LESOGNE 46
Nagnino Rehe ro Toko’e Hanokan-tegna Naho Hatao Badisa?
Manokan-tegna hoahy i Jehovah rehe naho fa mivavake ama’e sady mampitamà aze tie hanompo aze raike avao sady ty zoton’arofo’e ty hatao’o voalohan-draha amy ty fiaigna’o. (Salamo 40:8) Atao badisa rehe afara izay. Ty dika izay, aseho’o amy ty ndaty maro tie nanokan-tegna rehe. Ty fanokanan-tegna hoahy i Jehovah ro fanapahan-kevetse lahibey atao’o amy ty fiaignagne. Hagnova ty fiaigna’o o fanapahan-kevetse lahibey iohoe. Ino ty handrisike azo handrambe o fanapahan-kevetse iohoe?
1. Ino ty mandrisike ty ndaty raike hanokan-tegna?
Ty hateantikagne i Jehovah ty handrisike antikagne hanokan-tegna ho aze. (1 Jaona 4:10, 19) Mandrisike antikagne ty Baiboly tie: “Teao amy ty fo’o naho amy ty tegna’o naho amy ty sai’o vaho amy ty heri’o ty Jehovah Andrianagnahare’o.” (Marka 12:30) Atorontikagne amy ty raha ataontikagne ty hateantikagne an’Andrianagnahare fa tsy atao an-drehake avao. Naho tena mifankatea ty ndaty roe, le manapa-kevetse ty ho mpivaly. Naho fa teantikagne ka ty Jehovah, le manjare te hanokan-tegna ho aze sady te hatao badisa tika.
2. Inogne iaby ty fitahiagne mey i Jehovah ze Vavolombelo’e vita badisa?
Manjare agnisa ty keleia i Jehovah rehe naho fa vita badisa. Ho tsapa’o tie tena tea azo reke sady maro ty fomba ampisehoa’e izay. Vao mainke hifandrambe marine ama’e ka rehe. (Vakio ty Malakia 3:16-18.) Manjare Rae’o ty Jehovah. Manjare hahazo rahalahy naho rahavave magneran-tane ka rehe. Sady tea i Jehovah iareo ro tea azo. (Vakio ty Marka 10:29, 30.) Faie misy raha toko’e hatao’o hey vaho izay rehe azo atao badisa. Tsy maintsy mianatse ty miomba i Jehovah naho tea aze vaho mino i Ana’ey rehe. Fara’e, tsy maintsy manokagne ty fiaigna’o hoahy i Jehovah rehe. Naho manao ireo rehe sady atao badisa naho fa avy eo, le ho agnisa ty ndaty hankamamy o fiaignagneo nainai’e. Hoe ty Saontsin’Andrianagnahare: “Mandrombake anareo ka amy hinane zao ty badisa.”—1 Petera 3:21.
ANDAO HANDINEKE TY PITSOPITSO’E
Hodinehentikagne ato tie nagnino rehe ro toko’e hanokan-tegna hoahy i Jehovah naho hatao badisa.
3. Tsy maintsy mifily tikagne tie ia ty hotompoentikagne
Nieretseretse ty ila’e tamo o Israelita talohao tie sady afake manompo i Jehovah iareo ro afake manompo andrianagnahare diso atao tihoe Bala. Faie nagnirake i Elia ty Jehovah mba hagnitsy iareo. Vakio ty 1 Mpanjaka 18:21, sady iharò midineke ty fagnonteneagne toy:
-
Ino ty safidy tsy maintsy nirambese o Israelitao?
Manahake o Israelitao, le tsy maintsy mifily ka tikagne tie ia ty hotompoentikagne. Vakio ty Lioka 16:13, sady iharò midineke ty fagnonteneagne retoa:
-
Nagnino tikagne ro tsy afake manompo i Jehovah sady hanompo raha hafa?
-
Akore ty ampisehoantikagne amy i Jehovah fa mifily ty hanompo aze tikagne?
