PWONY ME 47

Tika Itye Atera me Nongo Batija?

TUKI

Dong ityeko pwonyo jami mapol i kom Jehovah ki i kwanni me Baibul. Nen calo itimo alokaloka mogo wek iket i tic i kwoni jami ma ipwonyo. Kadi bed kit meno, twero bedo ni itye ki tyen lok mo mumiyo iwinyo ni pe itye atera me dyere bot Jehovah ki nongo batija. Pwony man binyamo ariya mogo ma pol kare gengo dano ki nongo batija ki dong kit ma itwero loyogi kwede.

1. Omyero ibed ki ngec marom mene ma peya inongo batija?

Wek inong batija, mitte ni inge “lok me ada.” (1 Temceo 2:4) Man pe te lokke ni myero inge lagam pi lapeny ducu ma dano gipenyo madok i kom Baibul ma peya inongo batija. Kadi wa Lukricitayo ma gunongo batija con myero gumedde ki pwonyo lok ma tye i Baibul. (Jo Kolocai 1:9, 10) Ento gire mitte ni inge pwony ma pigi tego me Baibul. Luelda me kacokke gitwero konyi me niang ka ce itye ki ngec muromo.

2. Jami mene ma omyero itim ma peya inongo batija?

Ma peya inongo batija, myero kong ‘ingut . . . ci idwog cen.’ (Kwan Tic pa Lukwena 3:19.) Man te lokke ni cwinyi cwer matek pi bal mo keken ma itimo i kare mukato angec dok ilego Jehovah ni otimmi kica. Imoko bene tammi me kwero gin mo keken ma Lubanga waco ni rac ki me kwo i yo ma yomo cwinye. Medo i kom meno, icako cito i cokke ki tito kwena kacel ki jo me kacokke macalo latit kwena ma peya onongo batija.

3. Pingo omyero pe iwek lworo ogengi ki nongo batija?

Jo mukene gitye ki lworo ni pe gibitwero cobo cikkegi bot Jehovah. Tye ada gire ni, i kare mukene ibitimo bal, kit ma co ki mon ma lugen ma kiloko i komgi i Baibul bene gutimo. Ento wi opo ni Jehovah pe keto gingi ni jo ma wore myero gubed labongo roc mo keken. (Kwan Jabuli 103:13, 14.) Me ka meno, cwinye bedo yom ka itimo gin maber loyo ma itwero! En bikonyi. Ki lok ada, Jehovah cuko cwinywa ni pe tye gin mo ma ‘bibedo ki twero me pokowa woko ki i kom marre.’—Kwan Jo Roma 8:38, 39.

NONG NGEC MATUT

Nen kit ma ngeyo Jehovah maber kacel ki jolo konye twero konyi me loyo ariya mo keken ma gengi ki nongo batija.

4. Nge Jehovah maber

Myero ibed ki ngec marom mene i kom Jehovah ma peya inongo batija? Mitte ni inge Jehovah maber ma weko imarre dok ibedo ki miti me yomo cwinye. Tuk VIDIO me neno kit ma lutino kwan me Baibul i twok lobo-ni ducu gutimo kwede meno. I nge meno, wunyam lapeny ma lubo-ni.

VIDIO: Gin ma Myero Itim Wek Ibed ma Ipore pi Batija (3:56)

I vidio man, ngo ma okonyo jo mogo me yubbe pi batija?

Kwan Jo Roma 12:2, ci wunyam lapeny magi:

Tika itye ki akalakala mo i kom gin ma Baibul pwonyo nyo ka ce Lucaden pa Jehovah gipwonyo lok ada?
Ka tye kit meno, ci ngo ma itwero timone ki akalakala meno?

5. Lo ariya mogo ma gitwero gengi ki nongo batija

Ka wamoko tamwa me dyero kwowa bot Jehovah kacel ki nongo batija, wakato ki i ariya mapol. Me neno labol mo acel, tuk VIDIO, ci wunyam lapeny ma lubo.

VIDIO: Mar pi Jehovah Konyowa me Loyo Ariya (5:22)

I vidio man, ariya ango ma onongo mitte ni Narangerel olo wek oti pi Jehovah?
Marre pi Jehovah okonye nining me loyo ariya magi?

Kwan Carolok 29:25 ki 2 Temceo 1:7, ci wunyam lapeny man:

Ngo ma miniwa tekcwiny me loyo ariya?

6. Gen kony pa Jehovah

Jehovah bikonyi me yomo cwinye. Tuk VIDIO, ci wunyam lapeny ma lubo-ni.

VIDIO: Lubanga Jehovah Bikonyi (2:50)

I vidio man, pingo latin kwan me Baibul-li obedo ki lworo me nongo batija?
Ngo ma en opwonyo ma okonye me jingo genne i kom Jehovah?

Kwan Icaya 41:10, 13, ci wunyam lapeny man:

Pingo iromo bedo ki tekcwiny ni itwero cobo cikkeni ma icikke i kare ma idyere?

7. Dong pwocci pi mar pa Jehovah

Ka imedde ki lwodo lok i kom mar pa Jehovah piri, ci pwocci pire bidongo dok ibibedo ki miti me tic pire nakanaka. Kwan Jabuli 40:5, ci wunyam lapeny man:

Mot ango ma Jehovah omini ma itye ki pwoc adada pire?

Lanebi Jeremia onongo maro Jehovah kacel ki lokke, dok en onongo tye ki pwoc madit pi mot me bedo latic pa Jehovah. En owaco ni: “Lokki olokke odoko gin me yomcwiny bota, dok obedo gin ma yomo cwinya adada; pien an dong gilwonga ki nyingi, ai Rwot [Jehovah] Lubanga.” (Jeremia 15:16) Gam kong lapeny magi: