OCIPAMA 46
Momo Lie o Sukilila Oku Litumbika Loku Papatisiwa?
Ove o litumbika ku Yehova poku likuminya kokuaye vohutililo yimue okuti, eye lika o fendela kuenda oku pitisa kovaso ocipango caye komuenyo wove. (Olosamo 40:8) Noke o papatisiwa. Poku ci linga, o lekisa komanu vakuavo okuti, wa litumbika. Oku litumbika ku Yehova, yimue pokati kolonjila via velapo tu pondola oku nõla. Nye ci ku vetiya oku nõla onjila yaco haiyo yi pongolola omuenyo wove?
1. Nye ci vetiya omunu oku litumbika?
Tu litumbika ku Yehova omo liocisola. (1 Yoano 4:10, 19) Embimbiliya li tu vetiya hati: “Sola Yehova Suku yove lutima wove wosi, lomuenyo wove wosi, lolondunge viove viosi kuenda longusu yove yosi.” (Marko 12:30) Ka tu lekisa lika okuti tu sole Suku kovina tu popia, pole, tu ci lekisavo kovina tu linga. Ndeci ci pita lomanu vavali va namũlala kuenje va tokekisa olohuela omo liocisola, ocisola tu kuetele Yehova, ci tu vetiya oku litumbika kokuaye loku papatisiwa.
2. Asumũlũho api Yehova a eca Kolombangi viaye via papatisiwa?
Eci o papatisiwa, o panga onepa kepata lia sanjuka lia Yehova. Ove o ka limbuka ocisola a ku kuetele volonjila via litepa kuenda o ka kuata ukamba wa pama laye okuti, cilo ci sule. (Tanga Malakiya 3:16-18.) Handi vali, Yehova o linga Isiove, ove o kuata epata konepa yespiritu okuti vamanji va kasi voluali luosi, vana va sole Yehova haivo va ku kuetelevo ocisola. (Tanga Marko 10:29, 30.) Ocili okuti, osimbu kua papatisiwile, o sukila oku eca ananga amue. O sukila oku lilongisa catiamẽla ku Yehova, oku u sola kuenda oku kolela Omõlaye. Oku sulako, tumbika omuenyo wove ku Yehova. Eci weca ananga aco loku papatisiwa, o kuata elavoko lioku sanjukila oku kala komuenyo otembo ka yi pui. Ondaka ya Suku yiti: “Epapatiso li . . . vu popeli cilo.”—1 Petulu 3:21.
LILONGISA ONDONGOSI
Kũlĩhĩsa esunga lieci ci kuetele esilivilo kokuove oku litumbika ku Yehova loku papatisiwa.
3. Vosi yetu tu sukila oku nõla o Suku tu vumba
Ko Isareli yosimbu, omanu vamue va simĩle okuti vepuluvi limuamue va ponduile oku fendela Yehova kuenda osuku yesanda Baale. Pole, Yehova wa tumile uprofeto waye Eliya oco a pengulule ovisimĩlo viaco. Tanga 1 Olosoma 18:21, noke konomuisa epulilo li kuãimo:
-
Onjila yipi va Isareli va sukilile oku nõla?
Ndeci va Isareli va linga, tu sukilavo oku nõla omunu tu vumba. Tanga Luka 16:13, noke konomuisa apulilo a kuãimo:
-
Momo lie ka citavela okuti vepuluvi limuamue tu fendela Yehova kuenda omunu umue ale ocina cikuavo?
-
Tu lekisa ndati ku Yehova okuti, tua nõlapo oku u fendela?
4. Sokolola kocisola Yehova a ku kuetele
Yehova wa siata oku tu ĩha olombanjaile vialua vi kuete esilivilo. Nye tu pondola oku eca kokuaye? Tala OVIDEO.
Vipi olonjila vimue Yehova a lekisa ocisola kokuove? Tanga Olosamo 104:14, 15 kuenda 1 Yoano 4:9, 10, noke konomuisa apulilo a kuãimo:
-
Olombanjaile vipi via Yehova o sanjukila vali?
-
Olombanjaile viaco vi ku vetiya oku lekisa nye kokuaye?
Nda tu tambula ombanjaile yimue tua sola calua, tu lekisa olopandu komunu wa tu ĩha ombanjaile yaco. Tanga Esinumuĩlo 16:17, noke konomuisa epulilo li kuãimo:
-
Nda o sokolola kovina viosi Yehova a ku lingila, o vetiyiwa oku eca nye kokuaye?
5. Oku litumbika ku nena asumũlũho alua
Omanu valua va tava okuti, oluhimo, upange wa kemãla, ale olombongo, vi va nenela esanju. Anga hẽ eci ocili? Tala OVIDEO, noke konomuisa apulilo a kuãimo.
-
Ukuakutasula ombunje wa lekisiwa vovideo, ndaño okuti wa solele omapalo yaco, momo lie a silapo upange waco?
-
Eye ka nõlelepo oku litumbika kupange woku tasula ombunje, pole, ku Yehova. O sima okuti eye wa nõla onjila yiwa? Momo lie?
Osimbu upostolo Paulu ka lingile Ukristão, wa kala oku sanda upange umue woluhimo. Eye wa longisiwile ocihandeleko ca va Yudea lulongisi umue wa kemãlele calua. Pole, eye wa siapo ovina viaco oco a kaile Ukristão. Anga hẽ Paulu wa livela? Tanga Va Filipoi 3:8, noke konomuisa apulilo a kuãimo:
-
Momo lie Paulu a popela okuti osimbu ka kaile Ukristão ovina a enda oku linga via kala “ndovipelekese,” ale ndovinene?
-
Nye eya oku kuata noke?
-
O sima okuti omuenyo wove u kala ciwa nda wa nõlapo oku vumba Yehova? Momo lie o ci popela?
Eci Paulu a linga Ukristão, wa tambula ovina vialua okuti, vina eye a siapo vi sule
OMANU VAMUE VA POPIA VATI: “Ka ca sungulukile oku tumbika omuenyo wove ku Suku.”
-
Momo lie o simĩla okuti ca sunguluka oku litumbika ku Yehova?
NYE WA LILONGISA?
Ocisola ci tu vetiya oku litumbika ku Yehova loku papatisiwa.
Oku Pitulula
-
Momo lie Yehova a sesamẽlela oku soliwa lutima wetu wosi loku fendeliwa?
-
Yehova o sumũlũisa ndati Olombangi viaye via papatisiwa?
-
O yongola hẽ oku litumbika ku Yehova?
OCO O KŨLĨHE OVINA VIKUAVO
Tala esunga lieci onjimbi yimue kuenda ukuakutasula ombunje va nõlelapo oku litumbika ku Yehova.
Amalẽhe va Pula—Nye Ndi Linga Lomuenyo Wange? —Oku Ivaluka (6:54)
Kũlĩhĩsa asunga akuavo lieci o litumbikila.
“Momo Lie wa Litumbikila ku Yehova?” (Utala Wondavululi 15 wa Susu 2010)
Vocisungo eci ci lekisiwa vovideo, tala esanju lia vana va litumbika ku Yehova.
Vulandu losapi hati: “Nda Enda Oku Lipula, ‘Momo Lie tu Kasilili Komuenyo?’” limbuka eci ca vetiya ukãi umue oku kũlĩhĩsa ovina via velelepo vali kokuaye.
“Embimbiliya li Pongolola Omuenyo Womanu” (Utala Wondavululi 1 wa Kuvala 2012)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
