SIN DING THU 47
Tui Na Kiphum Thei Ta Ding Hiam?
Lai Siangtho na sinna panin Jehovah’ thu tampi na thei ta hi. Na theihkhiat thute zui dingin kikhelna pawlkhat zong bawl khin kha ding hi teh. Ahih hangin Jehovah kiangah ki-ap a, tui kiphum thei nai lo ding bangin kingaihsun khathei hi teh. Hih sin ding thu-ah tui kiphum ma-a na tuahkhak theih haksatnate le na paltan theih dante kikum ding hi hang.
1. Tui na kiphum ma-in Lai Siangtho thu theihna bangzah na neih ding kisam a hiam?
Tui na kiphum ma-in ‘thuman na theih ding’ kisam hi. (1 Timoti 2:4) Tua pen, Lai Siangtho thu khempeuh thei khin ding cihna hi lo hi. Bang hang hiam cih leh, tui kiphum zawh a sawt Khristiante nangawn in sinsin lai uh hi. (Kolose 1:9, 10) Ahih hangin tui na kiphum ma-in na theih dinga a kisam Lai Siangtho’ thu pawlkhat om hi. Pawlpi upate in tua bang theihna a kicinga na neih le neih loh na theih nadingin hong huh ding uh hi.
2. Tui na kiphum ma-in bangteng na sep ding kisam a hiam?
Tui na kiphum ma-in ‘na mawhna na kisik’ ding kisam hi. (Sawltak 3:19-20 sim in.) Na mawhnate adingin nakpi taka khasia-in Jehovah kiangah mawh maisakna nget ding kisam cihna hi. Gamtat hoih lote paikhia-a Pasian’ deihna lampi banga nungta dingin thu na khensat ding zong kisam hi. Tua banah, pawlpi kikhopnate-ah kihelna le tui a kiphum nai lo taangko mi khat banga taangko nasepna-ah kihelin pawlpi mi na suah ding zong kisam hi.
3. Bang hangin launa lungsim neih kul lo a hiam?
Mi pawlkhat in Jehovah tunga a kamciam uh banga a sep zawh loh khak ding lau uh hi. Lai Siangtho sunga a citak numei, pasalte nangawn in zong mawhna khailhna nei kha uh ahih manin nang zong nei khathei ding hi teh. Ahih hangin Jehovah in amah a bia mite kiang panin cingtaakna lamen lo hi. (Late 103:13, 14 sim in.) Na hih theihzah a na sep ciangin Pasian lungkim hi! Amah in hong huh ding hi. Jehovah in: “Bang mah in ama hong itna tawh hong kikhensakzo het lo ding hi,” ci-in hong kamciam hi.—Rom 8:38, 39 sim in.
ZON BEH INLA, MUH BEH IN
Jehovah’ thu na theih behna le a huhna na sanna tawh tui kiphum dinga haksatnate na paltan theih dan kan in.
4. Jehovah’ thu na theih semsem nadingin kan in
Tui na kiphum ma-in Jehovah’ thu bangzah ciang na theih ding kisam a hiam? Pasian itin ama maipha ngahnopna lungsim na neih dongin ama thu na theih ding kisam hi. Leitung bupa Lai Siangtho a sinte in tua bang lungsim a neih dan uh na theih nadingin VIDEO hong in. Tua khit teh a nuai-a dotna kikum un.
-
Hih video-ah, mi pawlkhat tui kiphum thei dingin bang in huh a hiam?
Rom 12:2 sim in. Tua khit teh hih dotnate kikum un:
-
Lai Siangtho le Jehovah Tecite in thuman thutak hilh uh cih muanlahna na nei hiam?
-
Muanlahna na neih leh bang hih thei na hiam?
5. Tui kiphum dinga haksatnate paltan in
Jehovah kiangah ki-ap a tui kiphum dinga thu i khensat ciangin, i vekpi-in haksatna i tuak hi. Tua bang haksatna a tuak khat na muh nadingin VIDEO hong in. Tua khit teh a nuai-a dotna kikum un.
-
Hih video-ah, Narangerel in Jehovah a biak nadingin koi bang haksatnate paltan a hiam?
-
Jehovah a itna in tua haksatnate paltan dingin koici huh a hiam?
Paunak 29:25 le 2 Timoti 1:7 sim in. Tua khit teh hih dotna kikum un:
-
Haksatnate paltan dingin bang in hangsanna hong neisak a hiam?
6. Jehovah’ huhna muang in
Jehovah in amah lungkimsak dingin hong huh ding hi. VIDEO hong in. Tua khit teh a nuai-a dotnate kikum un.
-
Hih video-ah, Lai Siangtho a sin pa in bang hangin tui kiphum ngam pak lo a hiam?
-
Jehovah a muanna a khangsak bang thute sin a hiam?
Isaiah 41:10, 13 sim in. Tua khit teh hih dotna kikum un:
-
Na ki-ap lai-a na kamciam tangtungsak zo ding cih bang hangin muang thei na hiam?
7. Jehovah’ hong itna tunga na lungdamna khangsak in
Jehovah’ hong itna a nasiat dan ngaihsunsun lecin Pasian tungah na lungdam semsem ding a, a tawntungin amah biaknopna lungsim nei semsem ding hi teh. Late 40:5 sim in. Tua khit teh hih dotna kikum un:
-
Jehovah hong piak thuphate lakpanin bang tungah lungdam pen na hiam?
Kamsang Jeremiah in Jehovah le a thu it hi. Jehovah’ min a puak theih manin lungdam mahmah hi. Amah in, “Na thute kei adingin kipahna le lungdamna ahi hi. Bang hang hiam cih leh nangma minin kei hong kilo hi,” ci-in gen hi. (Jeremiah 15:16) Hih dotnate dawng in:
-
Jehovah Teci khat suah pen bang hangin hamphat huai a hiam?
-
Jehovah Teci khat suak dingin tui na kiphum nuam hiam?
-
Tui na kiphum nading a lem lohna khat peuhpeuh a om hiam?
-
Tui na kiphum theih nadingin bang hih ding kisamin thei na hiam?
MI PAWLKHATTE’ GEN: “Tui ka kiphumkhit ciang ka kamciam banga ka sep zawh loh ding patau ing.”
-
Tua bangin na patau hiam?
TOMLAKNA
Jehovah’ huhna tawh tui kiphum dinga na haksatna khempeuh na paltan zo ding hi.
Kikupkikna
-
Tui na kiphum theih nadingin Lai Siangtho theihna bangzah ciang na neih ding kisam a hiam?
-
Tui na kiphum ma-in bang kikheelnate na hih ding kisam khathei a hiam?
-
Bang hangin launa lungsim neih kul lo a hiam?
THEIH BEH NADING
Tui na kiphum nading a hang ngaihsun in.
“Tui Na Kiphum Thei Ta Ding Hiam?” (Vilnatausang, March 2020)
Haksatnate paltan theih dan ding kan in.
“Tui Ka Kiphum Nading Bang In Hong Kham A Hiam?” (Vilnatausang, March 2019)
Pasal khat in tui a kiphum theih nadinga haksatna liante a paltan theih dan en in.
Ataa pen tui kiphum ngam pak lo hi. Tui kiphum dinga huhna a ngah dan en in.
