UKPEPN̄KPỌ 47
Ndi ke Eben̄e Idem Man Ana Baptism?
Ofụri se ikpepde ke Bible ke n̄wed emi anam fi ọdiọn̄ọ ediwak n̄kpọ aban̄a Jehovah. Imenịm ke se afo ekpepde an̄wam fi osion̄o ubọk ke n̄kpọ emi mîfọnke. Edi ekeme ndidi odu n̄kpọ ifan̄ emi osụk anamde ọsọn̄ fi ndiyak idem nnọ Jehovah nnyụn̄ nna baptism. Ke ukpepn̄kpọ emi, iyeneme ndusụk n̄kpọ emi esinamde ndusụk owo ẹkûna baptism, ye se afo ekemede ndinam man mmọ idikpan fi ndina baptism.
1. Ekere ke ọkpọdiọn̄ọ Ikọ Abasi adan̄a didie mbemiso anade baptism?
Ọfọn enyene “nnennen ifiọk akpanikọ” mbemiso anade baptism. (1 Timothy 2:4) Edi oro iwọrọke ke ana ebet tutu ama ọdiọn̄ọ kpukpru n̄kpọ ke Bible ndien afo ana baptism. Idem mme Christian emi ẹma ẹkena baptism ẹbịghi ke ẹsụk ẹkpekpep mbufa n̄kpọ ke Ikọ Abasi tutu emi. (Colossae 1:9, 10) Edi enyene akpan n̄kpọ ifan̄ emi Bible ekpepde, oro anade ọdiọn̄ọ kan̄a mbemiso anade baptism. Mbiowo ke esop ẹyen̄wam fi ọdiọn̄ọ m̀mê se ọdiọn̄ọde ekem se anade baptisim.
2. Nso ye nso ke ana anam mbemiso anade baptism?
Ikọ Abasi ọdọhọ yak akabade esịt onyụn̄ afiak edem mbemiso anade baptism. (Kot Utom 3:19.) Ọwọrọ ke ana enen̄ede atua n̄kpọfiọk ke idiọkn̄kpọ emi akanamde onyụn̄ eben̄e Jehovah ete efen ọnọ fi. N̄kpọ en̄wen edi ke ana enen̄ede asua se Abasi asuade onyụn̄ enen̄ede odu uwem nte Abasi amade. Ana ọtọn̄ọ n̄ko ndidụk mbono esop, esitiene abuana ke se ẹnamde do, onyụn̄ ọtọn̄ọ ndikwọrọ ikọ nte asuanetop emi mînaha baptism.
3. Ntak emi mûkpuyakke ndịk anam fi okûna baptism?
Ndịk esinam ndusụk owo ẹkere ke mmimọ idikemeke ndinam se ikọn̄wọn̄ọde inọ Jehovah. Imọdiọn̄ọ ke emekeme ndinam ndudue ndusụk ini, kpa nte nti ikọt Abasi emi ẹsiakde ke Bible ẹkesinamde. An̄wan̄a Jehovah; enye idọhọke ke ana ikọt esie ẹfọfọn ẹma. (Kot Psalm 103:13, 14.) Se enye akam oyomde edi yak afo anam n̄kpọ esie ke ofụri esịt! Enye ayan̄wam fi. Jehovah ọn̄wọn̄ọ ọnọ nnyịn ke n̄kpọ ndomokiet “idikemeke ndidian̄ade nnyịn ke ima [esie].”—Kot Rome 8:38, 39.
SỊN IDEM KPEP
Se nte ndinen̄ede ndiọn̄ọ Jehovah nnyụn̄ nyak enye an̄wam fi mîdiyakke n̄kpọ ndomokiet akpan fi ndina baptism.
4. Nenēde diọn̄ọ Jehovah
Ọkpọdiọn̄ọ Jehovah adan̄a didie mbemiso anade baptism? Ana ọdiọn̄ọ enye tutu afo ọtọn̄ọ ndima enye, onyụn̄ ayak ima oro anam fi odu uwem nte enye ọdọhọde. Se VIDIO emi ke oyokụt nte nsio nsio owo emi ẹkpepde Bible ke ofụri ererimbot ẹnamde oro. Ekem ẹbọrọ mbụme oro etienede ẹnyụn̄ ẹneme ẹban̄a enye.
-
Ke vidio oro, nso ke ndusụk owo ẹkenam man ẹkeme ndina baptism?
