangu lai kaguwạu ihạu.’ (Markus 12:30, Binohẹ Susi Bal᷊o Mapia) I kitẹ měnodẹ i kitẹ makěndagẹ̌ su Mawu bal᷊inẹ kětạeng bọu bawera, katewe lai bọu kakanoạ. Kere sěngkatau esẹ dingangu sěngkatau wawine nẹ̌kawing ual᷊ingu i rẹ̌dua měkẹ̌kakěndagẹ̌ sěmbaụ su wal᷊inẹ, kerene lai kakěndagẹ̌ si Yehuwa sarung makawahangsang si kitẹ gunang měgělị watangeng i kitẹ si Sie kụ ibaptisẹ̌.
2. Manga al᷊amatẹ̌ apa sarung gělịkang i Yehuwa su manga ělang’E apang seng nibaptisẹ̌?
Su tempong nibaptisẹ̌, i kau sarung makoạ bageang bọu kěluargang Yehuwa. Bọu ene lai, i kau sarung makapěndang kakěndagi Yehuwa lai sarung limembong marani dingang’E. (Basa Maleakhi 3:16-18.) Yehuwa sarung makoạ i Amangu. Bọu ene lai, i kau sarung makaěbạ keluarga rohani su patikụ dunia kụ makěndagẹ̌ si Yehuwa dingangu makěndagẹ̌ si kau. (Basa Markus 10:29, 30.) Katewe, těntal᷊ang bědang tawe nibaptisẹ̌, piạ piram baụ hal᷊ẹ̌ harusẹ̌ koatengu. I kau harusẹ̌ měngěndung soal i Yehuwa, kuměndagẹ̌ si Sie, dingangu mangimang su Ahus’E. Samurine, i kau harusẹ̌ měgělị pěbawiahu si Yehuwa. Mạeng i kau měkoạ manga hal᷊ẹ̌ ene kụ ibaptisẹ̌, i kau sarung měbiahẹ̌ mal᷊uasẹ̌ sarang karěngụe. Hengetangu Mawu naul᷊ị, ”Baptisan . . . orasẹ̌ ini nakasal᷊amatẹ̌ si [kau].”—1 Petrus 3:21.
BANGKA PAKARAL᷊UNG
Mahịe měngěndung kawe nụe sěbạe penting měgělị watangeng si Yehuwa kụ ibaptisẹ̌.
3. I kitẹ kěbị harusẹ̌ měmile mẹ̌tahamawu si sai
Su Israel tempong tamai, pirang katau nẹ̌pikirẹ̌ i sire botonge měněmbah si Yehuwa apidu měněmbah Baal. Katewe, Yehuwa něndolohẹ̌ Nabi Elia gunang měnul᷊idẹ̌ tiněnang i sire. Basa 1 Raja-Raja 18:21, bọu ene bisarai kakiwal᷊o ini:
-
Tau Israel harusẹ̌ měmile apa?
Kere tau Israel, i kitẹ lai harusẹ̌ měmile mẹ̌tahamawu si sai. Basa Lukas 16:13, bọu ene bisarai manga kakiwal᷊o ini:
-
Kawe nụe i kitẹ tawe makapẹ̌tahamawu si Yehuwa apidu mẹ̌tahamawu hal᷊ẹ̌ wal᷊inẹ?
-
Kerea i kitẹ měnodẹ si Yehuwa i kitẹ němile mẹ̌tahamawu si Sie?
4. Pẹ̌tiněna kakěndagi Yehuwa gunang i kau
Yehuwa seng něgělị lawọ hadiah maarěga si kitẹ. Apa wotonge gělịkang i kitẹ si Sie? Putarẹ̌ VIDEONE.
Kerea Yehuwa něnodẹ kakěndag’E si kau? Basa Mazmur 104:14, 15 dingangu 1 Yohanes 4:9, 10, bọu ene bisarai manga kakiwal᷊o ini:
-
Hadiah apa nighělị i Yehuwa kụ sěbạe lẹ̌arěgangu?
-
Ual᷊ingu Yehuwa něgělị manga hadiah ene, kerea pěndangu soal i Sie?
Su tempong i kitẹ nakatarimạ hadiah sěbạe ikẹ̌kapuluang i kitẹ, i kitẹ tantu mapulu makitarimakasẹ su tau seng něgělị hadiah ene. Basa Ulangan 16:17, bọu ene bisarai kakiwal᷊o ini:
-
Su tempong i kau nẹ̌tiněna kěbị hal᷊ẹ̌ seng nikoạ i Yehuwa gunang i kau, i kau nawahangsang gunang měgělị apa si Sie?
