LISOMO LYA 46
Juu ya ki Wipeele Kuli Leeza ni Kubatiziiwa?
Uli kwipeela we muine kuli Yehova musita luwamulaya mu lipepo nangue wakaba kuya wamupupasie weene bunke ni kubiika pa ntaanzi kutona kwakue mu buikazi bobe. (Malumbo 40:8) Kisia paapo, wabatiziiwa. Musita luwabatiziiwa, walangilila ku bange nangue wakiipeela kuli Yehova. Bupinguzi bwa kwipeela kuli Yehova, i bupinguzi bwa mana saana butuli twakita mu buikazi bwetu. Bobo bupinguzi bwa mana saana bwakaba kwalulula buikazi bobe. Ni kiki kili kukulengia ukwate bobo bupinguzi?
1. Ni kiki kili kyalengia muntu epeele kuli Yehova?
Kumutona Yehova kuli kwatukinkizia twipeele kuli weene. (1 Yoane 4:10, 19) Bibilia ili yatukinkizia eevi: “Tona Mulopue Leeza obe na mutima obe onse, na mweo obe onse, na maano obe onse pamo ni maka obe onse.” (Marko 12:30) Tuli twalangilila nangue tumutonene Leeza apanasie mu kulanda, inzi kabili kupitila bintu bituli twakita. Nga eveliasie mwalalume ni mwanakazi batoneene saana vibali bafikiila kuupana, kumutona Yehova kuli kwatukinkizia twipeele kuli weene ni kubatiziiwa.
2. Yehova ali wabapeela mpaalo ki Bakasininkizia bakue babatiziiziwe?
Kine wabatiziiwa, wakaba kwaluka mu lupua lwakue Yehova luli ni nsaansa. Kupuako, wakaba kumona vyakutonene mu nzila ingi, kabili wakaba kukila kumupalama kupita viumupaleeme leenu. (Some Malaki 3:16-18.) Yehova wakaba kwaluka Baba obe, kabili wakaba kukukwasia ukabe kwaluka ni balupua ni bankazi ba mu kyalo kyonse batoneene kabili bakutonene. (Some Marko 10:29, 30.) Anzia evio, kuli bintu kampanda biupalile kukita ntaanzi ya kunti ubatiziiwe. Upalile kumumana Yehova, kumutona, ni kumuketekela Yesu. Kupuako, upalile kwipeela kuli Yehova. Kine wakita bebio bintu ni kubatiziiwa, kunti yakitika ukabe kusekelela buikazi loonse musita uli waiza. Bibilia ili yalanda eevi: “Lubatizio luli lwamipususia leenu.”—1 Petro 3:21.
TUKEBE SAANA
Tumone juu ya ki ni kintu kya mana wipeele kuli Yehova ni kubatiziiwa.
3. Fwe bonse tupalile kusaakula wa kunti tubombele
Musita wa kale, Baisraeli bange baali batontonkania nangue kunti bamupupa Yehova ni kooku bali mukumupupa Baali, leeza wa bufi. Inzi Yehova waamutumine kabika Eliya abakwasie kuwaamia malanga abo. Some 1 Makolo 18:21, kisia londoluele keeki kiipuzio:
-
Baisraeli baali bapalile kupingula kukita ki?
Nga evelia Baisraeli, ni fwefue tupalile kusaakula olia utupalile kubombela. Some Luka 16:13, kisia londoluele beebi biipuzio:
-
Juu ya ki teikitika tumupupe Yehova ni kooku twali mukupupa muntu ao kintu kinge?
-
Tuli kukita siani eevi tumulangilile Yehova nangue twasaakula kumupupa weene?
4. Tontonkania bintu bilangiliile nangue Yehova akutonene
Yehova waatupeele bintu bingi byaweeme. Ale fwefue kunti twamupeela ki? Mone VIIDEO.
Ni bintu ki bili mukulangilila nangue Yehova akutonene? Some Malumbo 104:14, 15 ni 1 Yoane 4:9, 10, kisia londoluele beebi biipuzio:
-
Ni bintu ki biupeelue na Yehova biuli kumutasia saana?
-
Bebio bintu biupeelue bili byakulengia umumone siani Yehova?
Musita utuli twapokelela kintu kitutonene saana, tuli twatona kulangilila nangue twamutasia olia watupeelanga. Some Malanguluzi a Mizilo 16:17, kisia londoluele keeki kiipuzio:
-
Kine watontonkania kila kintu kili mukuya kyakupeela Yehova, weewe wakinkiziiwa umupeele ki?
5. Kwipeela kuli Yehova kuli kwaleeta mpaalo ingi
Bantu bengi bamwene nangue kumanika saana, kuya bali ni miilo iweeme ao nfalanga i kuli kwaleeta nsaansa. Eba, keekio ni kisinka? Mone VIIDEO, kisia londoluele beebi biipuzio.
-
Anzia kine ozu muntu ali mu eezi viideo waali watonene saana kusaapa kabumbu, juu ya ki waalekeele?
-
Ozu muntu, waapinguile kwipeela kuli Yehova, apana ku kabumbu. Pa lobe, eba, watontonkania nangue waakitile bupinguzi bwaweeme? Juu ya ki?
Ntaanzi mutumua Paulo aaluke Mukristu, waali wabomba miilo yaali yamulengia amoneke kuya wali muntu akindeeme. Waasambiliile muzilo wa Bayuda ku mwalimu waali wamanikile saana. Inzi, waasiile bebio byonse juu ya kwaluka Mukristu. Eba, Paulo waatendekele kunuuna paantu waasiile bebio bintu? Some Bafilipi 3:8, kisia londoluele beebi biipuzio:
-
Juu ya ki Paulo walanda nangue beelia byaakitile ntaanzi aaluke Mukristu, bibanga byaali “binangua” ao busapia buingi?
-
Inzi, waapatile mpaalo ki?
-
Pa lobe, watontonkania ni kiki kili kuwaamia buikazi bobe, eba, ni kumubombela Yehova ao kukitasie bintu binge mu buikazi bobe?
Paulo lwaalukile Mukristu, waapatile bintu bingi kupita beelia byaasiile ku kyalo
BANGE BALI BALANDA: “Manine nangue keeki i kisinka, inzi nsinaaluke wa kubatiziiwa.”
-
Pa lobe, juu ya ki kwipeela kuli Yehova ni kubatiziiwa ni kwa mana?
MU KIFUPI
Kumutona Yehova i kuli kwalengia twipeele kuli weene ni kubatiziiwa.
Kunti waasuka siani?
-
Juu ya ki tupalile kumutona ni kumupupa Yehova sie na mutima weetu onse?
-
Yehova ali wabapeela mpaalo ki Bakasininkizia bakue babatiziiziwe?
-
Eba, ni weewe utonene kwipeela kuli Yehova?
MANAKO NI BINGE
Mona juu ya ki mwanakazi umo waali waomba miziki, ni mwalalume umo waali wasaapa musaapo wa kulipua, vibaipeele kuli Yehova.
Mona nsaambu inge ili kulengia wipeele kuli Leeza.
“Juu ya ki Wipeele Kuli Yehova?” (Lupungu Lwakue Kamwenenena, lwa 15/01/2010)
Mu eezi viideo ya muziki, mona nsaansa ili na baalia bali baipeela kuli Yehova.
Mu leeli lyasi lilandile “Naakitile Miaka Naiipuzia, ‘Juu ya ki Tuli pa Kyalo?’” mona kyaamulengiizie mwanakazi umo atoosie bintu bya mana mu buikazi bwakue.
“Bibilia Ili Yaalulula Buikazi bwa Bantu” (Lupungu Lwakue Kamwenenena, lwa 01/11/2012)
