WEKELO 46
Lande na ndjakimɔ ndo batizama?
Wɛ ndjakimɔka le Jehowa lo mbolaka lo dɔmbɛlɔ dia wɛ ayowɔtɛmɔlaka paka ndamɛ ndo ayetshaka lolango lande lo dihole dia ntondo lo lɔsɛnɔ layɛ. (Osambo 40:8) Oma laasɔ, ko wɛ ndjobatizama. Lo nsala ngasɔ, wɛ mɛnyaka anto akina dia wɛ akayakimɔ le Jehowa. Yɛdikɔ ya ndjakimɔ le Jehowa mbele yɛdikɔ ohomba le so. Kakɔna kakoka kotshutshuya dia mbɔsa yɛdikɔ yoleki y’ohomba shɔ?
1. Kakɔna katshutshuya onto dia ndjakimɔ?
Ngandji mbatotshutshuya dia ndjakimɔ le Jehowa. (1 Joani 4:10, 19) Bible tokeketshaka ɔnɛ: “Langa Jehowa Nzambi kayɛ l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.” (Makɔ 12:30) Sho mɛnyaka dia sho nangaka Nzambi aha tsho oma lo kɛnɛ kataso, koko ndo oma lo kɛnɛ kasalaso. Oko wele anto ahende wokana mɛtɛ ngandji mbɔsaka yɛdikɔ ya ntshukana, mbele ndo ngandji kokaso Jehowa totshutshuya dia ndjakimɔ le nde ndo batizama.
2. Ɛtshɔkɔ akɔna washa Jehowa Ɛmɛnyi ande wambobatizama?
Etena kayoyobatizama, wɛ ayokoma ɔtɔi ɔmɔtshi wa lo nkumbo ka Jehowa kele l’ɔngɛnɔngɛnɔ. Wɛ ayɛna ngandji kakokande lo toho efula, ndo wɛ ayoleka ndjasukanya la nde oleki woho wamboyasukanya la nde ɛlɔ kɛnɛ. (Adia Malaki 3:16-18.) Laadiko wa Jehowa monga Ombutshi ayɛ, wɛ ayonga lo nkumbo ka lo nyuma k’anangɛso l’akadiyɛso wawoka ngandji ndo wakoka ngandji. (Adia Makɔ 10:29, 30.) Lo mɛtɛ, wɛ pombaka takola wanya amɔtshi la ntondo ka wɛ batizama. Wɛ pombaka mbeka awui wendana la Jehowa, mbooka ngandji ndo monga la mbetawɔ le Ɔnande. L’ekomelo, wɛ pombaka nkimɔ lɔsɛnɔ layɛ le Jehowa. Naka wɛ ntakola wanya asɔ ndo wɛ batizama, kete wɛ ayonga lo mboka katɔla otsha lo lɔsɛnɔ la pondjo. Ɔtɛkɛta wa Nzambi mbutaka ɔnɛ: “Batisimu . . . tɔ lawɔ kekɔ lo nyoshimbɛ.”—1 Petero 3:21.
NYOMOTSHIMOLA
Enda lande na kele ekɔ ohomba ndjakimɔ le Jehowa ndo batizama.
3. Sho tshɛ pombaka nsɔna onto akɔna ayotokambɛ
L’Isariyɛlɛ w’edjedja, anto amɔtshi wakafɔnyaka dia vɔ kokaka ntɛmɔla Jehowa, ko l’etena kakɔ kaamɛ watɛmɔla Baala, jambizambi ya kashi. Koko Jehowa akatome omvutshi ande Elidja dia taakimanyiya dia vɔ minya kanyi ya kɔlɔ shɔ. Nyadia 1 Nkumi ya dikanga 18:21, ndo oma laasɔ, nyɔkɛtshanya dimbola nɛ:
-
Ɔsɔnwɛlɔ akɔna wakahombe ase Isariyɛlɛ nsala?
L’ɛnyɛlɔ k’ase Isariyɛlɛ, sho pombaka nsɔna onto akɔna ayotokambɛ. Nyadia Luka 16:13, ndo oma laasɔ, nyɔkɛtshanya ambola anɛ:
-
Lande na kele hatohombe tatɛmɔla Jehowa, ko tatɛmɔla onto okina kana ɛngɔ kekina?
-
Ngande wɛnyaso Jehowa dia takasɔnɛ dia mbɔɔtɛmɔla?
4. Kanaka yimba lo ngandji kakoka Jehowa
Jehowa akatosha weshasha efula wa nɛmɔ. Ko sho akokaso mbosha? Nyende VIDƐO.
Naa toho tɔmɔtshi takakɛnya Jehowa ngandji kande? Nyadia Osambo 104:14, 15 ndo 1 Joani 4:9, 10, ndo oma laasɔ, nyɔkɛtshanya ambola anɛ:
-
Naa weshasha ɛmɔtshi w’oma le Jehowa walekayɛ ngɛnangɛna?
-
Weshasha ɛsɔ kokonyaka dia wɛ monga la kanyi ya ngande otsha le Jehowa?
