LEKSIYON 47
Handa Ka Na Daw na Magpabawtismo?
Sa pag-adal mo nin Bibliya, dakul ka nang nanudan manungod ki Jehova. Posibleng marhay na naggibo ka na nin mga pagbabago para maisabuhay an mga nanudan mo. Pero tibaad may nakakapugol pa sa saimo para idusay an saimong sadiri ki Jehova asin magpabawtismo. Pag-uulayan sa leksiyon na ini an pira sa mga parating ulang na nakakapugol sa saro na magpabawtismo asin kun paano mo mapapangganahan iyan.
1. Para mabawtismuhan, gurano kadakul an dapat na aram mo?
Para mabawtismuhan, dapat na magkaigwa ka nin “tamang kaaraman mapadapit sa katotoohan.” (1 Timoteo 2:4) Dai buot sabihon kaiyan na dapat aram mo an gabos na simbag sa ano man na tibaad ihapot kan mga tawo sa Bibliya. Padagos na nag-aadal dawa an mga Kristiyano na haloy nang nabawtismuhan. (Colosas 1:9, 10) Pero dapat na nasasabutan mo an panginot na mga katukduan kan Bibliya. Tatabangan ka kan mga elder sa kongregasyon para mahiling kun igwa ka na nin igong kaaraman.
2. Para mabawtismuhan, ano an mga kaipuhan mong gibuhon?
Bago ka mabawtismuhan, dapat kang ‘magsulsol asin magbakli.’ (Basahon an Gibo 3:19.) Nangangahulugan iyan nin pagbasol na marhay sa ano man na kasalan na nagibo mo kaidto asin paghagad nin tawad ki Jehova. Determinado ka man na mamuhay sa paaging nakakapaugma sa Diyos asin likayan an maraot na mga gibo. Apuwera kaiyan, nagpapartisipar ka na sa mga aktibidad kan kongregasyon arog kan pag-atender sa mga pagtiripon asin pakikikabtang sa paghuhulit bilang dai pa bawtisadong parahayag.
3. Taano ta dai mo dapat pagtugutan an takot na makapugol sa saimo?
May mga natatakot na tibaad dai ninda magibo an pangako ninda ki Jehova. Totoo, makakagibo ka nin mga sala kun minsan. Nangyari iyan dawa sa maimbod na mga lalaki asin babayi kan mga panahon kan Bibliya. Pero tandaan na dai inaasahan ni Jehova an pagkaperpekto sa mga lingkod niya. (Basahon an Salmo 103:13, 14.) Maugma siya pag ginigibo mo an saimong pinakamakakaya! Tatabangan ka niya. Sa katunayan, sinisigurado niya sa sato na mayo nin ano man na “makakayang isuway kita sa pagkamuot [niya].”—Basahon an Roma 8:38, 39.
ARAMON PA
Aramon kun paano mo mapapangganahan an ano man na ulang sa pagpapabawtismo pag mas namidbid mo pa si Jehova asin inako an tabang niya.
4. Mas midbidon pa si Jehova
Gurano kadakul an dapat mong maaraman manungod ki Jehova para mabawtismuhan? Para mamutan mo si Jehova asin mawuton na paugmahon siya, kaipuhan na magkaigwa ka nin igong kaaraman manungod sa saiya. Para mahiling kun paano iyan ginibo kan mga tinutukduan sa Bibliya sa iba-ibang parte kan kinaban, i-play an VIDEO. Dangan pag-ulayan an hapot.
-
Sa video, ano an nakatabang sa nagkapirang indibidwal na magin handa para sa bawtismo?
Basahon an Roma 12:2, dangan pag-ulayan an mga hapot na ini:
-
May mga katukduan daw sa Bibliya na dai ka gayong sigurado kun baga totoo o kun baga an itinutukdo kan mga Saksi ni Jehova iyo an katotoohan?
-
Kun igwa ka nin ano man na pagduda, ano an puwede mong gibuhon?
5. Kaya mong mapangganahan an mga ulang
Gabos kita mapapaatubang sa mga kadipisilan pag nagdesisyon kitang idusay an satong sadiri ki Jehova asin magpabawtismo. Para mahiling an sarong halimbawa, i-play an VIDEO, dangan pag-ulayan an mga hapot.
