LECCIÓN 46
¿Bin yuʼun ya skʼan ya kakʼ jbatik ta stojol Dios sok ya kichʼtik jaʼ?
Te kʼalal ay machʼa ya yakʼ sba ta stojol te Jehová, ya yalbey ta jamal ta swenta jun oración te jaʼnax ya yichʼ ta mukʼ sok te jaʼ mukʼ skʼoplal ta yoʼtan spasbeyel te skʼanojel yoʼtane (Salmo 40:8). Ta swenta te ya yichʼ jaʼe, ya yakʼ ta ilel te yakʼojix sba ta stojol te Diose. Te bin kʼax mukʼ skʼoplal ya jtatik ta nopel spasel ta jkuxlejaltik jaʼ te ya kakʼ jbatik ta stojol te Jehovae. Jaʼ ini, yame sjeltay te jkuxlejaltik. ¿Bin ya stijbat awoʼtan yuʼun ya awakʼ aba ta stojol te Diose?
1. ¿Bin ya stij koʼtantik yuʼun ya kakʼ jbatik ta stojol te Jehová?
Te skʼuxul koʼtantik ta stojol te Jehová jaʼ ya stij koʼtantik yuʼun ya kakʼ jbatik ta stojol (1 Juan 4:10, 19). Te Biblia jich ya yal: «Kʼuxme xa awaʼiy ta awoʼtan te Jehová te Dios awuʼun ta spisil awoʼtan, ta spisil akuxlejal, ta spisil apʼijil sok ta spisil awip» (Marcos 12:30, TNM). Yame xchiknaj te kʼux ta koʼtantik te Jehová ta swenta te bin ya kaltik sok te bin ya jpastike. Jich te bitʼil jtul kerem sok jtul achʼix ya xnujpunik yuʼun te kʼux ya yaʼiy sbaike, jaʼnix jich te joʼotike ya kakʼ jkuxlejaltik ta stojol te Jehová sok ya kichʼtik jaʼ, melel kʼux ta koʼtantik.
2. ¿Bintik bendición staojik te machʼatik yichʼojikix jaʼe?
Te kʼalal ya awichʼ jaʼe, ya x-ochat ta sfamilia te Jehová te banti ay bayal tseʼel oʼtanil. Jichme ya awil te skʼuxul yoʼtan te Jehová sok nopolxan ya awaʼiy aba ta stojol (kʼopona Malaquías 3:16-18). Ma jaʼuknax jich ya xkʼot bin-utʼil aTat te Jehovae, jaʼnix jich yame ata bayal awermanotak ta swolol Balumilal te kʼux ta yoʼtanik te Jehová jich bin-utʼil te jaʼate (kʼopona Marcos 10:29, 30). Ayme bintik ya skʼan ya apas yuʼun ya awichʼ jaʼ, yame skʼan ya anaʼbey sba te Jehová sok te kʼuxuk ta awoʼtane, sok ya skʼan ya awakʼ ta ilel te ay schʼuunel awoʼtan ta stojol te sNichʼane. Jaʼnix jich ya skʼan ya awalbey te Jehová te ya awakʼ akuxlejal ta stojole. Teme ya apas spisil ini sok ya awichʼ jaʼ, yame amulan te kuxinel ta sbajtelkʼinal. Te Biblia jich ya yal: «Te ichʼ-haʼ [...] ya xcolotic yuʼun» (1 Pedro 3:21).
JNOPTIKXAN TA LEK
Kiltik bin yuʼun mukʼ skʼoplal te ya awakʼ aba ta stojol te Jehová sok te ya awichʼ jaʼe.
3. Yame skʼan ya jtsatik machʼa ya x-abatinotik ta stojol
Ta namey lum Israel, ay machʼatik ya skuyik-a te ya xjuʼ ya yichʼik ta mukʼ te Jehová soknix te lotil dios Baal. Pero chʼayemik-a, jaʼ yuʼun te Jehová la stikun te j-alwanej Elías yuʼun ya stojobteslan. Kʼoponaik 1 Reyes 18:21 sok albeyaik skʼoplal ini:
-
¿Bin-a te puersa la skʼan la staik ta nopel te israeletike?
Jaʼnix jich te joʼotike, ya skʼan ya jtatik ta nopel machʼa ya kakʼ jbatik ta abatinel ta stojol. Kʼoponaik Lucas 16:13 sok albeyaik skʼoplal ini:
-
¿Bin yuʼun ma xjuʼ te cheʼoxeb te machʼa ya kichʼtik ta mukʼ?
-
¿Bin-utʼil ya kakʼbeytik yil te Jehová te jaʼ ya kichʼtik ta mukʼe?