Kot Rome 12:2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi enyene n̄kpọ ke Bible m̀mê n̄kpọ emi Mme Ntiense Jehovah ẹkpepde emi mûnịmke?
-
Ekpedi odu, ekere ke nso ke afo ekeme ndinam mban̄a oro?
5. Nam se ikemede ndin̄wam fi ana baptism
Enyene nsio nsio n̄kpọ emi esifịnade kpukpru nnyịn ima iyom ndiyak idem nnọ Jehovah nnyụn̄ nna Baptism. Ke uwụtn̄kpọ, se VIDIO emi, ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
-
Ke vidio oro, nso ikoyom ndinam Narangerel okûnam n̄kpọ Jehovah?
-
Nso ke ima emi enye amade Jehovah akan̄wam enye anam?
Kot Mme N̄ke 29:25 ye 2 Timothy 1:7, ekem ẹbọrọ mbụme emi ẹnyụn̄ ẹneme ẹban̄a enye:
-
Nso isinam nnyịn ikûyak n̄kpọ ndomokiet akpan nnyịn ndinam n̄kpọ Jehovah?
6. Nịm ke Jehovah ayan̄wam fi
Jehovah ayan̄wam fi esinam se enye amade. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ke vidio oro, nso ikanam owo ẹkesikpepde Bible do okûyom ndina baptism?
-
Nso ke enye ekekpep emi akanamde enye enịm ke Jehovah ayan̄wam imọ?
Kot Isaiah 41:10, 13, ekem ẹbọrọ mbụme emi ẹnyụn̄ ẹneme ẹban̄a enye:
-
Nso inam fi enịm ke eyekeme ndinam se ọn̄wọn̄ọde ọnọ Abasi ini ayakde idem ọnọ enye?
7. Nen̄ede kọm Jehovah ke utọ ima emi enye amade fi
Ekpetie ekere se Jehovah anamde ọnọ fi, oro ayanam fi enen̄ede ama enye, ndien ima oro ayanam fi oyom ndinam n̄kpọ esie ke nsinsi. Kot Psalm 40:5, ekem ẹbọrọ mbụme emi ẹnyụn̄ ẹneme ẹban̄a enye:
-
Ke otu mme n̄kpọ emi Jehovah anamde ọnọ fi, ewe ye ewe ke ama akan?
Prọfet Jeremiah ama ama Jehovah Abasi ye ikọ esie etieti, onyụn̄ enen̄ede ama ndidi owo Abasi tutu enye ọdọhọ Abasi ete: “Ikọ fo onyụn̄ akabade edi n̄kpọ idara ọnọ mi ye se idatde mi esịt; koro ẹkotde mi ẹdian enyịn̄ fo, O Jehovah Abasi.” (Jeremiah 15:16) Bọrọ mbụme ifan̄ emi ise:
-
Ntak emi edide ata n̄kpọ ukpono nditiene ndi Ntiense Jehovah?
-
Ndi omoyom nditiene nna baptism nte Ntiense Jehovah?
-
Ndi enyene se ikpande fi ndinam oro?
-
Ekere ke nso ke akpanam man ekeme ndina baptism?
NDUSỤK OWO ẸSIDỌHỌ ẸTE: “Etie mi nte nyanam akwa idiọkn̄kpọ mma nna baptism mma.”
-
Ndi esitie fi ntre n̄ko?
SE IKPEPDE
Jehovah ekeme ndin̄wam fi akan se ededi emi oyomde ndinam fi okûna baptism.
Se M̀mê Emeti
-
Ekere ke ọkpọdiọn̄ọ Bible adan̄a didie mbemiso anade baptism?
-
Mme n̄kpọ ewe ke ọkpọfọn etre mbemiso anade baptism?
-
Ntak emi mûkpuyakke ndịk akpan fi ndina baptism?
KPEP N̄KPỌ EN̄WEN
Se ntak emi ekpebierede ndina baptism.
“Ndi Emeben̄e Idem Ndina Baptism? (Enyọn̄-Ukpeme, March 2020)
Se se akpanamde edieke ndusụk n̄kpọ oyomde ndinam fi okûna baptism.
Se se ete kiet akanamde man n̄kpọ okûkpan enye ndina baptism.
Enyene ini emi Ataa mîkoyomke ndina baptism. Edi se se ikedinamde enye ana baptism.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
