JORHENGUARHIKUA 46
¿Andichisï jatsi para aiakukuarheni Tata Diosïni ka itsï atakuarhini?
Enga nema aiakukuarhejka Tata Diosï Jeobani, aiakusïndi kómarhikua ma jimbo eska imantkusï kómarhiaka ka eska sánderu jukaparhakua ambe imeeri irekuarhu jindeuaka úni ambe enga Tata Diosï uékajka (Salmo 40:8). Tátsekua itsï atakuarhisïndia ka ini ambe jingoni xarhatasïndi eska aiakukuarheskia Tata Diosïni. Sánderu jukaparhakua ambe engachi erakuaka úni jindeesti aiakukuarheni Jeobani. Xáni jukaparhakuesti i ambe enga mójtakujka juchaari irekuani. ¿Ambeksïni jarhuataa parajtsï chájtu ísï úni?
1. ¿Ambe úsïni eskachi uékaaka aiakukuarheni Tata Diosïni?
Uékperakua jindeesti enga újka eskachi uékaaka aiakukuarheni Tata Diosï Jeobani (1 Juanu 4:10, 19). Bibliajtsïni arhisïndi: “Xéncha chiiti Tata Diosï Jeobani iámu chiiti mintsita jingoni, iámu chiiti alma jingoni, iámu chiiti eratsekua jingoni ka iámu chiiti uinhapikua jingoni” (Marcos 12:30, TNM). Xarhatasïngachi eskachi uékasïnga Tata Diosï Jeobani imani ambe jingoni engachi uandajka ka úni. Májkueni eska uátsï ka tumbi ma engaksï meru xénchperajka na eratsejka tembuperani, engachi juchajtu meru xénchajka Tata Diosï Jeobani uékasïngachi aiakukuarheni imani ka itsï atakuarhini.
2. ¿Náki kóntperatechani íntsaasïni Jeoba imeeri testiguechani engaksï itsï atakuarhijkia?
Engajtsï chá itsï atakuarhiakia, Tata Diosï Jeobaeri familia jingontsï kuenta úkuarhiakia engaksï kánikua tsípikua jingoni irekaka. Jiántsï pʼikuarheraaka na engaksïni xáni xénchajka Tata Diosï ka ístujtsï sánderu andarhieraaka imani (arhinta je Malaquías 3:16-18). Tata Diosï Jeoba jindeuati chaari Taati, ka sésijtsï pʼikuarheraaka kúnguarhikua ma jimbo jarhani engaksï interu parhakpinirhu anapu erachicha jaka engaksï xénchajka Tata Diosïni ka ístu chánksïni (arhinta je Markusʌ 10:29, 30). Joperu, ante dejtsï itsï atakuarhini, chájtsï jatsiska para úni máru ambe. Jatsiskajtsï para míteni Tata Diosï Jeobani, xénchani ka xarhatani eskajtsï jakajkusïnga imeeri Uájpani. Ka tátsekuajtsï, aiakuakia Jeobani eskajtsï uékasïnga méntkisï marhuakuni imani. Engajtsï úska ini ambe ka tátsekuajtsï itsï atakuarhini uaakajtsï tsípikua jingoni irekani para méntkisï. Tata Diosïri Karakata uandasïndi: ‘Bautismu, indejtsïni májku jásï pʼímutantasïndi’ (1 Pedru 3:21).
JORHENGUARHI JE SÁNDERU AMBE
Ju je exeni andisï xáni jukaparhakue eskajtsï aiakukuarheaka Tata Diosïni ka itsï atakuarhini.
3. Iáminduechachi jatsiska para erakuni nénchi marhuakua
Ióntki Israeli, máruksï eratsesïreendi eskaksï úpiringa Tata Diosï Jeobani kómarhini ka ístu diosï no jurhimbiti Baalini. Peru Jeoba axaspti imeeri profeta Elíasini para aianguani eska inde ambe no sési jarhaspka. Arhinta je 1 Reyes 18:21 ka uandontskuarhi je íri ambe:
-
¿Ambeksï jatsispi para erakuni úni israelitecha?
Májkueni eskaksï israelitecha, juchajtuchi jatsiska para erakuni nénchi marhuakua. Arhinta je Lukasʌ 16:13 ka uandontskuarhi je íri ambe:
-
¿Andichisï no uaa Tata Diosï Jeobani kómarhini ka ístu máteru nemani o máteru ambeni?
-
¿Ambechi uaa úni paraka Jeoba exeaka eskachi eratsetixakaia imani marhuakuni?
4. Eratsenta je na engaksïni xáni uékajka Jeoba
Jeobajtsïni uánikua ambakiti ambe íntskustia. ¿Ka juchachi ambe uaa íntskuni? Exe je BIDEUNI.
