FARKARKOR 47
Fasos Kwar fa Wakḇebaptis Ke?
Wafarkor Refo ra wafawi roi nabor ḇekur Yahwe I kwar. Inja imbude Ausya fadwer roi ono ro kenem Bena kwar. Imbape, imbude roi ono naisya nadwarek Au kaker fa buk kenem Bena ḇe Yahwe I ma bebaptis. Ro farkarkor ine, nari kawos roi ḇeḇeso ḇedwarek snonggaku ḇebor sya fa sebaptis. Nari kawos kako moḇsa mam pyum roi ḇedwarek anna rai.
1. Wasmai fawawi nabor syadi wer resari insape bebaptis ke?
Imbe wakḇebaptis ido, fandun fa wafawi pyum kakaku ya. (1 Timotius 2:4) Imboi ine kyurfasnai ḇa fandun fa wafawi kam kankarem ro fakfuken ḇebor ḇekur Refo ya resari insape bebaptis. Snonggaku Kristen ḇebaptis fyoro kwar sya, na simnai ba boi sfarkor pdef Refo ya wer. (Kolose 1:9, 10) Ḇape, farkarkor ḇeknam kaku ro Refo ya iso fandun fa wafawi na ḇepon resari. Penatua ro sidang moḇ wakryur ro ya, siso na ḇefnoḇek Au fa mam fawawi wasmai na nasrow kwar ke roḇaime.
2. Rosai fandun fa wakfrur ḇepon insama wakḇebaptis?
Bebaptis ḇaime, fandun fa ’wambror ma kwaḇer’ resari. (Kowasya Farfyar 3:19.) Wos ’wambror’ ine kyurfasnai Ausya wafafko kaku faro sasar wafrur kwar ro ḇepon iwara ma wor kaku fa Yahwe ipyos na. Wos ’kwaḇer’ ine kyurfasnai wamnai kaku wafrur roi ḇeḇye ḇa na, ma kwinfir fa wakenem raris Yahwe marisen Ḇyena. Oso wer ido, Ausya wakso ker ro fananjur ari ma fararur ḇaḇebaryas fnoḇek naek ma srar ro sidang sya kwar.
3. Rosai ḇefnai fa wamgak awer fa wakḇebaptis?
Sia sisya simgak kaker asas sikofen kwar faro Yahwe I nari sifrur na ḇa. Swaf ono, na wakfrur sasar ḇae. Yahwe manfamyan Ḇyesi ḇeyakfas Refo ḇero fafisu naiwara sya sakfrur sasar kako. Imbape koswarepen, Yahwe ima dor manfamyan Ḇyesi fa sifrur roi imarisen na fa namnis kaku ḇeri ḇa. (Kowasya Mazmur 103:13, 14.) Swewar fa wafrur roi ḇepyum ido, na Yahwe imarisen! Nari isaramper Au fa wafrur na. Yahwe manggundi ikofen kaku kwar bo doḇe roi oso ḇaḇeri nari napok ’nadwarek saswar byuk maḇekonya ḇa’.—Kowasya Roma 8:38, 39.
SWEWAR KAKU WER
Nari kawos nyan insama kwara samswen awer roi ono rawo wamgak fa wakḇebaptis. Inja na farkor fa mambir pyum syadi Yahwe I ma farkor nyan fa wamarisen wasmai fafnoḇek ro I.
4. Wafarkor fa mambir pyum syadi Yahwe I
Rofyor bebaptis ḇaime, fandun fa mambir pyum syadi Yahwe I resari. Mambir pyum Yahwe ido, nari waswar I ma swewar fa wafrur roi imarisen na. Komam VIDIO ine fa kokfawi moḇsa ḇefarkor Refo ro supswan ine ḇesiper sifrur roi ine rai. Raimnai kawos fakfuken na.
-
Ro vidio insanja, rosai ḇefnoḇek snon ma bin ansya fa sfasos manggunsi fa sakḇebaptis?
Kowasya Roma 12:2, raimnai kawos fakfuken nane:
-
Wakyar manggun ḇaim faro roi ono ro rosai Refo fyarkor na ke? Wakyar manggun ḇa snar roi Saksi-Saksi Yahwe sfarkor nanema kakaku nairi ke?