-
Sa video, anong mga ulang an kaipuhan na mapangganahan ni Narangerel para mapaglingkudan si Jehova?
-
Paano nakatabang saiya an pagkamuot ki Jehova para mapangganahan an mga ulang na iyan?
Basahon an Talinhaga 29:25 asin 2 Timoteo 1:7, dangan pag-ulayan an hapot na ini:
-
Ano an nagtatao sa sato nin kusog nin buot para mapangganahan an mga ulang?
6. Magtiwala na tatabangan ka ni Jehova
Tatabangan ka ni Jehova na magibo an tama. I-play an VIDEO, dangan pag-ulayan an mga hapot.
-
Sa video, ano an nakapugol sa Bible study na magpabawtismo?
-
Ano an nanudan niya na nakatabang saiya na mapakusog an saiyang pagtitiwala ki Jehova?
Basahon an Isaias 41:10, 13, dangan pag-ulayan an hapot na ini:
-
Taano ta makakapagtiwala ka na kaya mong mautob an saimong pagdusay?
7. Urog pang pakusugon an saimong pagpapahalaga sa pagkamuot ni Jehova
Pag mas lalo mong pinag-isipan kun gurano kadakula kan pagkamuot sa saimo ni Jehova, mas lalo mo man siyang papasalamatan asin mas gugustuhon mo na paglingkudan siya habangbuhay. Basahon an Salmo 40:5, dangan pag-ulayan an hapot na ini:
-
Arin sa mga bendisyon ni Jehova an lalo nang ipinagpapasalamat mo?
Namutan ni propeta Jeremias si Jehova asin an Saiyang Tataramon, asin pinahalagahan niyang marhay an pribilehiyo na magdara kan pangaran ni Jehova. Sinabi niya: “An saimong tataramon nagin labi-labing kaugmahan para sako asin kagaya-gayahan kan sakong puso, huling inapod ako sa saimong pangaran, O Jehova na Diyos.” (Jeremias 15:16) Simbagon an mga hapot na ini:
-
Taano ta espesyal na pribilehiyo an magin Saksi ni Jehova?
-
Gusto mo daw mabawtismuhan bilang sarong Saksi ni Jehova?
-
Igwa daw nin ano man na nakakapugol sa saimo para gibuhon iyan?
-
Ano an nahihiling mo na kaipuhan mong gibuhon para maabot an pasuhan na magpabawtismo?
MAY MGA NAGSASABI: “Garo dai ko kayang panindugan an pagigin Saksi pag nabawtismuhan ako.”
-
Arog daw kaiyan an namamatian mo?
SUMARYO
Sa tabang ni Jehova, mapapangganahan mo an ano man na ulang sa pagpabawtismo.
Rebyu
-
Para mabawtismuhan, gurano dapat kadakul an aram mo sa Bibliya?
-
Para mabawtismuhan, anong mga pagbabago an tibaad kaipuhan mong gibuhon?
-
Taano ta dai mo dapat pagtugutan an takot na makapugol sa saimo?
HILINGON MAN
Pag-isipan kun ano an dapat na dahilan kan desisyon mo na magpabawtismo.
“Andam Ka Na Daw na Magpabawtismo?” (An Torrengbantayan, Marso 2020)
Pag-isipan kun paano mo mapapangganahan an partikular na mga kadipisilan na puwedeng makapugol sa saimo na magpabawtismo.
“Ano an Nakakaulang sa Sako Para Mabawtismuhan?” (An Torrengbantayan, Marso 2019)
Aramon kun paano napangganahan nin sarong lalaki an nagkapirang dakulang ulang na nakakapugol sa saiya na mabawtismuhan.
Kan inot, nagduduwa-duwa si Ataa na magpabawtismo. Aramon kun ano an nakakumbinsir sa saiya para gibuhon an mahalagang desisyon na ini.
Angay Daw Talaga Ako na Mag-ako kan mga Bendisyon na Ini? (7:21)
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
