CIIYO 46
Nkaambo nzi Ncomweelede Kulyaaba Akubbapatizyigwa?
Mulalyaaba kuli Jehova mumupailo ikumusyomezya kuti munookomba buyo nguwe alikke, akubikka kuyanda kwakwe mubusena bwakusaanguna mubuumi bwanu. (Intembauzyo 40:8) Mwamana kulyaaba, mulabbapatizyigwa. Kwiinda mukucita boobo, mutondezya bamwi kuti mwakalyaaba. Kusala kulyaaba kuli Jehova nintaamu iiyandika kapati muntu njayelede kubweza. Ncinzi cikonzya kumukulwaizya kusala kubweza ntaamu eeyi iiyandika kapati alimwi iijatikizya buumi bwanu?
1. Ncinzi cikulwaizya muntu kulyaaba kuli Jehova?
Luyando ndolutukulwaizya kulyaaba kuli Jehova. (1 Johane 4:10, 19) Bbaibbele litukulwaizya kuti: ‘Koyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.’ (Marko 12:30) Tulatondezya kuti tulamuyanda Leza ikutali buyo kwiinda muzintu nzyotwaamba pele amuzintu nzyotucita. Mbubwenya musankwa amusimbi ibayandana ncobeni mbobakwatana, andiswe luyando ndotujisi kuli Jehova ndolutukulwaizya kulyaaba akubbapatizyigwa.
2. Nzilongezyo nzi Jehova nzyapa Bakamboni bakwe babbapatizyidwe?
Ciindi nomwabbapatizyigwa, muba cibeela camukwasyi wa Jehova uukkomene. Mpoonya muyoolubona luyando lwakwe munzila zinji, alimwi muyooba acilongwe ciyumu anguwe kwiinda ncomujisi lino. (Amubale Malaki 3:16-18.) Kuyungizya acoolwe ncomujisi cakuti Jehova Mbaauso, muyooba mumukwasyi wakumuuya wabakwesu abacizyi munyika yoonse ibamuyanda Jehova andinywe. (Amubale Marko 10:29, 30.) Nokuba boobo, mweelede kubweza ntaamu zimwi kamutanabbapatizyigwa. Mweelede kwiiya kujatikizya Jehova, kumuyanda, alimwi akusyoma Mwanaakwe. Kumamanino, mweelede kulyaaba kuli Jehova. Kuti mwabweza ntaamu eezyi alimwi akubbapatizyigwa, muyooba munzila iitola kubuumi butamani. Jwi lya Leza lyaamba kuti: “Lubbapatizyo . . . alwalo lulamufwutula lino.”—1 Petro 3:21.
AMWIIYE ZINJI
Atubone mbociyandika kulyaaba kuli Jehova akubbapatizyigwa
3. Toonse tweelede kusala ngotuyanda kukomba
Mu Israyeli yansiku, bantu bamwi bakali kuyeeya kuti bakali kukonzya kukomba Jehova antoomwe aleza wakubeja Baala. Pele Jehova wakatuma musinsimi wakwe Elija kuti akalulamike muzeezo ooyu uutaluzi. Amubale 1 Bami 18:21, akubandika mubuzyo ooyu:
-
Nkusala kuli buti bana Israyeli nkobakeelede kucita?
Mbubwenya mbuli bana Israyeli, toonse tweelede kusala ngotweelede kukomba. Amubale Luka 16:13, akubandika mibuzyo eeyi:
-
Nkaambo nzi ncotutakonzyi kukomba Jehova antoomwe amuntu umwi naa cintu cimwi?
-
Mbuti mbotukonzya kumutondezya Jehova kuti twasala kukomba nguwe?
4. Amuzinzibale kuyeeya luyando ndwajisi Jehova kulindinywe
Jehova wakatupa zipego zibotu zinji. Ino swebo inga twamupa nzi? Atweebelele VIDIYO.