-
Rarirya ido, rosai na wafrur ya?
5. Mam pyum fa roi ono nadwarek awer Au fa wakḇebaptis
Kokame randak imbe kobuk kenem koḇena ḇe Yahwe I ma koḇebaptis anya, kaksmai roi ḇedwarek kako. Rosai monda ḇedwarek konya? Komam VIDIO, raimnai kawos fakfuken na.
-
Ro vidio insanja, rosai monda ḇedwarek Narangerel i fa ifarmyan ḇe Yahwe I?
-
Rariso saswar faro Yahwe I nafnoḇek i fa ibur roi ḇedwarek anna?
Kowasya Amsal 29:25 ma 2 Timotius 1:7, raimnai kawos fakfuken ine:
-
Rosai na ḇefrur ko fa komgak ḇa kobur roi ḇedwarek konya?
6. Kokyar faro Yahwe fafnoḇek Ḇyena
Yahwe na ifnoḇek Au insama swambraḇ fa wafrur roi imarisen na. Komam VIDIO, raimnai kawos fakfuken na.
-
Ro vidio insanja, rosai ḇefrur fa snon ḇefarkor Refo ani imgak kaker fa ḇyebaptis?
-
Rosai ḇefnoḇek i fa ikyar syadi faro Yahwe I?
Kowasya Yesaya 41:10, 13, raimnai kawos fakfuken ine:
-
Rosai ḇefrur fa wakyar Auma swambraḇ fa wafrur raris rosai wakofen kwar ḇe Yahwe I?
7. Besyowi kaku Yahwe saswar Ḇyena
Yahwe saswar ḇeba Ḇyena ḇe Au na kwarauser na kada, nari wakofen kasumasa kaku, ma nari wamarisen syadi fa wafarmyan ḇe I isof fyoro-fyoro. Kowasya Mazmur 40:5, raimnai kawos fakfuken ine:
-
Barakas ḇeramuma ro Yahwe I, minsai besyowi kaku na?
Nabi Yeremia iswar Yahwe I ma wos Ḇyena. Ḇyesyowi kaku syowi ḇeba ismai kwar fa ḇye manfamyan faro Yahwe I. Doḇe, ”Wos Bena nafrur fa sne yedi imarisen ma iryaḇ. Snar yun snonsnon Bedi, sye Yahwe.” (Yeremia 15:16) Kwarem fakfuken nane:
-
Rosai ḇefnai fa kun snonsnon Saksi Yahwe ima syowi ḇeba kaku diri?
-
Wamarisen wakḇebaptis ḇe Saksi-Saksi Yahwe ke?
-
Roi ono naisya nadwarek kaker Au fa bebaptis ke?
-
Kwara ido, rosai na wakfrur kaku insama wakḇebaptis?
SIA SOḆE: ”Yamgak yaḇebaptis kwar ido, na yafrur raris rosai yakofen kwar na ḇa.”
-
Wakkara rarirya ke?
FARKARKOR ḆYENA
Yahwe nari ifnoḇek Au fa mam pyum insama roi ono nadwarek awer Au fa wakḇebaptis.
Waswarepen Kaḇer
-
Wasmai fawawi nabor syadi resari insape bebaptis ke?
-
Rosai na wafrur kaku ḇepon resari insama wakḇebaptis?
-
Rosai ḇefnai fa makakak ya nadwarek awer Au fa wakḇebaptis?
SWEWAR NABOR WER
Ipyum ya rosai ḇedif kaku Au fa wakḇebaptis ya?
”Fasos Kwar fa Wakḇebaptis Ke?” (Syap Baryas paik Maret 2020)
Moḇsa mam pyum insama roi ono nadwarek awer Au fa wakḇebaptis?
”Rosai Ḇedwarek Aya fa Yakḇebaptis?” (Syap Baryas paik Maret 2019)
Mam rariso snon oso myam pyum roi ḇeḇeso ḇedwarek i fa dakḇebaptis.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
