YI 47

¿Bʉra buru kʼoeseabʉka?

Bed’eabira

Daizeze Bedʼea kʼawua jʉdrʉdadeba Jeowa ʉ̃rʉ audre kʼawuasi. Adewara bʉa kʼawua wãta owã bʼaibara. Mamina bʉita nekʼãrẽ aba amaeita zare bʼaibara bʉ bebʉ Jeowaʼa diaita akʉza buru kʼoeita. Naʉ̃ne kʼawuadayi sãwũã ʉ̃kʉrʉba bedʼea zroma ũduda ara osidata ãyi buru kʼoei naena akʉza kʼawuadayi bʉra kʼãrẽta oseabʉta buru kʼoeita.

1. ¿Daizeze Bedʼea ʉ̃rʉ kʼãrẽaba kʼawuabaibara buru kʼoei naena?

Daizeze Bedʼeaba jarabʉ kʼawuadaibarata wãrĩnuta buru kʼoei naweda (1 Timoteo 2:4). Naʉ̃ba jarakĩrãbʉ ẽ bʉa jõma kʼawuabaibarata sãwũã panʉita bʉa widibʉdade Daizeze Bedʼea ʉ̃rʉ. Yi buru kʼoeda dããra badarabida audre kʼawua wãibara (Colosenses 1:9, 10). Mamina bʉa kʼawuabaibara Daizeze Bedʼeade ʉ̃kʉrʉ edabʉta. Zõrãrã kongregasionebemaba kʼarebayi bʉa kʼãrẽaba kʼawuabʉ kʼawuaita Daizeze Bedʼea ʉ̃rʉ.

2. ¿Kʼãrẽta oibara buru kʼoei naweda?

Daizeze Bedʼeaba jarabʉ: «Kayiruara idubʉra akʉza jẽda zera» (akʉra Hechos 3:19). ¿Bʉa maʉ̃ra sãwũã oseabʉ? Maʉ̃ba jarabʉ sopʉa bʼaibarata bʉa nekayirua oda kʼarea akʉza Jeowa widibara bʉa odata kĩrãduamarẽã. Adewara wua nemitiata oẽ baibara, awuarabʉrʉ Jeowaba jarabʉde bʼaibara. Akʉza edabaibara kongregasionba nekʼãrẽ obʉde, naʉ̃ba jarakĩrãbʉ ãba yi jʉrebarieda wãita akʉza jaradia wãita buru kʼoebʉ ẽ mina.

3. ¿Kʼãrẽa pera yi edebi ẽ baibara dayi buru kʼoei naena?

Ʉ̃kʉrʉra perapanʉ iya Jeowa oya adata oẽ bai baera. Bʉra kayirua ozeseabʉ, mawũã berabarisi nabema ẽbẽrarã kʼẽrẽpa badarasida. Kĩrãbera Jeowaba jʉ̃ãbʉ ẽãta iyi kʼaidu panʉrãra kayirua okabaita (akʉra Salmo 103:13, 14). Iyira sobiabʉ bʉa zarea obʉbʉrʉ jõma daucha oita, iyara kʼarebayi maʉ̃ ũduita. Jeowabara jarabʉ nekʼãrẽ baduba «jĩgara bʉ ẽ bayi Daizeze kãgadebara» (akʉra Romanos 8:38, 39).

AUDRE BIʼIA KʼAWUADADRɄ

Kʼawuadayi sãwũã Jeowa ũdukʼawuabʉrʉba akʉza kʼãrẽ bedʼea zroma ũdubʉmina iyi kʼarebata ĩjãnara buru kʼoeseabʉta.

4. Biʼia ũdukʼawua wãra Jeowara

¿Bʉara Jeowara kʼãrẽaba ũdukʼawuaibara buru kʼoei naena? Bʉara Jeowara ũdukʼawua bʼaibara iyi kãga zeira akʉza iyi bedʼea ũrĩkĩrãira. Akʉra BIDEOTA, sãwũã Daizeze Bedʼea ʉ̃rʉ kʼawuapanʉraba naʉ̃ drʉa jõmaʉ̃nẽbemaba maʉ̃ra ozebʉrʉta, mõbe naʉ̃ta panʉidua:

BIDEOTA: ¿Kʼãrẽta oibarata buru kʼoeita? (3:56)

Bideode ũdudadebara, ¿kʼãrẽba kʼarebasi Daizeze Bedʼea kʼawuabarirãra ãyi buru kʼoe zeita?

Akʉra Romanos 12:2, mõbe naʉ̃ta panʉidua:

¿Daizeze Bedʼeade jarabʉra bʉara biʼia ũrĩbʉka? ¿Bʉmara Jeowa ʉ̃rʉ Kʼawuabipanʉrãbara wãrĩnuta jaradiapanʉka?
Maʉ̃ta mejãcha ĩjã ẽ bʉrʉ, ¿kʼãrẽta oseabʉ?

5. Ara ora badu bedʼea zroma zebʉrʉra

Dayirã jõmaʉ̃ta bedʼea zroma ũdupanʉ dayi bebʉ Jeowaʼa diakĩrãbʉde akʉza buru kʼoeitabʉde. Ẽbẽra maʉ̃ berabarida ʉ̃rʉ kʼawuaita akʉra BIDEOTA, mõbe naʉ̃ta panʉidua:

BIDEOTA: Jeowa kãgaba kʼarebabʉ bedʼea zroma ara oita (5:22)

¿Kʼãrẽta oibarabasi Narangerelʼbara Jeowa ode wãita?
¿Sãwũã kʼarebasi Jeowa kãgaiba maʉ̃ bedʼea zroma ara oita?

Akʉra Proverbios 29:25 akʉza 2 Timoteo 1:7, mõbe naʉ̃ta panʉidua:

¿Kʼãrẽba zarea diasebʉ bedʼea zroma ara oita?

6. Ĩjãra Jeowaba kʼarebaita

Jeowabara kʼarebayi bʉa omarẽã iya kãgabʉ oita. Akʉra BIDEOTA, mõbe naʉ̃ta panʉidua:

BIDEO: Jeowaba kʼarebayi bʉra (2:50)

¿Kʼãrẽa perabasi buru kʼoeira ẽbẽra naʉ̃ bideodebemara?
Iya nekʼãrẽ nebia ʉ̃rʉ kʼawuasi Jeowa ĩjãita, ¿kʼãrẽbasi maʉ̃ra?

Akʉra Isaías 41:10, 13, mõbe naʉ̃ta panʉidua:

¿Kʼãrẽa wãrĩnu ĩjãseabʉ bʉa Jeowa oya adara bʉ bebʉ diabʉrʉdera oita?

7. Sobiabara Jeowaba kãgabʉ baera

Bʉa krĩchabʉrʉde Jeowaba bʉ kʼãrẽaba kãgabʉ ʉ̃rʉ, audre biga diayi akʉza audre okĩrãñi Jeowaba jarabʉta. Akʉra Salmo 40:5, mõbe naʉ̃ta panʉidua:

¿Kʼãrẽ nebia Jeowaba bʉaʼa diadata audre kãga?

Propeta Jeremíasbara kãgabasi Jeowara akʉza iyi Bedʼeara. Mejãcha sobiabasi Jeowa trʉ̃ ʉ̃rʉ jaradiabʉ baera. Iya jarasi: «Mʉ̃ sobia baribasi bʉ bedʼeara mʉ̃ soitara, mʉ̃a erbʉ bʉ trʉ̃ra, Zeze Jeowa» (Jeremías 15:16). Panʉra naʉ̃ bedʼea widibʉta: