Gindidedikar mo an imo kalugaringon kan Jehova pinaagi ha pagsaad ha iya ha pag-ampo nga hiya la an imo sisingbahon ngan uunahon mo ha imo kinabuhi an iya kaburut-on. (Salmo 40:8) Katapos hito, magpapabawtismo ka. Pinaagi ha pagbuhat hito, iginpapakita mo ha iba nga igindedikar mo na an imo kinabuhi kan Jehova. An pagdedikar han aton kalugaringon kan Jehova amo an pinakaimportante nga desisyon nga aton hihimoon. Ano an mahimo magpagios ha imo nga himoon ini nga importante nga desisyon nga makakagbag-o han imo kinabuhi?

1. Ano an nagpapagios ha usa nga idedikar an iya kalugaringon kan Jehova?

Gugma an nagpapagios ha aton nga idedikar an aton kalugaringon kan Jehova. (1 Juan 4:​10, 19) An Biblia nag-aaghat ha aton: “Higugmaa hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna ngan ha bug-os mo nga kusog.” (Marcos 12:30) Ginpapakita naton nga hinigugma naton an Dios diri la pinaagi han aton ginyayakan kondi pinaagi liwat han aton ginbubuhat. Sugad la nga an duha nga tinuod nga naghihigugmaay nagpapakasal, sugad man liwat an aton gugma kan Jehova nagpapagios ha aton nga idedikar an aton kalugaringon ha iya ngan magpabawtismo.

2. Ano nga mga bendisyon an igin-andam ni Jehova ha iya bawtismado nga mga Saksi?

Kon magpapabawtismo ka, magigin kaapi ka han malipayon nga pamilya ni Jehova. Aabaton mo an iya gugma ha imo ha damu nga paagi, ngan magigin mas duok ka pa ha iya kay han yana. (Basaha an Malakias 3:​16-18.) Labot la nga magigin Amay mo hi Jehova, magkakaada ka hin espirituwal nga pamilya han kabugtoan ha bug-os nga kalibotan nga nahigugma ha iya ngan nahigugma ha imo. (Basaha an Marcos 10:​29, 30.) Syempre, kinahanglan may himoon ka nga mga pitad antes magpabawtismo. Kinahanglan mahibaro ka mahitungod kan Jehova, higugmaon mo hiya, ngan magkaada ka pagtoo ha iya Anak. Ha kataposan, kinahanglan mo idedikar an imo kinabuhi kan Jehova. Kon hihimoon mo ito ngan magpapabawtismo, magigin posible para ha imo nga mabuhi hin malipayon ha waray kataposan. An Pulong han Dios nasiring: “An bawtismo . . . nagtatalwas liwat yana ha [imo].”​—1 Pedro 3:21.

 DUGANG NGA USISAHA

3. Kita ngatanan kinahanglan magpili kon kan kanay kita mag-aalagad

Ha kadaan nga Israel, an iba naghunahuna nga puydi nira singbahon hi Jehova ngan singbahon liwat an buwa nga dios nga hi Baal. Pero ginsugo ni Jehova an iya propeta nga hi Elias basi tadungon ini nga sayop nga panhunahuna. Basaha an 1 Hadi 18:​21, katapos, hisguti niyo ini nga pakiana:

• Ano nga desisyon an kinahanglan himoon han mga Israelita?

Pariho ha mga Israelita, kita liwat kinahanglan magpili kon kan kanay kita mag-aalagad. Basaha an Lucas 16:​13, katapos, hisguti niyo ini nga mga pakiana:

• Kay ano nga diri puydi nga singbahon naton hi Jehova ngan singbahon liwat an bisan hin-o o an bisan ano?

• Paonan-o naton ipapakita kan Jehova nga hiya an aton ginpili nga singbahon?

4. Pamalandonga an gugma ni Jehova ha imo

 5. An pagdedikar han imo kalugaringon kan Jehova nagriresulta hin damu nga bendisyon

 SUMARYO

Gugma an nagpapagios ha aton nga idedikar an aton kalugaringon kan Jehova ngan magpabawtismo.

Repaso

• Kay ano nga angayan la nga higugmaon hi Jehova ha bug-os naton nga kasingkasing ngan singbahon hiya?

• Paonan-o ginbibendisyonan ni Jehova an iya bawtismado nga mga Saksi?

• Karuyag mo ba idedikar an imo kalugaringon kan Jehova?