4. Nopa awaʼiy te jayebto kʼuxat ta yoʼtan te Jehová
Bayal bin yakʼojbotik te Jehovae. Jaxan te joʼotike, ¿bin ya xjuʼ ya kakʼbeytik-euk? Ilawilik te VIDEO.
¿Bintik-utʼil yakʼojbat awil te skʼuxul yoʼtan te Jehová? Kʼoponaik Salmo 104:14, 15 sok 1 Juan 4:9, 10, sok albeyaik skʼoplal ini:
-
¿Bintik yakʼojbat te Jehová te bayal ya awal wokol yuʼune?
-
Kʼalal ya awil te bintik yakʼojbat te Jehovae, ¿bin yaʼiyel ya awaʼiy aba ta stojol?
Kʼalal ay machʼa ya yakʼbotik jmajtantik te mero ya jmulantike, koʼtantik te ay bin ya jpastik yuʼun ya kalbeytik wokol. Kʼoponaik Deuteronomio 16:17 sok albeyaik skʼoplal ini:
-
Kʼalal ya anop awaʼiy te bintik yakʼojbat te Jehovae, ¿jichbal ya awaʼiy te ay bin ya akʼan ya awakʼbey-euke? ¿Bin ya akʼan ya awakʼbey?
5. Bayal bendición ya ata te kʼalal ya awakʼ aba ta stojol te Jehová
Bayal ants winiketik ya skuyik te jaʼ ya x-akʼbot stseʼelil yoʼtanik te naʼbil sbaik ta lek, te snopojik lek jun o te bayal stakʼinike. Pero ¿melelbal-abi? Ilawilik te VIDEO sok albeyaik skʼoplal ini:
-
Manchukme kʼaxto ya smulan-a te fútbol, ¿bin yuʼun la yijkitay?
-
Jaʼ la yakʼbey Jehová te skuxlejal ma jaʼuk te fútbol. ¿Yabal awal te lek te bin la sta ta nopele? ¿Bin yuʼun?
Te kʼalal mato ochem ta jnopojel-a te jpuk-kʼop Pabloe snopoj ta lek jun-a te ya xjuʼ ya sta lek yaʼtel yuʼune. Melel nojptesot yuʼun jtul maestro yuʼun te ley judío. Pero la yijkitay yuʼun ya x-och ta jnopojel yuʼun Cristo. ¿Labal smel yoʼtan yuʼun te bin la yijkitaye? Kʼoponaik Filipenses 3:8 sok albeyaik skʼoplal ini:
-
¿Bin yuʼun te Pablo jich la yil «bin utʼil cʼaʼpal» te bintik la yijkitaye?
-
¿Bin majtanil la sta yuʼun te ay bin la yijkitaye?
-
¿Yabal xlekub te akuxlejal teme ya awakʼ aba ta abatinel ta stojol te Jehová? ¿Bin yuʼun te jich ya awale?
Kʼalal och ta jnopojel yuʼun Cristo te Pabloe, bayal bendición la sta.
AY MACHʼATIK JICH YA YALIK: «Maʼyuk bin ya xlokʼ awuʼun-a te ya awakʼ akuxlejal ta stojol te Diose».
-
Jaxan te jaʼate, ¿jichbal ya anop-euk? ¿Bin yuʼun?
¿BINTIK LA JNOPTIK?
Te skʼuxul koʼtantik ta stojol te Jehová ya stij koʼtantik yuʼun ya kakʼ jbatik ta stojol sok ya kichʼtik jaʼ.
¿Jilbal ta awoʼtan into?
-
¿Bin yuʼun snujpʼ te ya kichʼtik ta mukʼ te Jehová sok te kʼux ta koʼtantike?
-
¿Bintik bendición ya yakʼbey te Jehová te machʼatik yichʼojikix jaʼe?
-
¿Yabal akʼan ya awakʼ aba ta stojol te Jehovae?
YA XJUʼ YA ANOPXAN INI
Ilawil bin yuʼun la yakʼ sbaik ta stojol te Jehová jtul ants te ya xkʼayojin-ae sok jtul winik te ya xtajin-ae.
Ilawil bintik yuʼun ya skʼan ya kakʼ jbatik ta stojol te Jehová.
«¿Bin yuʼun ya kakʼ jbatik ta stojol te Jehová?» (Te J-ilkʼinal ta toyol, 15 yuʼun enero 2010)
Ilawil ta kʼayoj ini te stseʼelil yoʼtanik te machʼatik ya yakʼ sbaik ta stojol te Jehová.
Ilawil bin tijbot yoʼtan jtul ants ta yilel teme jaʼ lek te bin yak ta spasele, kʼopona te bin kʼax ta skuxlejal: «Bayal jaʼbil la jojkʼoybey jba bin yuʼun te kuxulotike».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun noviembre 2012)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
