LĒSONI 46
Ko e Hā Ke Ke Fakatapui Ai pea Hoko ʻo Papitaisó?
ʻOkú ke fakatapui hoʻo moʻuí kia Sihova ʻaki hoʻo palōmesi kiate ia ʻi he lotu te ke lotu kiate ia pē pea fakamuʻomuʻa ʻa hono finangaló ʻi hoʻo moʻuí. (Saame 40:8) Hili iá, te ke hoko leva ʻo papitaiso. ʻI hoʻo fai ení, ʻokú ke fakahaaʻi ai ki he niʻihi kehé kuó ke fai ha fakatapui. Ko e fili ke fakatapui kitautolu kia Sihová ʻa e fili mahuʻinga taha ʻe faifai ange pea tau faí. Ko ha fili mātuʻaki mahuʻinga eni pea ʻe liliu ai hoʻo moʻuí. Ko e hā te ne ueʻi koe ke ke fai ʻa e fili ko ení?
1. Ko e hā te ne ueʻi ha taha ke ne fai ha fakatapui?
Ko ʻetau fakatapui kia Sihová ʻoku ueʻi ia ʻe he ʻofá. (1 Sione 4:10, 19) ʻOku ekinaki mai ʻe he Tohi Tapú: “ʻOfa kia Sihova ko ho ʻOtuá ʻaki ho lotó kotoa pea ʻaki hoʻo moʻuí kotoa pea ʻaki ho ʻatamaí kotoa pea ʻaki ho mālohí kotoa.” (Maʻake 12:30) ʻOku tau fakahaaʻi ʻoku tau ʻofa ki he ʻOtuá ʻo ʻikai ʻaki pē ʻa e meʻa ʻoku tau leaʻakí kae toe pehē foki ki he meʻa ʻoku tau faí. Hangē pē ko ha ongo meʻa ʻokú na feʻofaʻaki moʻoni pea hoko ʻo malí, ko ʻetau ʻofa kia Sihová ʻokú ne ueʻi kitautolu ke fakatapui ʻetau moʻuí kiate ia pea hoko ʻo papitaiso.
2. Ko e hā ʻa e ngaahi tāpuaki ʻoku fakaʻatā mai ʻe Sihova ki heʻene kau Fakamoʻoni ʻosi papitaisó?
ʻI hoʻo hoko ʻo papitaisó, te ke hoko ai ko ha konga ʻo e fāmili fiefia ʻo Sihová. Te ke hokosia leva ʻa e ʻofa ʻa Sihova kiate koé ʻi he ngaahi founga lahi, pea te ke ʻunuʻunu ʻo toe ofi ange ai kiate ia. (Lau ʻa e Malakai 3:16-18.) Tānaki atu ki hoʻo maʻu ʻa Sihova ko hoʻo Tamaí, te ke maʻu ha fāmili ʻo e fanga tokoua mo e fanga tuofāfine takatakai ʻi he māmaní ʻoku nau ʻofa kiate ia pea ʻofa ʻiate koe. (Lau ʻa e Maʻake 10:29, 30.) Ko e moʻoni, kuo pau ke ke muimui ʻi he ngaahi sitepu pau ki muʻa ke ke papitaisó. ʻOku fiemaʻu ke ke ako fekauʻaki mo Sihova, ʻofa kiate ia pea ngāueʻi ʻa e tui ki hono ʻAló. Fakaʻosí, kuo pau ke ke fakatapui hoʻo moʻuí kia Sihova. Kapau te ke muimui ʻi he ngaahi sitepu ko iá pea hoko leva ʻo papitaiso, ʻokú ke ʻi he ʻalunga ke fiefia ʻi he moʻuí ʻo taʻengata. ʻOku pehē ʻe he Folofola ʻa e ʻOtuá: “Ko e papitaisó . . . ʻokú ne toe fakahaofi foki kimoutolu he taimí ni.”—1 Pita 3:21.
KELI LOLOTO ANGE
Sivisiviʻi ʻa e ʻuhinga ʻoku mahuʻinga ai kiate koe ke fai ha fakatapui kia Sihova pea hoko ʻo papitaisó.
3. Ko kitautolu kotoa kuo pau ke tau fili pe ko hai te tau tauhi ki aí
ʻI ʻIsileli ʻo e kuonga muʻá, ko e kakai ʻe niʻihi naʻa nau fakakaukau ʻe lava ke nau lotu fakatouʻosi kia Sihova pea mo e ʻotua loi ko Pēalí. Ka naʻe fekauʻi ʻe Sihova ʻene palōfita ko ʻIlaisiā ke fakatonutonu ʻa e fakakaukau hala ko ení. Lau ʻa e 1 Tuʻi 18:21, pea lāulea leva ki he fehuʻi ko ení:
-
Ko e hā ʻa e fili naʻe pau ke fai ʻe he kau ʻIsilelí?
Hangē ko e kau ʻIsilelí, ko kitautolu foki kuo pau ke tau fili pe ko hai te tau tauhi ki aí. Lau ʻa e Luke 16:13, pea lāulea leva ki he ongo fehuʻi ko ení:
-
Ko e hā heʻikai lava ai ke tau lotu kia Sihova pea toe lotu ki ha taha pe ko ha meʻa kehe?
-
Te tau fakahāhā fēfē kia Sihova ʻoku tau fili ke lotu kiate iá?