Muunzila nzi Jehova mwaatondezya luyando kulindinywe? Amubale Intembauzyo 104:14, 15 alimwi a 1 Johane 4:9, 10, akubandika mibuzyo eeyi:
-
Nzipego nzi zizwa kuli Jehova nzyomulumba kapati?
-
Ino zipego eezyo zimupa kulimvwa buti?
Kuti twatambula cipego ncotuyanda kapati, inga tulayanda kumulumba ooyo wakatupa. Amubale Deuteronomo 16:17, akubandika mubuzyo ooyu:
-
Kuti mwalanga zintu zyoonse nzyaakamupa Jehova, ncinzi ncomuyanda kumupa?
5. Kulyaaba kuletela zilongezyo zinji
Bantu banji basyoma kuti kuba ampuwo, mulimo mubotu naa mali manji nkokupa lukkomano. Sena masimpe? Atweebelele VIDIYO, akubandika mibuzyo iitobela.
-
Nokuba kuti muntu uuli muvidiyo wakali kukukkomanina kuuma bbola, nkaambo nzi ncaakacileka?
-
Wakasala kulyaaba kuli Jehova, ikutali kuuma bbola. Sena muyeeya kuti wakasala camaano? Nkaambo nzi?
Kataningaba Munakristo, mwaapostolo Paulo wakali kubeleka mulimo uulemekwa. Wakaiya mulawo waba Juda kuzwa kumwiiyi uulaampuwo. Pele wakauleka akuba Munakristo. Sena Paulo wakali kuusa? Amubale Bafilipi 3:8, akubandika mibuzyo eeyi:
-
Nkaambo nzi Paulo ncaakaambila kuti zintu nzyaakacita kataningaba Munakristo wakali kuzibona kuti ‘mafwuse buyo naa zintu zisesemya?
-
Muciindi caboobo, ino ncinzi ncaakajana?
-
Sena kuli cintu cili coonse ncomukonzya kucita mubuumi cikonzya kweezyanisyigwa akubelekela Jehova?
Ciindi Paulo naakaba Munakristo, wakajana zintu zinji kwiinda zyeezyo nzyaakasweekelwa
BAMWI BAAMBA KUTI: “Ndilizyi kuti aaka nkasimpe, pele kwalino tandilibambilide kulyaaba.”
-
Nkaambo nzi ncomuyeeya kuti ncamaano kwaaba buumi bwanu kuli Jehova?
MUBUFWAAFWI
Luyando ndolutupa kulyaaba kuli Jehova akubbapatizyigwa.
Ncinzi Ncomwaiya?
-
Nkaambo nzi Jehova ncayelela kukombwa alimwi akumuyanda amoyo wesu woonse?
-
Mbuti Jehova mbwabalongezya Bakamboni bakwe babbapatizyidwe?
-
Sena inga mwayanda kulyaaba kuli Jehova?
AMUZYIBE ZINJI
Amubone mwiimbi alimwi asikubalika ncobakasalila kulyaaba kuli Jehova.
Bakubusi Balabuzya—Ino Ncinzi Ncondiyoocita Abuumi Bwangu?—Izyakacitika Musyule (6:54)
Amubone twaambo tuyungizyidwe ncomweelede kulyaaba.
“Ino Nkaambo Nzi Ncomweelede Kulyaaba Kuli Jehova?” (Ngazi Yamulindizi, January 15, 2010)
Muvidiyo yanyimbo eeyi, amubone lukkomano ndobajana aabo ibalyaaba kuli Jehova.
Mumakani aajisi mutwe wakuti “Kwamyaka Minji, Ndakali Kulibuzya Kuti, ‘Ino Tuponena Nzi?’” amubone cakapa mukaintu umwi kulanga-langa zintu ziyandika kapati mubuumi bwakwe.
“Ibbaibbele Lilakonzya Kubacinca Bantu” (Ngazi Yamulindizi, November 1, 2012)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