5. Měgělị pěbawiahẹ̌ si Yehuwa makarěntang lawọ al᷊amatẹ̌
Lawọ taumata mangimang makoạ terkenal, piạ hal᷊ẹ̌ mapaelẹ̌, arau lawọ doitẹ̌ ene sarung makakoạ si sire mal᷊uasẹ̌. Apa ene kahěngang? Putarẹ̌ VIDEONE, bọu ene bisarai manga kakiwal᷊o ini.
-
Maning atlet su video ene sěbạe puluang měnalang balẹ̌, kawe nụe i sie němile něněntang hal᷊ẹ̌ ene?
-
I sie němutusẹ̌ něpakẹ pěbawiahe, bal᷊inẹ gunang měnalang balẹ̌, katewe gunang Yehuwa. Tumuhụ si kau, apa putusange ene nihino? Kawe nụe?
Těntal᷊ang Rasul Paulus bědang tawe nakoạ tau Kristen, i sie něnahusu hal᷊ẹ̌ mapaelẹ̌ tumuhụ kal᷊awokange taumata su tempo ene. I sie něngěndung hukung Yahudi dingangu sěngkatau guru terkenal. Katewe, i sie něněntang kěbị ene tadeạu botonge makoạ tau Kristen. Apa i Paulus nẹ̌sasěsilẹ̌? Basa Filipi 3:8, bọu ene bisarai manga kakiwal᷊o ini:
-
Kawe nụe Paulus naul᷊ị apa seng nikoạe těntal᷊ang bědang tawe nakoạ tau Kristen ene kai ”onasẹ̌”?
-
Ual᷊ingu něněntang kěbị ene, apa nikaěbạ i Paulus?
-
Tumuhụ si kau, kerea mẹ̌tahamawu si Yehuwa mạeng isul᷊ung dingangu hal᷊ẹ̌ bal᷊inẹ su pěbawiahu?
Su tempong i Paulus nakoạ tau Kristen, i sie nakaěbạ limembong lawọ sul᷊ungu apa seng nitěntange
PIẠ U NAUL᷊Ị: ”Měgělị pěbawiahu su Mawu, ene tawe masuẹ̌ su akal᷊ẹ̌.”
-
Tumuhụ si kau, kawe nụe masuẹ̌ su akal᷊ẹ̌ měgělị pěbawiahu si Yehuwa?
RINGKASAN
Kakěndagẹ̌ makawahangsang si kitẹ měgělị pěbawiahẹ̌ si Yehuwa kụ ibaptisẹ̌.
Apa seng nikaěndungangu?
-
Kawe nụe Yehuwa layak makatarimạ kakěndagẹ̌ dingangu ibadang i kitẹ?
-
Al᷊amatẹ̌ apa nighělị i Yehuwa su ělang’E apang seng bọu nibaptisẹ̌?
-
Apa i kau mapulu měgělị pěbawiahu si Yehuwa?
PĚMANDA LAI
Pěmanda kawe nụe sěngkatau měnanalang musikẹ̌ dingangu sěngkatau atlet němile něpakẹ pěbawiahi sire gunang Yehuwa.
Mangangudạ Nẹ̌kiwal᷊o—Apa Sarung Takụ Koateng su Pěbawiahẹ̌ku?—Mẹ̌tahěndung (6:54)
Pěmanda manga hal᷊ẹ̌ apa lai sarung makawahangsang si kitẹ měgělị pěbawiahẹ̌ gunang Yehuwa.
”Kawe Nụe i Kau Měgělị Watangengu si Yehuwa?” (Menara Pengawal, 15 Januari 2010)
Su video musik ini, pěmanda karal᷊uasẹ̌ nikapěndangeng i sire apang něgělị pěbawiahi sire si Yehuwa.
Su běke ”Iạ Sěntiniạ Měkẹ̌kiwal᷊o, ’Gunang Apa i Kitẹ Měbiahẹ̌?’” pěmanda kawe nụe sěngkatau wawine němarikěsa soal u hal᷊ẹ̌ apa nakoạ kahumotongange su pěbawiahe.
”Alkitapẹ̌ Makawal᷊ui Pěbawiahẹ̌” (Menara Pengawal, 1 November 2012)
