SAMBIRO 46
Chifukwa Wuli Mukwenera Kujipeleka na Kubatizika?
Munthu wakujipeleka kwa Yehova mu lurombo na kumulayizga kuti wasopenge iyo pera na kudangizga khumbo lake. (Salimo 40:8) Kufuma apo, ndipo wakubatizika. Para munthu wabatizika, wakulongora pakweru kuti wali kujipeleka kwa Yehova. Kujipeleka kwa Yehova ntchinthu chakuzirwa chomene icho munthu wakwenera kusankha pa umoyo wake. Kasi ntchivichi chingapangiska munthu kuti wasankhe kujipeleka kwa Yehova?
1. Kasi ntchivichi chikutuma munthu kuti wajipeleke?
Tikujipeleka kwa Yehova chifukwa chakuti tikumutemwa chomene. (1 Yohane 4:10, 19) Baibolo likutichiska kuti: “Utemwenge Yehova Chiuta wako na mtima wako wose na umoyo wako wose na maghanoghano ghako ghose na nkhongono zako zose.” (Mariko 12:30) Ivyo tikuchita na kuyowoya vikwenera kulongora kuti tikutemwa Chiuta. Nga umo chitemwa chikutumira ŵanthu awo ŵali pa chibwezi kuti ŵatorane, mwakuyana waka, chitemwa ndicho chikutuma munthu kuti wajipeleke kwa Yehova na kubatizika.
2. Kasi Yehova wakuŵatumbika wuli Ŵakaboni ŵake awo ŵabatizika?
Para munthu wabatizika, wakuŵa mu banja lakukondwa la Yehova. Wakujiwonera yekha umo Yehova wakulongolera kuti wakumutemwa mu nthowa zakupambanapambana, ndipo ivi vikovwira kuti waŵe paubwezi wakukhora chomene na iyo. (Ŵazgani Malaki 3:16-18.) Yehova wakuŵa Dada winu, ndipo mukuŵa mu mbumba yake ya pa charu chose iyo ŵanthu ŵake ŵakutemwana chomene. (Ŵazgani Mariko 10:29, 30.) Kweni pali vinthu vinyake ivyo munthu wakwenera kuchita kuti wabatizike. Wakwenera kusambira vya Yehova, kumutemwa, kweniso kuŵa na chipulikano mwa Mwana wake. Kufuma apo, ndipo munthu wangajipeleka kwa Yehova. Para mwachita vyose ivi na kubatizika, mbwenu muzamukondwa na umoyo kwamuyirayira. Mazgu gha Chiuta ghakuti: “Ubatizo ndiwo . . . ukumuponoskani sono.”—1 Petrosi 3:21.
MANYANI VINANDI
Manyani uwemi wakujipeleka kwa Yehova na kubatizika.
3. Waliyose wakwenera kusankha uyo wamuteŵeterenge
Ŵaisrayeli ŵanyake ŵakaghanaghananga kuti munthu wangasopa Yehova na chiuta mutesi, Baala. Kweni Yehova wakatuma ntchimi yake Eliya, kuti yiphalire ŵanthu aŵa kuti ivyo ŵakuchita mbunyankhasi. Ŵazgani 1 Mathemba 18:21, kufuma apo dumbiskanani fumbo ili:
-
Kasi Ŵaisrayeli ŵakeneranga kusankha vichi?
Nga Mbaisrayeli, nase tikwenera kusankha uyo timuteŵeterenge. Ŵazgani Luka 16:13, kufuma apo dumbiskanani mafumbo agha:
-
Chifukwa wuli vingachitika yayi kuti munthu wateŵetere Yehova na ŵachiuta ŵanyake nyengo yimoza?
-
Kasi tingalongora wuli kuti tasankha kuteŵetera Yehova?
4. Ghanaghanirani chitemwa cha Yehova
Yehova watipa vyawanangwa vinandi chomene chifukwa chakuti wakutitemwa. Kasi ise tingamupa vichi? Wonelerani VIDIYO.
Kasi ni nthowa wuli zinyake izo Yehova wakulongolera kuti wakumutemwani? Ŵazgani Salimo 104:14, 15 na 1 Yohane 4:9, 10, kufuma apo dumbiskanani mafumbo agha:
-
Pa vyawanangwa ivyo Yehova watipa, kasi ni ntchi icho mukukondwa nacho chomene?
