LESEN 46
Wai na Mi Mas Dediket na Kisim Baptais?
Yu dediket long Jehova taim yu tok promis long em long rot bilong beten olsem yu bai lotuim em wanpela tasol, na putim laik bilong em i stap namba wan long laip bilong yu. (Buk Song 40:8) Bihain yu kisim baptais. Taim yu mekim olsem, yu soim ol narapela olsem yu dediket pinis. Taim yumi mekim disisen long dediket long Jehova, dispela em wanpela bikpela disisen yumi mekim long laip bilong yumi. Wanem samting i kirapim yu long mekim dispela bikpela disisen we bai senisim laip bilong yu?
1. Wanem samting inap kirapim wanpela long dediket?
Pasin laikim i kirapim yumi long dediket long Jehova. (1 Jon 4:10, 19) Baibel i tokim yumi: “Laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu, na long strong olgeta bilong yu.” (Mak 12:30) Yumi soim olsem yumi laikim God long rot bilong toktok bilong yumi, na tu, long ol samting yumi mekim. Man na meri husat i laikim tru narapela narapela tupela i save marit, olsem tasol pasin bilong yumi long laikim Jehova i kirapim yumi long dediket long em na kisim baptais.
2. Jehova i tok long givim wanem blesing long ol man i kisim baptais na kamap Witnes bilong em?
Taim yu kisim baptais, yu bai insait long famili bilong Jehova em ol i stap amamas. Yu bai pilim tru pasin laikim bilong em long kain kain rot, na yu bai go klostu moa long em winim long nau. (Ritim Malakai 3:16-18.) Na tu, Jehova bai stap Papa bilong yu, na yu bai gat ol brata na sista em ol i stap long olgeta hap bilong graun em ol i laikim em na laikim yu tu. (Ritim Mak 10:29, 30.) Tasol yu mas mekim sampela samting paslain long yu kisim baptais. Yu mas kisim save long Jehova, laikim em, na bilip long Pikinini bilong em. Bihain, yu mas dediket long Jehova. Sapos yu mekim pinis ol dispela samting na bihain baptais, yu bai wokabaut long dispela rot i go long laip oltaim. Baibel i tok: ‘Baptais i kisim bek yu long nau.’—1 Pita 3:21.
KISIM SAMPELA SAVE MOA
Skelim wai na em i bikpela samting long yu dediket long Jehova na kisim baptais.
3. Yumi olgeta i mas makim husat yumi bai lotuim
Long Israel bilong bipo, sampela i ting ol inap lotuim Jehova na giaman god Bal wantaim. Tasol Jehova i salim profet Elaija i go stretim tingting kranki bilong ol. Ritim 1 King 18:21, na stori long dispela askim:
-
Ol Israel i makim husat ol bai lotuim?
Olsem ol Israel, yumi tu i mas makim husat yumi bai lotuim. Ritim Luk 16:13, na stori long ol dispela askim:
-
Wai na yumi no inap lotuim Jehova na narapela man o narapela samting wantaim?
-
Olsem wanem yumi ken soim Jehova olsem yumi makim olsem yumi bai lotuim em?
4. Tingim tingim long bel pasin laikim bilong Jehova long yu
Jehova i givim yumi planti gutpela presen. Yumi ken givim wanem samting long em? Pilaim VIDIO.
Wanem sampela rot em Jehova i soim olsem em i laikim yu? Ritim Buk Song 104:14, 15 na 1 Jon 4:9, 10, na stori long ol dispela askim:
-
Wanem sampela presen Jehova i givim em yu amamas tru long en?
-
Ol dispela presen i mekim yu pilim olsem wanem long em?
Taim yumi kisim wanpela presen em yumi laikim tru, yumi laik soim tenkyu bilong yumi long man i givim dispela presen long yumi. Ritim Lo 16:17, na stori long dispela askim:
-
Taim yu skelim olgeta samting Jehova i mekim long yu, dispela i kirapim yu long givim em wanem samting?
5. Taim yu dediket long Jehova yu bai kisim planti blesing
Planti i bilip olsem biknem, gutpela wok, o mani bai mekim ol i amamas. Yu ting dispela em tru? Pilaim VIDIO, na stori long ol dispela askim.
-
Maski dispela soka pleia i laikim tru soka, wai na em i lusim?
-
Em i mekim disisen long dediketim em yet long Jehova, i no long soka. Yu ting em i mekim rait disisen? Bilong wanem?
Paslain long aposel Pol i kamap Kristen, em i wok strong long kisim wanpela wok i gat bikpela namba. Wanpela tisa i gat biknem i skulim em long ol lo bilong ol Juda. Tasol em i lusim dispela bilong kamap wanpela Kristen. Yu ting Pol i rigret long disisen bilong em? Ritim Filipai 3:8, na stori long ol dispela askim:
-
Wai na Pol i tok ol samting em i mekim paslain long em i kamap Kristen ol i “olsem pipia nating”?
-
Taim em i mekim olsem, em i kisim wanem samting?
-
Yu ting laip bilong yu bai gutpela sapos yu mekim disisen long mekim wok bilong Jehova? Wai na yu ting olsem, o wai na yu ting nogat?
Taim Pol i kamap wanpela Kristen, em i kisim planti samting moa winim ol samting em i bin lusim
SAMPELA MAN I TOK: “Mi save dispela em tok i tru tasol mi no redi long kisim baptais.”
-
Wai na yu ting i stret long dediket long Jehova?
OL BIKEPLA POIN
Pasin laikim i kirapim yumi long dediketim yumi yet long Jehova na kisim baptais.
Riviu
-
Wai na i stret yumi givim bel olgeta long Jehova na lotuim em?
-
Jehova bai givim wanem blesing long ol man i kisim baptais na kamap Witnes bilong em?
-
Yu laik dediketim yu yet long Jehova?
MEKIM WOK PAINIMAUT
Lukim wai na wanpela singa na wanpela man i save pilai futbol i mekim disisen long dediket long Jehova.
Askim Bilong Ol Yangpela—Bai Mi Mekim Wanem Long Laip Bilong Mi?—Tingim Bek (6:54)
Skelim sampela risen moa na man i mas dediket long God.
“Bilong Wanem Yu Mas Dediket Long Jehova?” (Wastaua, Janueri 15, 2010)
Long dispela musik vidio, lukim amamas bilong ol man husat i dediketim ol yet long Jehova.
Long stori “Inap Planti Yia Mi Bin Tingting Olsem, ‘I Gat Wanem As na Yumi Stap?,’” lukim wanem samting i kirapim wanpela meri long skelim wanem samting i bikpela samting long laip bilong em.
“Baibel i Save Senisim i Stap Bilong Man” (Wastaua, Novemba 1, 2012)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
