KAPITE 46
He Koʼe ʼe Tonu Ke Ke Foaki Tou Maʼuli Ki Te ʼAtua Pea Mo Papitema?
ʼE ke foaki tou maʼuli kia Sehova ʼi te faikole. ʼE ke fakapapau ai ʼe ke tauhi ʼateaina pe kia te ia pea mo fakamuʼamuʼa anai tona finegalo ʼi tou maʼuli. (Pesalemo 40:8) Hili ia, pea ʼe ke papitema leva. ʼE ke fakaha ai ki te hahaʼi kua ke foaki tou maʼuli ki te ʼAtua. ʼE ko he tonu maʼuhiga ia tau filifili ʼae ke ke foaki tou maʼuli kia Sehova. Kae he koʼe ʼe ke fai te faʼahi ʼaia?
1. He koʼe ʼe foaki e he tahi tona maʼuli ki te ʼAtua?
ʼE ko tona ʼofa kia Sehova ʼae ʼe ina fai ai te faʼahi ʼaia. (1 Soane 4:10, 19) ʼE ui fenei ʼi te Tohi-Tapu: “ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa, mo tou ʼatamai katoa pea mo tou malohi katoa.” (Maleko 12:30) Koia, ʼe mole tou fakaha pe anai te faʼahi ʼaia ʼi ʼatatou palalau kae ʼe tonu ke toe ha ʼi ʼatatou gaue. Ohage la, ʼe ʼohoana he taumatuʼa ʼuhi he kua nā feʼofaʼofani moʼoni. Pea ʼe toe feia pe, ʼe tou foaki totatou maʼuli ki te ʼAtua pea mo papitema ʼuhi pe ko totatou ʼofa ia Sehova.
2. Kotea te ʼu tapuakina ʼe foaki e Sehova ki ʼana kaugana kua papitema?
Ka ke papitema, ʼe ke kau anai ki te foʼi famili fiafia ʼa Sehova. ʼE ke sio anai ki tonatou ʼofa kia koe ia aluʼaga kehekehe. Pea ʼe toe lahi age anai tau fakaovi ki te ʼAtua. (Lau ia Malakia 3:16-18.) ʼE liliu anai ia Sehova ko tau tamai pea ʼe ke maʼu anai hou foʼi famili fakalaumalie ʼi te malamanei katoa ʼe ʼoʼofa ia Sehova ʼo feia pe mo koe. (Lau ia Maleko 10:29, 30.) Koia, ʼe ʼi ai te ʼu aluʼaga ʼe tonu ke ke fai ʼi muʼa ʼo tau papitema. ʼE tonu ke ke ako muʼa ke ke iloʼi ia Sehova, mo ʼofa kia te ia pea mo tui ki tona ʼAlo. Hili ia, ʼe tonu ke ke foaki tou maʼuli kia Sehova. Kapau ʼe ke fai te ʼu aluʼaga ʼaia pea mo papitema, ʼe ke haʼele anai ʼi te ala ʼae ʼe ina taki ki te maʼuli heʼe gata. ʼE ui ʼi te Folafola ʼa te ʼAtua ‘ko te papitema ʼe ina toe haofaki koutou.’—1 Petelo 3:21.
TA FAKALOLOTO
Ta vakaʼi pe koʼe ʼe maʼuhiga ke ke foaki tou maʼuli kia Sehova pea mo papitema.
3. ʼE tonu ke tou filifili fuli pe ko ai ka tou tauhi ki ai
ʼI te temi muʼa, neʼe manatu ʼihi kau Iselaele ʼe feala tanatou tauhi kia Sehova pea mo te ʼatua hala ko Paale. Kae neʼe fekauʼi e Sehova tana polofeta ko Elia ke alu ʼo fakatonutonuʼi tanatou faʼahiga manatu. Lau ia 1 Hau 18:21, pea fai te fehuʼi ʼaeni:
-
Kotea te tonu neʼe tonu ke fai e te kau Iselaele?
ʼE tonu ke tou filifili pe ko ai ka tou tauhi ki ai ohage ko te kau Iselaele. Lau ia Luka 16:13 pea fai te ʼu fehuʼi ʼaeni:
-
He koʼe ʼe mole feala ke tou tauhi kia Sehova pea mo he tahi kehe peʼe ko he tahi age meʼa?
-
ʼE feafeaʼi hatatou fakaha kia Sehova ʼe tou filifili ke tou tauhi age kia te ia?
4. Fakakaukauʼi te ʼofa ʼo Sehova kia koe
Neʼe lahi te ʼu meʼa ʼofa maʼuhiga neʼe foaki mai e Sehova. ʼE feafeaʼi hatatou toe liufaki age kia te ia? Vakaʼi te ʼATA VITEO.
Neʼe fakaha feafeaʼi e Sehova tona ʼofa ia koe? Lau ia Pesalemo 104:14, 15 mo 1 Soane 4:9, 10, pea fai te ʼu fehuʼi ʼaeni:
-
Kotea te ʼu meʼa ʼofa ʼo Sehova ʼe ke leleiʼia tafito?
-
Kotea ʼe ke logoʼi ʼo ʼuhiga mo Sehova ʼi tau fakakaukauʼi te ʼu meʼa ʼofa ʼaia neʼe ina foaki atu?
Ka foaki mai e he tahi he meʼa ʼofa ʼe tou leleiʼia, ʼe tou fia fakaha ki ai tatatou lotofakafetaʼi. Lau ia Tetelonome 16:17, pea fai te fehuʼi ʼaeni:
-
Ka ke fakakaukauʼi te ʼu meʼa fuli neʼe fai e Sehova maʼa koe, kotea ʼae ʼe ke fia foaki kia te ia?
5. ʼE lahi te ʼu tapuakina ka ke maʼu
Tokolahi ʼe natou manatu ʼe natou fiafia anai moka natou iloa, mo maʼu hanatou gaue lelei peʼe koloaʼia. Kae ʼe moʼoni koa? Vakaʼi te ʼATA VITEO, pea fai te ʼu fehuʼi ʼae ʼe hoa mai.
-
Logo la neʼe manako ia Andreï ki te aka, kae he koʼe neʼe ina liʼaki leva te faʼahi ʼaia?
-
Neʼe ina filifili ke ina foaki tona maʼuli kia Sehova kae mole ki te aka. ʼI tau manatu la, neʼe ko he tonu lelei koa ʼae neʼe ina fai? Kotea tona tupuʼaga?
ʼI muʼa ʼo te liliu ʼa te apositolo ko Paulo ko he tisipulo ʼa Sesu, neʼe ina ako te lao Fakasutea mo he tagata faiako iloa. Neʼe feala pe ke ina maʼu ai hana gaue lelei kae neʼe lituʼa ki te faʼahi ʼaia kae liliu ko he tisipulo ʼa Sesu. Neʼe fakahemala koa? Lau ia Filipe 3:8, pea fai te ʼu fehuʼi ʼaeni:
-
Neʼe fakaʼuhiga e Paulo te meʼa ʼae neʼe ina fai ʼi muʼa ʼo tana liliu ko he tisipulo ʼa Sesu “ko he ʼu ʼotaʼota.” He koʼe neʼe ina ui te faʼahi ʼaia?
-
Kae kotea leva ʼae neʼe ina maʼu?
-
ʼI tau manatu la, ʼe ke fiafia anai moka ke tauhi kia Sehova peʼe moka ke fai he tahi age meʼa?
ʼE UI E ʼIHI: “ʼE mole he ʼuhiga ia ʼo takita foaki tokita maʼuli kia Sehova.”
-
Kotea ʼae ʼe tonu ke tupu ai tau fia foaki tou maʼuli kia Sehova?
MANATU TAFITO
ʼE ko totatou ʼofa kia Sehova ʼae ʼe tupu ai tatatou foaki ai totatou maʼuli kia te ia pea mo papitema.
Fehuʼi Fakamanatu
-
He koʼe ʼe tuha mo Sehova ke tou ʼofa pea mo tauhi kia te ia mo totatou loto katoa?
-
ʼE fakapale feafeaʼi e Sehova ʼana kaugana kua papitema?
-
ʼE ke fia foaki anai koa tou maʼuli kia Sehova?
TE TAHI ʼU MANATU
He koʼe neʼe filifili e he fafine hiva pea mo he tagata faigaoʼi ke nā foaki tonā maʼuli kia Sehova?
ʼE Fehuʼi e Te Kau Tupulaga—Kotea Kau Fai Anai ʼi Toku Maʼuli?—Maʼuli ʼi Muʼa Atu (6:54)
He tahi ʼu tupuʼaga ke tou foaki ai totatou maʼuli ki te ʼAtua.
“He Koʼē ʼe Tonu Ke Tou Foaki Totatou Maʼuli Kiā Sehova?” (Ko Te Tule Leʼo ʼaho 1 ʼo Sanualio 2010)
Ko he hiva ʼe fakamaʼuhigaʼi te fiafia ʼo natou ʼae ʼe natou foaki tonatou maʼuli kia Sehova.
Vakaʼi te biographie “Pendant des années, je me suis demandé pourquoi on existe” pe kotea ʼae neʼe ina uga he fafine ke ina toe vakaʼi te ʼu meʼa ʼae ʼe maʼuhiga kia ia.
“La Bible transforme des vies” (Ko Te Tule Leʼo [Fakafalani] ʼaho 1 ʼo Novepeli 2012)