-
Kasi vyawanangwa ivi vikumupangiskani kuti mumuwonenge wuli Yehova?
Para munthu watipa chawanangwa icho tikuchitemwa chomene, tikumuwonga kufumira pasi pa mtima. Ŵazgani Dotoronome 16:17, kufuma apo dumbiskanani fumbo ili:
-
Kasi mungamupa vichi Yehova para mukughanaghanira vyose ivyo wamuchitirani?
5. Munthu wakutumbikika chomene para wajipeleka kwa Yehova
Ŵanthu ŵanandi ŵakughanaghana kuti ŵangaŵa ŵakukondwa para mbakumanyikwa, ŵali pa ntchito yapachanya kweniso para ŵali na ndalama zinandi. Kasi uwu mbunenesko? Wonelerani VIDIYO, kufuma apo dumbiskanani mafumbo agha.
-
Nangauli munthu uyo mwangumuwona mu vidiyo iyi, wakakhumbanga kuŵa nkhwantha pa bola, kweni chifukwa wuli wakasintha maghanoghano?
-
Iyo wakasankha kujipeleka kwa Yehova, m’malo mwa kujipeleka ku bola. Kasi mukughanaghana kuti wakasankha mwamahara? Chifukwa wuli?
Pambere mpositole Paulosi wandaŵe Mkhristu wakakhumbanga kuŵa wakutchuka. Iyo wakasambizgika dango la Chiyuda na msambizgi wakumanyikwa chomene. Kweni wakaleka vyose ivi na kuŵa Mkhristu. Kasi Paulosi wakadandawurapo chifukwa cha ivyo wakasankha? Ŵazgani Ŵafilipi 3:8, kufuma apo dumbiskanani mafumbo agha:
-
Chifukwa wuli Paulosi wakayowoya kuti ivyo wakachitanga pambere wandaŵe Mkhristu vikaŵa “viswaswa,” panji vyakunkhando?
-
Kasi wakatumbikika wuli chifukwa cha ivyo wakasankha?
-
Kasi mukughanaghana kuti ntchinthu wuli icho mungachiyaniska na kuteŵetera Yehova?
Paulosi wati waŵa Mkhristu wakatumbikika chomene
IVYO ŴANYAKE ŴAKUYOWOYA: “Ntchambura mahara kujipeleka kwa Chiuta.”
-
Chifukwa wuli mukuwona kuti ntchamahara kujipeleka kwa Yehova?
MWAKUDUMURA
Chitemwa ndicho chikutituma kuti tijipeleke kwa Yehova na kubatizika.
Kuweleramo
-
Chifukwa wuli tikwenera kumutemwa Yehova na kumusopa na mtima wose?
-
Kasi Yehova wakuŵatumbika wuli Ŵakaboni ŵake awo ŵabatizika?
-
Kasi namwe mungatemwa kuti mujipeleke kwa Yehova?
SANGANI FUNDO ZAKUSAZGIKIRA
Wonani ivyo vikapangiska kuti wakwimba na munyake uyo wakatemwanga kuchimbira, ŵasankhe kujipeleka kwa Yehova.
Ŵachinyamata Ŵakufumba—Kasi Nichitengechi na Umoyo Wane?—Pasono Nkhudandawura Yayi (6:54)
Wonani vinyake ivyo vingapangiska munthu kuti wajipeleke kwa Yehova.
“Chifukwa Wuli Mukwenera Kujipatulira kwa Yehova?” (Gongwe la Mulinda, Janyuwale 15, 2010)
Mu vidiyo iyi, wonani umo ŵanthu awo ŵali kujipeleka kwa Yehova ŵakukondwera.
Mu nkhani ya mutu wakuti “Kwa Vilimika Vinandi Nkhajifumbanga Kuti, ‘Chifukwa Wuli Tili na Umoyo?’” wonani ivyo vikawovwira mwanakazi munyake kumanya ivyo ni vyakuzirwa chomene pa umoyo wake.
“Baibolo Likusintha Umoyo wa Ŵanthu” (Gongwe la Mulinda, Novembala 1, 2012)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
