Cabʌlix chuqui an a cʌñʌ tiʼ tojlel Jehová cʼʌlʌl cheʼ bʌ tsaʼ caji a chʼʌm ili estudio. Cheʼ jaʼel, cabʌlix chuqui an a qʼuexta chaʼan maʼ mel chuqui miʼ yʌl jiñi Biblia. Pero tajol an chuqui woli (choncol) i mʌctañet chaʼan maʼ wʌcʼ a bʌ ti Jehová yicʼot maʼ chʼʌmeʼ jaʼ. Ti ili cʌntesʌntel mi caj laj qʼuel chuqui tac an i meleyob cabʌl estudiantejob chaʼan miʼ mejlelob i chʼʌmob jaʼ i chuqui miʼ mejlel a mel jaʼel chaʼan maʼ chʼʌmjaʼ.

1. ¿Bajcheʼ cʼamel yom a wujil jiñi Biblia chaʼan maʼ chʼʌmjaʼ?

Chaʼan maʼ chʼʌmeʼ jaʼ yom maʼ cʌn «ti tsʼʌcʌl jiñi i sujmlel» (1 Timoteo 2:4). Pero jiñi mach yomic i yʌl chaʼan cheʼ bʌ maxto a chʼʌmʌ jaʼ yomix a wujil jacʼol pejtelel jiñi cʼajtiya tac muʼ bʌ i mejlel chaʼan bʌ jiñi Biblia. Jinto jaʼel jiñi añix bʌ ora i chʼʌmʌyob jaʼ yomʌch miʼ bej cʌñob jaʼel chaʼan bʌ jiñi Biblia (Colosenses 1:9, 10). Pero yomʌch bʌ maʼ wen chʼʌmben i sujm jiñʌch jiñi ñaxan tac bʌ cʌntesa am bʌ yaʼ ti Biblia. Jiñi ancianojob yaʼ ti congregación mi caj i coltañetob a qʼuel bajcheʼ cʼamel maʼ chʼʌmben i sujm jiñi i chaʼan tac bʌ Biblia.

2. ¿Chuqui tac yom maʼ mel cheʼ muʼto caj a chʼʌmjaʼ?

Jiñi Biblia miʼ yʌl: «Chaʼ ñaʼtan laʼ bʌ i sutqʼuin laʼ bʌ» (pejcan Hechos 3:19). Ili jiñʌch yom bʌ maʼ ñaxan mel cheʼ bʌ muʼto caj a chʼʌmjaʼ. ¿Chuqui yom i yʌl iliyi? Chaʼan yom maʼ wubin a chʼijyemlel chaʼan pejtelel chuqui mach bʌ weñic tsaʼ mele i chaʼan maʼ cʼajtiben Jehová chaʼan miʼ ñusʌbeñet jiñi a mul. Cheʼ jaʼel, yom i yʌl chaʼan maʼ junyajl cʌy a mel pejtelel mach bʌ weñic i chaʼan cheʼix maʼ chumtʌl cheʼ bajcheʼ miʼ mulan Dios. Yicʼot jaʼel, yom i yʌl chaʼan tiʼ bele ora mi caj a tempan a bʌ a wicʼot jiñi congregación yicʼot muqʼuix a loqʼuel ti subtʼan.

3. ¿Chucoch mach yomic miʼ mʌctañet jiñi a bʌqʼuen chaʼan maʼ chʼʌmjaʼ?

An muʼ bʌ i bʌcʼñañob chaʼan miʼ chaʼleñob mulil i chaʼan maʼañic miʼ tsʼʌctesañob tsaʼ bʌ i subeyob Jehová. Tajol mucʼʌch caj a mel mach bʌ weñic cheʼ bajcheʼ tsaʼ ujti tiʼ tojlel wiñicob yicʼot xʼixicob xucʼuloʼ bʌ muʼ bʌ i yʌjlelob yaʼ ti Biblia. Pero cʼajtesan chaʼan Jehová maʼañic miʼ pijtan chaʼan luʼ tojonla (pejcan Salmo 103:13, 14). Tijicña mi caj i yubin i bʌ cheʼ mucʼʌch a mel bajcheʼ cʼamel mi a mejlel. Cheʼ jaʼel, mi caj i coltañet. Dios miʼ yʌcʼ i tʼan chaʼan maʼañic chuqui «mi caj i mejlel i tʌtsʼonla tiʼ cʼuxbiya» (pejcan Romanos 8:38, 39).

 LAʼ LAC ÑUMEN ÑAʼTAN

4. Wen cʌñʌ Jehová

5. Mach a wʌcʼ chaʼan jiñi wocol tac miʼ mʌctañet

 6. Ñopo chaʼan Jehová mi caj i coltañet

7. Wen qʼuele ti ñuc jiñi i cʼuxbiya Jehová

 TSAʼ BɅ LAJ CɅÑɅ

Yicʼot i coltaya Jehová, miʼ mejlel a mʌlben pejtelel chuqui miʼ mejlel i mʌctañet chaʼan maʼ chʼʌmjaʼ.

¿Chuqui tsaʼ cʌñʌ?

• ¿Bajcheʼ cʼamel yom a wujil chaʼan bʌ Biblia chaʼan maʼ chʼʌmjaʼ?

• ¿Chuqui tac yom maʼ mel cheʼ muʼto caj a chʼʌmjaʼ?

• ¿Chucoch mach yomic miʼ mʌctañet jiñi a bʌqʼuen chaʼan maʼ chʼʌmjaʼ?