TOLI 47

I kaba fu dopu?

PEE

I kaba fu dopu?

A sutudeli di ye sutudeli Beibel yeepi i fu sabi Yehofa moo bun. Kande a omen sani i kengi aini i libi fu di ye meke moiti fu du sai leli. Ma kande wan sani e tapu i fu dopu. Wo luku wantu sani aini a pisi ya di e tapu sama fu paamisi Yehofa taki den o dini en, da den dopu. Yo si sai sa du fu den sani ya á tapu i fu dopu.

1. Sai mu sabi fosi i dopu?

Fosi wan sama dopu, a mu ‘sabi a waaleiti soifili’ (1 Timoteyesi 2:4). A sani ya á wani taki i mu sabi ala sani fu a Beibel. Winsi on langa wan Kelesten dopu, toku a nai kaba leli sani (Kolosesama 1:9, 10). Ma fosi wan sama dopu, a mu sabi den moo pelensipali leli fu Beibel. Den owluman fii kemeente sa yeepi i fu sabi efii sabi sani sai fu man dopu.

2. San a wantu sani di i mu du fosi i dopu?

Fosi i dopu, ‘i mu soi taki den sondu di i be e du fosi e hati i, i mu kengi a fasi fai be e libi tu’. (Leisi Toli fu den apostel 3:19.) Baka te i soi taki den sani di i be e du fosi e hati i, da i mu begi Yehofa fu a gii paadon. Ya mu du sani moo di Yehofa á lobi. I mu meke moiti tu fu libi enke fa Gadu wani. Boiti dati, i mu e go a den komakandaa. I mu e peleiki tu makandaa anga a kemeente.

3. Saide ya mu feele fu dopu?

Son sama e si enke den naw poi libi enke fa Yehofa wani. A tuu taki yo go e misi son yuu, leti enke den sama di be e dini Gadu a fositen. Yehofa sabi taki wo go e meke fowtu, bika wi abi sondu. (Leisi Psalm 103:13, 14.) Ai piisii te ai si a moiti di ye meke. Aw yeepi i tu fu libi enke fa a wani. Yehofa paamisi u taki ‘sani á de di poi tapu en fu lobi u’.—Leisi Romesama 8:38, 39.

LUKU A TOLI YA MOO FINI

Luku fa a sabi di yo sabi Yehofa moo bun, o yeepi i fi ya feele fu dopu. Wo si tu fa Yehofa o yeepi i fu du san a wani.

4. Leli sabi Yehofa moo bun

Omen sani fu Yehofa i mu sabi fosi i dopu? Den sani di i sabi fu Yehofa fosi i dopu, mu yeepi i fu lobi en. Den mu yeepi i fu libi enke fa a wani tu. Pee a FELON, da yo si fa wantu sama di be e sutudeli Beibel du a sani ya. Baka dati da i luku efii poi piki a akisi ya.

FELON: Den sani di i mu du fu man dopu (3:56)

San den sama aini a felon ya du fosi den dopu?

Leisi Romesama 12:2, baka dati da i luku efii poi piki den akisi ya:

Wan sani de aini Beibel di i leli di i nai kaba biibi? Wan sani de di meke i nai kaba biibi taki a den Yehofa Kotoigi abi a tuu biibi?
Sai sa du efii nai kaba biibi son sani?

5. Ná meke sani tapu i fu dopu

Tesi e miti ala sama di wani dopu. Efii wani sabi sowtu tesi e miti son sama di be wani dopu, pee a FELON, da i luku efii poi piki den akisi ya.

FELON: Te i lobi Yehofa, sani ná o tapu i fu dini en (5:22)

Sowtu tesi miti Narangerel di a bigin dini Yehofa?
Fa a lobi di a be lobi Yehofa yeepi en fu pasa den tesi ya?

Leisi Odo 29:25 anga 2 Timoteyesi 1:7, da i luku efii poi piki a akisi ya:

San o yeepi i fu pasa den tesi di e miti i?

6. I mu biibi taki Yehofa o yeepi i

Yehofa o yeepi i fu du sani di o meke a piisii. Pee a FELON, da i luku efii poi piki den akisi ya.

FELON: Yehofa o yeepi i (2:50)

San be e tapu a Beibelsutudi aini a felon ya fu dopu?
San yeepi en fu biibi taki Yehofa o holibaka gi en?

Leisi Yesaya 41:10, 13, da i luku efii poi piki a akisi ya:

Saide i sa biibi taki Yehofa o yeepi i fu du sai paamisi en?

7. Soi taki ye teke en fu bigi taki Yehofa lobi i

Te ye teke ten pakisei fa Yehofa soi taki a lobi i, da yo wani paamisi en taki yo dini en fu teego. Leisi Psalm 40:5, da i luku efii poi piki a akisi ya:

Sowtu wan fu den sani di Yehofa du gii, i moo lobi?

A polofeiti Yelemiya be lobi Yehofa. A be lobi a Wowtu fi en tu. A be e teke en fu bigi, taki a be man tyai a nen fu Yehofa. A be taki a Wowtu fu Yehofa e meke ai piisii aini en ati. A be taigi Yehofa taki: ‘Mi e piisii tuutuu fu tyai i nen’ (Yelemiya 15:16). Luku efii poi piki den akisi ya: