OZUMALƐDƖYƐ 47
Asʋ̃ Eziyeziye Wʋ Nwʋ Kɛɛ Okonluma a?
Wʋ Bayɩbʋlʋ dɩyɛzumanlɛ nɩ ɩma ozuma nninyeni sʋ̃maa ɛvalɩ Gyehova nwʋ. Ebiye a, ɛyɛ nzɩnzanlɩyɛ be na ama wʋava mɔɔ ozuma nɩ wʋayɛ egyima. Naasʋ̃, ebiye a sianti be ti, ɛtɩ nɣanlɩ kɛɛ elésiyeziyeli wʋ nwʋ kɛɛ ekeyila wʋ nwʋ zʋ ɛkɛma Gyehova na wʋanluma. Wɔ ozumalɛdɩyɛ eyi nu nɩ, yekozunzu nninyeni be mɔɔ ɩkɔhʋla ikezi wʋ onlumanlɛ nwʋ ɔhʋanɩ nɩɩ kezimɔ ekeli ɔzʋlɔ.
1. Asʋ̃ ɩsɛ kɛɛ ɔnwʋ dɩyɛ bela ansaana wʋanluma a?
Ansaana okonluma nɩ, ɩsɛ kɛɛ ɔnwʋ “ehilehilelɛ baaba nɩ.” (1 Timoti 2:4) Eyi iáhile kɛɛ ɩsɛ kɛɛ enyia Bayɩbʋlʋ nu ndwokɔɣizialɛ munwatĩĩ nwʋ munwalɩyɛ ansaana wʋanluma. Kilisinyiamaa mɔɔ bonlumanlɩ ahyɛ po nɩ, bɔkɔ ɔzʋlɔ la bosuma dɩyɛ. (Kolosiyiamaa 1:9, 10) Naasʋ̃ ɩsɛ kɛɛ enyia Bayɩbʋlʋ ehilehilelɛ yɩ tʋwɔlɛ yi nu ntɩyasɩ. Sɛ ɛtɩ nɣanlɩ kɛɛ éni nnimidi sʋ̃maa a, asafʋ nu mbanimbani kɔhʋla kɔwʋwa wʋ.
2. Mɩnla nninyeni yɛ ɩsɛ kɛɛ ɛyɛ ansaana wʋanluma a?
Ansaana ɔkɔhʋla okonluma nɩ, ɩsɛ kɛɛ ‘onu wʋ nwʋ na esia ɛba Nyamɩnlɩ yɩ ɛkɛnɩ.’ (Kɩnga Egyima 3:19.) Eyi ikile kɛɛ, ɩsɛ kɛɛ ɔzʋ̃ wʋ ahʋnlɩnɩ nu onu wʋ nwʋ wɔ tanɩ bela mɔɔ ɛyɛlɩ nɩ nwʋ na esiã Gyehova kɛɛ ɩva ɩhyɛ wʋ. Akʋ̃ sʋ̃, ɩsɛ kɛɛ esi wʋ kɛnɣa kɛɛ ɛlɛ́yɛ dɩyɛ bela mɔɔ Nyamɩnlɩ ɩkã kɛɛ ɩdɩ tanɩ na ɔkɔwɔ ɛbɩla mɔɔ ɩsɔ Nyamɩnlɩ anyɩ. Ɔzɔ la sʋ̃ yɛ ɩsɛ kɛɛ ɔbɔ yɩ tʋ ɔkɔ dɩyɛzumanlɛ na ɛ nɩɩ asafʋ yɩ bɔ numɔ kɔ dasɩlɛlilɛ a.
3. Mɩnla ti mɔɔ íni kɛɛ ɛma bɔlɔ si wʋ onlumanlɛ nwʋ ɔhʋanɩ a?
Abiyemmɔ bo kunlu tu kɛɛ sɛ bonuma a, bɔlɔ́kʋla bekeli anʋhʋba mɔɔ bɔwɔlɩ Gyehova nɩ zʋ. Ɩwɔ numɔ, ɩyɛ a yekeli mfʋmɩ. Mmenyia nɩɩ mmaalɛ nɔhʋanlɛmaa mɔɔ Bayɩbʋlʋ ɩkã bɔ nwʋ odwokɔ po nɩ belili mfʋmɩ. Kakɛ kɛɛ, Gyehova iáhila ɔhʋanɩ kɛɛ yɩ azʋ̃mɩvʋlɔ kɛyɛ dɩyɛ bela pɛpɛɛpɛ. (Kɩnga Ndwomi 103:13, 14.) Sɛ ɛyɛ mɔɔ ɔkɔhʋla bela a, ɩma yɩ anyɩ ide! Ɩkɔwʋwa wʋ. Nɔhʋanlɛ nu nɩ, Gyehova ɩbɔ yɛ anʋhʋba kɛɛ “dɩyɛ bela íni ɛkɛnɩ mɔɔ ɩkɔhʋla ɩkɛyɩ amɩyɛ wɔ [yɩ] ɔlɔlɛ” nɩ nwʋ.—Kɩnga Wulomimaa 8:38, 39.
SUMÁ SƲ̃MAA
Kilá kezimɔ ɔkɔhʋla ekeli nninyeni be mɔɔ ɩkɔhʋla ikezi wʋ onlumanlɛ nwʋ ɔhʋanɩ nɩ zʋ, iluwa Gyehova mɔɔ ɔkɔnwʋ yɩ bʋwɔ na wʋale yɩ mmʋwalɩyɛ wʋadiã nu nɩ zʋ.
4. Nwʋ Gyehova bʋwɔ
Ansaana okonluma nɩ, kɛ ɩsɛ kɛɛ ɔnwʋ Gyehova bʋwɔ ese a? Ɩsɛ kɛɛ ɔnwʋ yɩ bʋwɔ na ɔdɔ yɩ na enyia ɛpɛ kɛɛ ɛkɛyɛ mɔɔ ɩsɔ yɩ anyɩ. Yɩ́ VIDIYO nɩ na kilá kezimɔ Bayɩbʋlʋ dɩyɛzumanlɛmaa mɔɔ bɔwɔ oyuwadɩ munwala bɛyɛ ɔzɔ. Akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla yɛ ɩwʋwalɩ abiyemmɔ ma beziyeziyeli bɔ nwʋ bɛmanlɩ onlumanlɛ a?
Kɩnga Wulomimaa 12:2, na akʋ̃ bozunzú ndwokɔɣizialɛ eyimmɔ nwʋ:
-
Asʋ̃ ɩyɛ a, wʋ adwɩnɩ ɩyɛ wʋ anwɩ̃ anwɩ̃ wɔ mɔɔ Bayɩbʋlʋ ikilehile nɩ nwʋ a? Anzɛnyɩɩ wʋ adwɩnɩ iázi wʋ pi kɛɛ Gyehova Dasɩvʋlɔmaa kilehile nɔhʋanlɛ yɩ a?
-
Sɛ ɔzɔ a, mɩnla yɛ ɔkɔhʋla ɛkɛyɛ ɛkɛvalɩ nwʋ a?
5. Dí nninyeni mɔɔ ɩkɔhʋla ikezi wʋ onlumanlɛ nwʋ ɔhʋanɩ nɩ zʋ
Sɛ yesi pɔkɔ kɛɛ yekeyila yɛ nwʋ zʋ yɛkɛma Gyehova na yɛanluma a, yekeyiyia odwohilalɛ sʋ̃maa. Sɛ ɛpɛ kɛɛ ɔnwʋ nwʋmɔ ndianwʋ ɔkʋ̃ a, yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla odwohilalɛ yɛ nɩ ɩsɛ kɛɛ Narangerel idi ɔzʋlɔ na ɩahʋla ɩazʋ̃mɩ Gyehova a?
-
Mɩnla ɔhʋanɩ zʋ yɛ Gyehova nwʋ ɔlɔlɛ wʋwalɩ yɩ ma ilili odwohilalɛ eyimmɔ zʋ a?
Kɩnga Ɛɣɛlɛwulɛ 29:25 nɩɩ 2 Timoti 1:7, na akʋ̃ bozunzú odwokɔɣizialɛ eyi nwʋ:
-
Mɩnla yɛ ɩhyɛ yɛ ɛzɩzɩbɛ ma yedi odwohilalɛ zʋ a?
6. Fá wʋ nwʋ tiã Gyehova yɩ mmʋwalɩyɛ zʋ
Gyehova kɔwʋwa wʋ ma ɛkɛyɛ mɔɔ ɩsɔ yɩ anyɩ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla yɛ nɩ isi Bayɩbʋlʋ dɩyɛzumanlɛvʋlɔ nɩ ɔhʋanɩ kɛɛ ikonluma a?
-
Wɔ yɩ dɩyɛzumanlɛ yi nu nɩ, mɩnla yɛ ɩwʋwalɩ yɩ ma yi dedi ɩyɛlɩ kezi wɔ Gyehova nu a?
Kɩnga Ayɩzaya 41:10, 13, na akʋ̃ bozunzú odwokɔɣizialɛ eyi nwʋ:
-
Mɩnla ti mɔɔ ɔkɔhʋla ekenyia dedi kɛɛ anʋhʋba mɔɔ ɔwɔlɩ wɔ wʋnwʋzʋyilalɛ yi nu nɩ, ɔkɔhʋla ekeli zʋ a?