¿Nénaksïni xarhatacheskia Tata Diosï Jeoba eskaksïni xénchasïnga? Arhinta je Salmo 104:14, 15 ka 1 Juanu 4:9, 10, ka uandontskuarhi je íri ambe:
-
Iámindu ambeeri engaksïni Tata Diosï íntskukia, ¿ambejtsï sánderu jukaparharasïni?
-
¿Ambejtsï pʼikuarherasïni Tata Diosï jimbo engajtsï eratsentajka ambe engaksïni xáni íntskukia?
Engajtsïni nema intsïkuarhijka ambe ma engachi kánikua tsitijka, uékasïngachi eska míteaka eskachi kánikua jukaparharasïnga. Arhinta je Deuteronomio 16:17 ka uandontskuarhi je íri ambe:
-
Engajtsï eratsentajka ambe engaksïni xáni íntskukia Tata Diosï Jeoba, ¿uékasïntsï íntskuni ambe ma imani? ¿Ambejtsï íntskupirini?
5. Engachi aiakukuarhejka Tata Diosïni imajtsïni uánikua ambe kóndesïndi
Uánikua kʼuiripuechaksï eratsesïndi eskaksï sési irekaaka engaksï mítekateuaka, engaksï jatsiaka karrera ma o sentabu. ¿Peru i ambe ísïiski? Exe je BIDEUNI ka uandontskuarhi je íri ambe:
-
Nájkiruka kánikua tsitienga futboli chʼanani i kʼuiripu enga bideurhu xarharajka, ¿andisï jurajkupi imeeri karrerani?
-
Ima erakusti Tata Diosï Jeobani marhuakuni ka no futboli chʼanani, ¿exesïntsï eska sési jarhaska ambe enga erakupka úni? ¿Andi?
Apostoli Pablu ante de kristianu úkuarhini ambakiti karrera ma jatsispti. Imeeri jorhentpiri enga judiuecheri juramukuechani jorhendaapka kánikua mítekatespti. Peru iámindu ambe jurajkuspti para kristianu úkuarhini, ¿pʼamondakuarhisïreeni ini ambe jimbo? Arhinta je Filipusʌ 3:8 ka uandontskuarhi je íri ambe:
-
¿Andisï Pablu uandapi eska ísï exesïreenga eska “basura” imani ambe enga jiáni úpka ante de kristianu úkuarhini?
-
¿Ambe intsïnhaspti enga jurajkupka indeni ambe?
-
¿Exesïntsï eskajtsï sánderu sési irekaaka engajtsï niáraska Tata Diosï Jeobani marhuakuni? ¿Andijtsïsï ísï eratsejki?
Enga Pablu kristianu úkuarhipka sánderu ambe andaspti ka eska enga jurhajkupka.
MÁRUKSÏ I AMBE UANDASÏNDI: “Ísku tiempu tsïtakuesti úrani chiiti tsípikuani para Tata Diosïni marhuakuni”.
-
¿Exesïntsï eska sési jarhaska úrani juchaari tsípikuani para Tata Diosï Jeobani marhuakuni? ¿Andijtsïsï ísï eratsejki?
AMBE ENGACHI JORHENGUARHIKA
Xénchani Tata Diosï Jeobani úsïndi eskachi aiakukuarheaka imani ka itsï atakuarhini.
Ambejtsï jorhenguarhiski
-
¿Andisï Tata Diosï Jeoba jukancha eskachi iámu mintsita jingoni xénchaaka ka eskachi imantku kómarhiaka?
-
¿Ambe íntsaasïni Tata Diosï Jeoba imeechani engaksï itsï atakuarhijkia?
-
¿Tsitipirintsï aiakukuarheni Tata Diosï Jeobani?
ÍSTU EXE JE INI AMBE
Exe je andisïksï niárapi aiakukuarheni Tata Diosïni i kʼuiripuecha: ma enga pireenga ka máteru enga deportisteepka.
Jorhenguarhi je sánderu ambe andichisï jatsi para aiakukuarheni Tata Diosï Jeobani.
“¿Andichisï jatsi para aiakukuarheni Tata Diosï Jeobani?” (Aianhpiri, 15 de eneru de 2010)
Exe je ini bideu jimbo, na engaksï xáni sési pʼikuarherajka imeecha engaksï aiakukuarhekia Tata Diosï Jeobani.
Parajtsï míteni andisï uarhiiti ma sési eratsentapi ambe enga sánderu jukaparhakueka para ima, arhinta je eksperiensiani “Iónisï kurhamarhikuarhispkia andichisï ixú jaki”.
“Biblia jarhuataasti mójtakuni irekua” (Aianhpiri, 1 de nobiembri de 2012)
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
