LIJIGANYO 46
Ana Ligongo Chichi Akusosekwa Kulipeleka Soni Kubatisidwa?
Akusalipeleka kwa Yehofa mwakumsimichisya jwalakwe kupitila mwipopelo, kuti chachimlambila jwalakwe jika soni kuti chindu chakusosekwa mnope paumi wawo chichiŵa kutenda yakusaka yakwe. (Salimo 40:8) Palipeleche, akusabatisidwa. Ni pabatisidwe akusalosya kwa ŵane kuti ŵalipeleche kwa Yehofa. Kulipeleka kwa Yehofa chili chindu chakusosekwa mnope chakusatendaga mundu kamo paumi wakwe. Nambo ana ni chichi champaka chatendekasye kulipeleka kwa Yehofa?
1. Ana ni chichi champaka chimtendekasye mundu kulipeleka kwa Yehofa?
Kumnonyela Yehofa ni kwakukusatendekasya kuti tulipeleche kwa jwalakwe. (1 Yohane 4:10, 19) Baibulo jikusatulimbikasya kuti: “Mumnonyeleje Ambuje Mlungu jwenu, ni mtima wenu wosope, ni umi wenu wosope ni lunda lwenu losope, ni machili genu gosope.” (Maliko 12:30) Tukusalosyaga kuti tukusamnonyela Mlungu ngaŵaga pakuŵechetape nambo kupitilasoni mu yatukusatendaga. Mpela mwayikusaŵela kuti ŵandu ŵanonyelene akusalombana, myoyosoni kumnonyela Yehofa kukusatutendakasya kulipeleka kwa jwalakwe soni kubatisidwa.
2. Ana Mboni syebatisidwe sikusapataga umbone wamtuli kutyochela kwa Yehofa?
Pabatisidwe akusaŵa muliŵasa lya ŵandu ŵakusangalala ŵa Yehofa. Myoyo pali m’liŵasali, Yehofa akusiŵalosyaga chinonyelo chakwe m’matala gakulekanganalekangana. Mwamti ni pakusaŵa paunasi wakulimba ni jwalakwe kupundana ni kalakose. (Aŵalanje Malaki 3:16-18.) Konjechesya pakuti Yehofa chachiŵa Mtati jwawo, nikuti chachikolasoni liŵasa lya usimu lya abale ni alongo ŵa pachilambo chosope ŵakusamnonyela Yehofa soni wawojo. (Aŵalanje Maliko 10:29, 30.) Nambo mkanabatisidwe pana yindu yine yakusosekwa kutenda. Akusosekwa kuti alijiganye ya Yehofa, kumnonyela soni kulosya kuti akusamkulupilila Mwanache jwakwe. Patesile yeleyi ni pakusasosekwa kulipeleka kwa Yehofa. Naga akutenda yeleyi ni kubatisidwa nikuti yichakamuchisya kuti chatame ni umi mpaka kalakala. Maloŵe ga Mlungu gakusati: “Ubatiso . . . ukusamkulupusya jemanja.”—1 Petulo 3:21.
KULIJIGANYA YEJINJI
Alijiganye ligongo lyakwe kulipeleka kwa Yehofa soni kubatisidwa yili yakusosekwa.
3. Tusagule jwatukusaka kumtumichila
Kalakala ku Isalaeli, ŵandu ŵane ŵaganisyaga kuti mpaka akombole kumlambilaga Yehofa soni pandaŵi jijojo nikumlambilagasoni mlungu jwaunami Bala. Nambo Yehofa jwatumisye jwakulochesya jwakwe juŵaliji Eliya kuti akakamuchisye kumanyilila yisyesyene yakwe. Aŵalanje 1 Ayimwene 18:21, kaneko akambilane chiwusyo achi:
-
Ana Ayisalaeli ŵasosekwaga kusagula chichi?
Mwakulandana ni Ayisalaeliŵa, m’wejisoni tukusosekwa kusagula jwatukusaka kumtumichila. Aŵalanje Luka 16:13, kaneko akambilane yiwusyo ayi:
-
Ana ligongo chichi yili yangakomboleka kumlambilaga Yehofa pampepe ni yindu yine?
-
Ana mpaka tulosye chamtuli kuti tusagwile kumlambila jwalakwe?
4. Aganichisyeje yakusatenda Yehofa pakwalosya chinonyelo
Yehofa atupele yindu yambone yejinji. Nambi ana m’weji mpaka tumpe chichi? Alolele FIDIYO.
Ana Yehofa alosisye kuti akusiŵanonyela wawojo m’matala gapi? Aŵalanje Salimo 104:14, 15 soni 1 Yohane 4:9, 10, kaneko akambilane yiwusyo ayi:
-
Ana ni yindu yambone yapi yiŵapele Yehofa yakusayiyamichila?
-
Ana yeleyi yikusiyatendekasyaga kum’wona chamtuli Mlungu?
Patupochele mtuka watukuwunonyela mnope, tukusasosekwa kulosya kuti tukuyamichila mundu jwatupelejo. Aŵalanje Detulonomo 16:17, kaneko akambilane chiwusyo achi:
-
Pakuganichisya chilichose chiŵatendele Yehofa, ana ni yindu yapi yakusaka kumtendela jwalakwe?
5. Yatukusapata ligongo lyakulipeleka kwa Yehofa
Ŵandu ŵajinji akusakulupilila kuti kuŵa mundu jwakumanyika, kola masengo gambone soni mbiya ni yampaka yimtendekasye mundu kuŵa jwakusangalala. Ana yeleyi yili yisyene? Alolele FIDIYO, kaneko akambilane yiwusyo ayi.
-
Mundu jwamkolasile mu fidiyoji jwanonyelaga mnope maseŵela ga mpila, nambo ana ligongo chichi jwalesile maseŵelaga?
-
Jwalakwe jwasagwile kulipeleka kwa Yehofa ngaŵaga ku maseŵela ga mpila. Ana akuganisya kuti munduju jwasagwile chenene? Ligongo chichi akwanga myoyo?
Ndumetume Paulo mkanaŵe Mklistu, jwakwete masengo gapenani. Mkwiganya jwakumanyika mnope jwamjiganyisye jwalakwe chilamusi cha Ayuda. Nambo jwalakwe jwalesile yosopeyi nikuŵa Mklistu. Ana mpaka tujile kuti Paulo jwaligambile? Aŵalanje Afilipi 3:8, kaneko akambilane yiwusyo ayi:
-
Ana ligongo chichi Paulo jwasasile kuti yindu yiŵatendega mkanaŵe Mklistu yaliji “ya pachitutu” kapena yiswani?
-
Nambi ana jwalakwe jwapatile yamtuli?
-
Ana kumtumichila Yehofa mpaka akulandanye chamtuli ni yindu yiliyose yampaka atende paumi wawo?
Paulo paŵaŵele Mklistu ŵapatile yindu yejinji kulekangana ni yaŵalesile
YAKUSAŴECHETA ŴANDU ŴANE: “Ngusamanyilila kuti welewu uli usyesyene nditu, nambo nganimba nalipeleche kwa Mlungu.”
-
Ligongo chichi yili yakusosekwa kuti mundu alipeleche kwa Yehofa?
YALIJIGANYISYE
Kumnonyela Yehofa ni kwakukusatutendekasya kuti tulipeleche kwa jwalakwe soni kubatisidwa.
Yiwusyo Yakuwilisya
-
Ana ligongo chichi Yehofa akusasaka kuti tumtumichileje soni tumnonyeleje ni mtima wetu wosope?
-
Ana Yehofa akusiŵapaga chichi ŵandu ŵabatisidwe?
-
Ana wawojo mpaka asache kulipeleka kwa Yehofa?
YAKULINGA YINESONI
Alole ligongo lyakwe jwakwimba nyimbo jwine soni jwakutenda maseŵela ga mpila ŵasagwile kulipeleka kwa Yehofa.
Yakusaliwusya Ŵacinyamata—Ana Umi Wangu Cinjiwukamulicisya Masengo Camtuli? (6:54)
Alolesoni magongo gane gampaka gamtendekasye mundu kulipeleka kwa Yehofa.
“Ligongo Chichi Akusosekwa Kulipeleka kwa Yehofa?” (Sanja ja Mlonda, Januwale 15, 2010)
Munyimboji alole mwakusati kusangalala ŵandu ŵalipeleche kwa Yehofa.
Mungani jakuti “Kwa Yaka Yejinji Naliwusyaga Kuti, ‘Ligongo Chichi Tupali?’” alijiganye yayamtendekasisye jwamkongwe jwine kuganichisya chindu chakusosekwa mnope paumi wakwe.
“Baibulo Jikusachenga Umi wa Ŵandu” (Sanja ja Mlonda, Nofemba 1, 2012)
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