7. Kilé Gyehova yɩ ɔlɔlɛ nwʋ anyɩnlɩzɔlɛ kezile
Sɛ ɔkɔ zʋ ɔdwɩnɩndwɩnɩ ɔlɔlɛ mɔɔ Gyehova ɩwɔ ɩma wʋ nɩ nwʋ a, ɩkɛma wʋ anyɩnlɩzɔlɛ ɩkɛyɛ kezi, na ɩkɛma ekenyia ɛpɛ kɛɛ ɔkɔzʋ̃mɩ yɩ daabaa. Kɩnga Ndwomi 40:5, na akʋ̃ bozunzú odwokɔɣizialɛ eyi nwʋ:
-
Gyehova yi nyilalɛ mɔɔ enyia yi nu ɛhɩnla dɩyɛ yɛ wʋ anyɩ ɩsɔ yɩ paa a?
Nɩ nkɔmɩhyɛnii Gyɛlɩmaya ɩdɔ Gyehova nɩɩ yɩ odwokɔ yɩ, na nɩ yɩ anyɩ sɔ ɔnwʋmɔ ɔhʋanɩ kezile mɔɔ ɩlɛ kɛɛ Gyehova yi dima ɩla yɩ zʋ nɩ baaba. Ɩhanlɩ kɛɛ: “Wʋ odwokɔ yɩ ɩmanlɩ milili fɛlɛkʋ̃ na ɩmanlɩ mɩ anyɩ ileli wɔ mɩ ahʋnlɩnɩ nu, iluwakɛɛ wu dima ɩla mʋ zʋ, O Gyehova Nyamɩnlɩ.” (Gyɛlɩmaya 15:16) Yɩ́ ndwokɔɣizialɛ eyimmɔ munwa:
-
Mɩnla ti mɔɔ ɩdɩ ɔnwʋmɔ ɔhʋanɩ kezile kɛɛ ɛkɛɣa ɛkɛyɛ Gyehova Dasɩvʋlɔmaa bo nu ɔkʋ̃ a?
-
Asʋ̃ ɛpɛ kɛɛ onuma na wʋaɣa wʋahɩnla Gyehova Dasɩvʋlɔmaa nwʋ a?
-
Asʋ̃ nninyeni be ɩtwɩ̃ɩ̃ wʋ isia kɛɛ okonluma a?
-
Ekila a, mɩnla yɛ ɩsɛ kɛɛ ɛyɛ na ama wʋahʋla wʋanluma a?
ABIYEMMƆ BƐKÃ KƐƐ: “Mu kunlu itu kɛɛ ebiye a mʋlɔ́kʋla mɩkɛyɛ nninyeni mɔɔ mʋwɔlɩ anʋhʋba kɛɛ sɛ munuma a, mɩkɛyɛ nɩ.”
-
Ɔzɔ yɛ ɛtɩ nɣanlɩ a?
YƖ DƆKƆWƆLƐ
Iluwa Gyehova yɩ mmʋwalɩyɛ zʋ nɩ, sa ɔkʋla edi dɩyɛ bela mɔɔ isi wʋ onlumanlɛ nwʋ ɔhʋanɩ nɩ zʋ.
Kɛ Okowuwa Ekeze a?
-
Asʋ̃ ɩsɛ kɛɛ enyia Bayɩbʋlʋ nu nnimidi sʋ̃maa ansaana wʋanluma a?
-
Mɩnla nzɩnzanlɩyɛ yɛ ɩsɛ kɛɛ ɛyɛ ansaana wʋanluma a?
-
Mɩnla ti mɔɔ íni kɛɛ ɛma bɔlɔ isi wʋ onlumanlɛ nwʋ ɔhʋanɩ a?
PƖBƐ́ SƲ̃MAA
Sunzú mɔɔ ɩsɛ kɛɛ ekyina ɔzʋlɔ esi pɔkɔ kɛɛ okonluma nɩ nwʋ.
“Asʋ̃ Eziyeziye Wʋ Nwʋ Kɛɛ Okonluma a?” (Ɔwɩɛnɩlɛ Aɣanɩ, March 2020)
Sumá kezimɔ ekeli odwohilalɛ mɔɔ ɩkɔhʋla ikezi wʋ ɔhʋanɩ nɩ zʋ.
“Mɩnla Yɛ Isi Mʋ Onlumanlɛ Nwʋ Ɔhʋanɩ a?” (Ɔwɩɛnɩlɛ Aɣanɩ, March 2019)
Kilá kezimɔ benyia be ɩhʋla ilili odwohilalɛ nɣezile be zʋ na ama ɩahʋla ianluma.
‘Mɩnla Ti Mɔɔ Ɔtwɩnhwɩ̃ɩ̃ Wʋ Agyia Azɩ Wɔ Onlumanlɛ Nwʋ Yɩ a?’ (1:10)
Bɔmʋnlɩ nɩ, nɩ benyia be mɔɔ bɔfʋlɔ yɩ Ataa ɩtwɩnhwɩ̃ɩ̃ yɩ agyia azɩ kɛɛ ikonluma. Kilá mɔɔ ɩhanlɩ yɩ ma izili pɔkɔ mɔɔ nwʋmɔ ihyinyia eyi.