Etena katoshawɔ woshasha ɔmɔtshi walangaso efula, sho nangaka mɛnya lowando laso otsha le onto lotoshawɔ. Nyadia Eohwelo k’Ɛlɛmbɛ 16:17, ndo oma laasɔ, nyɔkɛtshanya dimbola nɛ:
-
Etena kasɛdingolayɛ kɛnɛ tshɛ kakakosalɛ Jehowa, kakɔna katshutshuyamayɛ dia mbosha?
5. Ndjakimɔ mbelaka ɛtshɔkɔ efula
Anto efula fɔnyaka dia lokumu, olimu wa dimɛna, kana falanga mbayowasha ɔngɛnɔngɛnɔ. Onde dui sɔ diekɔ mɛtɛ? Nyende VIDƐO, ndo oma laasɔ, nyɔkɛtshanya ambola wayela anɛ:
-
Kaanga mbele ɔkɛnyi wa mponde wɛnyiso lo vidɛo akalangaka mponde, lande na kakandatshike kɛnyɔ shɔ?
-
Nde akɔshi yɛdikɔ ya ndjasha tshɛ, aha lo mponde, koko le Jehowa. Onde wɛ fɔnyaka dia nde akɔshi yɛdikɔ ya dimɛna? Lande na?
La ntondo k’ɔpɔstɔlɔ Pɔɔlɔ nkoma Okristo, nde akatawesaka olimu wa lokumu. Nde akeke ɛlɛmbɛ w’ase Juda oma le ombetsha ɔmɔtshi wa lokumu. Koko nde akatshike awui asɔ l’ɔkɔngɔ l’oyango wa nkoma Okristo. Onde Pɔɔlɔ akanyange l’ɔtɛ wa kɛnɛ kakandatshike kɛsɔ? Nyadia Filipɛ 3:8, ndo oma laasɔ, nyɔkɛtshanya ambola anɛ:
-
Lande na kakate Pɔɔlɔ dia kɛnɛ tshɛ kakandasale la ntondo ka nkoma Okristo kaki “tota dia mindo”?
-
Ko kakɔna kakandakondja lo dihole dia diangɔ sɔ?
-
Ngande wakokayɛ mbɛdika kambɛ Jehowa la yoho kina tshɛ yakokayɛ nkamba la lɔsɛnɔ layɛ?
Etena kakakome Pɔɔlɔ Okristo, nde akakondja efula ndeka kɛnɛ kakandatshike
ANTO AMƆTSHI MBUTAKA ƆNƐ: “Bu dui dia lomba dia nkimɔ lɔsɛnɔ layɛ le Nzambi.”
-
Ko lande na kele ekɔ ohomba le yɛ dia wɛ ndjakimɔ le Jehowa?
LO TSHENA PE
Ngandji totshutshuyaka dia ndjakimɔ le Jehowa ndo dia batizama.
Ovuswelo
-
Lande na kele Jehowa sunganaka dia sho mboolanga ndo mbɔtɛmɔla l’otema aso tshɛ?
-
Ngande wafuta Jehowa Ɛmɛnyi ande wambobatizama?
-
Onde wɛ nangaka ndjakimɔ le Jehowa?
SALA EYANGELO
Enda lande na kele opomi ɔmɔtshi wa mishiki ndo ɔkɛnyi ɔmɔtshi wa mponde wakasɔnɛ dia ndjakimɔ vɔamɛ le Jehowa.
Ɛlɔngɔlɔngɔ wekɔ lo ndjambola—Kakɔna kayomosala la lɔsɛnɔ lami?—Mbohɔ awui wakete (6:54)
Enda ɛkɔkɔ ekina wahomba ntshutshuya onto dia ndjakimɔ.
“Lande na kahombayɛ ndjakimɔ le Jehowa?” (Tshoto y’Etangelo, Ngɔndɔ ka ntondo 15, 2010)
Lo vidɛo nyɛ yele la mishiki, enda ɔngɛnɔngɛnɔ wonga la wanɛ wayakimɔ le Jehowa.
L’ɔkɔndɔ wata ɔnɛ: “Lakayambola l’edja k’ɛnɔnyi nte: ‘Lande na keso lanɛ la nkɛtɛ?’” enda kɛnɛ kakatshutshuya womoto ɔmɔtshi dia mbeya kɛnɛ kakaleke ohomba lo lɔsɛnɔ lande.
“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka dikumi l’ɔtɔi 1, 2012 lo Falase)
Enda ndo lo...
AMBOLA WALEKA ANTO NDJAOKA
Ngande wasalema wekelo wa Bible walɔmba Ɛmɛnyi wa Jehowa?
Lo ekongelo ka wekelo wa Bible k’ofele kalɔmba Ɛmɛnyi wa Jehowa, wɛ koka nkamba la ekadimwelo tshɛ ka Bible keyɛ la tɔ. Tengengake dia mbelɛ nkumbo k’otondo kana ɔngɛnyi ayɛ tshɛ dia mbɔtɔ kaamɛ la yɛ lo wekelo.