4. Fakalaulauloto ki he ʻofa ʻa Sihova ʻiate koé
Kuo ʻomai ʻe Sihova kiate kitautolu ʻa e ngaahi meʻaʻofa fisifisimuʻa lahi. Ko e hā ʻe lava ke tau ʻoatu kiate iá? Huluʻi ʻa e VITIOÓ.
Ko e hā ʻa e ngaahi founga ʻe niʻihi kuo fakahāhā ai ʻe Sihova ʻa e ʻofa ʻiate koé? Lau ʻa e Saame 104:14, 15 mo e 1 Sione 4:9, 10, pea lāulea leva ki he ongo fehuʻi ko ení:
-
Ko e hā ʻa e ngaahi meʻaʻofa meia Sihova ʻokú ke houngaʻia moʻoni aí?
-
ʻOku anga-fēfē hoʻo ongoʻi kiate ia ʻi hoʻo maʻu ʻa e ngaahi meʻaʻofa ko iá?
ʻI heʻetau maʻu ha meʻaʻofa ʻoku tau saiʻia moʻoni aí, ʻoku tau loto ke fakahāhā ʻa e houngaʻia ki he tokotaha naʻá ne ʻomai iá. Lau ʻa e Teutalōnome 16:17, pea lāulea leva ki he fehuʻi ko ení:
-
ʻI hoʻo fakakaukau ki he meʻa kotoa kuo fai ʻe Sihova maʻaú, ko e hā ʻoku ueʻi heni koe ke ke fai maʻaná?
5. Ko hoʻo fakatapuí ʻokú ne ʻomai ʻa e ngaahi tāpuaki lahi
ʻOku tui ʻa e kakai tokolahi ko e ʻiloá, ngāue lelei pe paʻangá te ne ʻai kinautolu ke fiefiá. ʻOku moʻoni ia? Huluʻi ʻa e VITIOÓ, pea lāulea leva ki he ngaahi fehuʻi hokó.
-
Neongo naʻe saiʻia ʻi he soká ʻa e tangata ʻi he vitioó, ko e hā naʻá ne mavahe ai mei aí?
-
Naʻá ne fili ke ʻave hono lelei tahá, ʻo ʻikai ki he soká, ka kia Sihova. ʻOkú ke fakakaukau naʻá ne fai ʻa e fili totonú? Ko e hā hono ʻuhingá?
Ki muʻa ke hoko ʻa e ʻapositolo ko Paulá ko ha Kalisitiané, naʻá ne tuli ki ha ngāue tuʻu-ki-muʻa. Naʻá ne ako ʻa e lao faka-Siú mo ha faiako ʻiloa. Ka naʻá ne liʻaki ia koeʻuhi ke ne hoko ko ha Kalisitiane. Naʻe teitei fakaʻiseʻisa ʻa Paula? Lau ʻa e Filipai 3:8, pea lāulea leva ki he ngaahi fehuʻi ko ení:
-
Ko e hā naʻe pehē ai ʻe Paula ko e meʻa naʻá ne fai ki muʻa ke hoko ko ha Kalisitiané “ko e fuʻu koto kinohaʻa,” pe veve?
-
Ko e hā leva ʻa e meʻa ia naʻá ne maʻú?
-
Ko e hā ʻa e faikehekehe ʻi hoʻo ngāueʻaki hoʻo moʻuí ke tauhi kia Sihová mo ha toe meʻa kehe pē?
ʻI he hoko ʻa Paula ko ha Kalisitiané, naʻá ne maʻu ʻa e meʻa lahi ange ʻi he meʻa naʻá ne liʻakí
ʻOKU PEHĒ ʻE HE NIʻIHI: “ʻOku ou ʻilo ko e moʻoní eni, ka heʻikai lava ke u tukupā ki ai.”
-
Ko e hā ʻokú ke fakakaukau ai ko ha ʻuhinga lelei ke fakatapui hoʻo moʻuí kia Sihová?
FAKANOUNOU
Ko e ʻofá ʻokú ne ueʻi kitautolu ke fakatapui ʻetau moʻuí kia Sihova pea hoko ʻo papitaiso.
Fakamanatu
-
Ko e hā ʻoku tuha ai ʻa Sihova mo ʻetau ʻofa ʻaufuatoó mo e lotú?
-
ʻOku anga-fēfē hono fakapaleʻi ʻe Sihova ʻene kau Fakamoʻoni ʻosi papitaiso?
-
Te ke loto ke fakatapui koe kia Sihova?
AKO LAHI ANGE
Sio ki he ʻuhinga naʻe fili ai ha tokotaha hiva mo ha tokotaha sipoti ke fakatapui kinaua kia Sihová.
ʻEke ʻe he Toʻutupú—Ko e Hā Te U Fai ʻAki ʻEku Moʻuí?—Vakai ki he Kuohilí (6:52)
Fakakaukau ki he toe ngaahi ʻuhinga ke fai ai ha fakatapui.
“Ko e Hā Ke Ke Fakatapui Ai kia Sihová?” (Ko e Taua Leʻo, Sanuali 15, 2010)
ʻI he talanoa “ʻI he Laui Taʻu Naʻá Ku Fifili, ‘Ko e Hā ʻOku Tau ʻi Heni Aí?’” sio ki he meʻa naʻá ne ueʻi ha fefine ke fakakaukau ki he ngaahi meʻa naʻe mahuʻinga taha kiate iá.
“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