4. Saintsaigno ty hatea i Jehovah azo
Maro ty fagnomezagne sarobily nimey i Jehovah antikagne. Ino ka areke ty azontikagne meigne aze? Alefaso i VIDEO oy.
Akore ty fomba nampisehoa i Jehovah fa tea’e rehe? Vakio ty Salamo 104:14, 15 naho ty 1 Jaona 4:9, 10, sady iharò midineke ty fagnonteneagne retoa:
-
Inogne iaby ty fagnomezagne boake amy i Jehovah tena ankasitraha’o?
-
Ino ty tsapa’o naho fa mieretseretse i fagnomezagne rey rehe?
Naho fa mahazo fagnomezagne tena teantikagne tika, le manjare te hankasitrake i nagnomey azey. Vakio ty Deoteronomia 16:17, sady iharò midineke ty fagnonteneagne toy:
-
Ino ty raha tea’o ho meigne i Jehovah naho fa mieretseretse ty raha natao’e tama’o rehe?
5. Mahazo fitahiagne maro tikagne naho fa manokan-tegna
Maro ty ndaty mieretseretse tie sambatse reke naho fa malaza, managne asa soa ndra manam-bola bey. Maregne vao zay? Alefaso i VIDEO oy, sady iharò midineke ty fagnonteneagne retoa.
-
Ndra tie nitea nihisa laboly i lahilahy tamy i video teoy, ino ty nandrisike aze hiala amy izay?
-
Nanapa-kevetse ty hanokan-tegna hoahy i Jehovah reke. Naho ty heve’o, mete vao ty raha natao’e? Ino ty anto’e?
Nikezake hanagne toeragne ambone ty apostoly Paoly taloha ty naha Kristiana aze. Nianatse miomba ty lalàna o Jiosio reke sady mpampianatse malaza ty nampianatse aze. Faie nafoe’e zay satria te hanjare Kristiana reke. Nanegnegne vao reke? Vakio ty Filipianina 3:8, sady iharò midineke ty fagnonteneagne retoa:
-
Nagnino ty Paoly ro nirehake tie hoe “fako mitoborogne” ze raha natao’e taloha ty naha Kristiana aze?
-
Faie ino ty fitahiagne niazo’e?
-
Naho ty heve’o, ho sambatse vao rehe naho manompo i Jehovah fa tsy mampiasa ty fiaigna’o amy ty raha hafa? Ino ty anto’e?
MISY TY MIREHAKE TIE: “Fantako fa io ty hamarenagne faie mbe tsy vognogne hatao badisa raho.”
-
Naho ty heve’o, nagnino ro ara-dalàna naho mifily hanokan-tegna hoahy i Jehovah tikagne?
FAMINTIGNAGNE
Hatea ty mandrisike antikagne hanokan-tegna hoahy i Jehovah naho hatao badisa.
Fameregnagne
-
Nagnino tikagne ro toko’e hanompo i Jehovah sady ho tea aze amy ty fontikagne?
-
Ino ty fitahiagne mey i Jehovah ze Vavolombelo’e vita badisa?
-
Te hanokan-tegna hoahy i Jehovah vao rehe?
FAGNAZAVAGNE FAGNAMPE’E
Ho trea’o ato tie nagnino ty ampela raike mpihira toy naho ty lahilahy mpanao sporo toy ro nanokagne ty fiaigna iareo hoahy i Jehovah.
Fagnontenea o Tanorao—Ino ty Hataoko amy ty Fiaignagne?—Mitantara ty Fiaigna’e Taloha (6:54)
Inogne iaby ty anto’e mahavy antikagne hanokan-tegna hoahy i Jehovah?
“Nagnino Rehe ro Mila Manokan-tegna Hoahy i Jehovah?” (Fitalakesan-davitse 15 Janvie 2010)
Ho trea’o amy ty hira toy fa tena fale o ndaty manokan-tegna hoahy i Jehovah-o.
Nagnino ty ampela raike toy ro nandineke ty raha natao’e voalohan-draha amy ty fiaignagne?
“Magnova Ndaty ty Baiboly” (Fitalakesan-davitse 1 Novambra 2012)