BEƊEA 47
¿Bʉa ya poya borocueida?
Bʉa ya bio cawa ɓʉda Jeowaɗebemara, dãrãbʉrʉɗe eɗa Ãcõrẽ Beɗea estudiaɗa bẽrã. Bʉa Ãcõrẽ Beɗea cawapeɗa zocãrã ne biada osida ne awara oi carea. Baribʉrʉ, bʉa ewari aɓaʉɗe poya crĩchaida poya ɓaẽ́da Jeowaɗeda idjaɓa poya borocueẽ́ ɓʉda. Baribʉrʉ naʉ̃ beɗeaɗe bʉa cawaida ẽberãrãba cãrẽda o panasiɗada borocueɗi carea idjaɓa bʉa ara maʉ̃ quĩrãca poya quĩchaida bʉ borocuei carea.
1. ¿Jũmasã bʉa cawaida ɓʉa Ãcõrẽ Beɗeaɗe bʉ borocuei carea?
Bʉa borocuei carea, bʉa “wãrã beɗeada [cawaida ɓʉ]” (1 Timoteo 2:4). Jãʉ̃ beɗeaba jara ɓʉẽ́a bʉa jũma cawaida ɓʉda Ãcõrẽ Beɗeara borocuei naẽna. Critianorãra dãrãbʉrʉa borocuepeɗaɗada ãdjirãba waɗi biɗa mãsa cawaɗida panʉa Ãcõrẽ Beɗeara (Colosa 1:9, 10). Baribʉrʉ bʉ borocuei carea Ãcõrẽ Beɗeaɗe biara ɓʉda cawaida ɓʉa. Djabarã wagabadarãba bʉ́a jaraɗida cãrẽbʉrʉ bʉa bio cawaida ɓʉda bʉ borocuei carea.
2. ¿Bʉa cãrẽda oida ɓʉda borocuei naẽna?
Ãcõrẽ Beɗeaba jara ɓʉ: “Cadjiruada igaraɗapeɗa Ãcõrẽmaa zeɗadua” (Leadua Hecho 3:19). Jãʉ̃ra bʉa oida borocuei naẽna. Jãʉ̃ra ¿cãrẽda jara ɓʉda? Jãʉ̃ra jara quĩrĩã ɓʉa bʉra bio sopua ɓʉda naẽna bʉa ne cadjirua oɗa carea, maʉ̃ carea bʉa ʉ̃taa dji idida Jeowaa bʉa ne cadjirua oɗa quĩrãdoamãrẽã. Idjaɓa bʉa waa ne cadjiruara oẽ́da, maʉ̃ cãyãbara aɓabe bʉrʉ ĩjãida Jeowaba jara ɓʉbʉrʉ. Bʉa jãʉ̃da jãwã oibʉrʉ bʉra ɓaida congregacioʉ̃nebemame, maʉ̃ carea bʉa dadjirãme ãbaa jʉre ɓaida idjaɓa Ãcõrẽ Beɗea jaradiaida borocueẽ́ ɓʉmĩna.
3. ¿Cãrẽ cãrẽã wayaẽ́da bʉa borocuei carea?
Ʉ̃cʉrʉ ẽberãrãba waya quĩchabadada jũma ĩjãẽ́da Jeowaba jara ɓʉra. Eɗauɗe bʉa ne cadjirua poya oida. Ʉ̃cʉrʉ umaquĩrãba idjaɓa ʉ̃cʉrʉ wẽrãrãba ãdjia bia ĩjã panasiɗamĩna Ãcõrẽ beɗeara ewari aɓaʉɗe ãdjia ne cadjirua osiɗada. Baribʉrʉ quĩrãnebadua Jeowaba cawa ɓʉda dadjirãra jipaẽ́ panʉda (Leadua Salmo 103:13, 14). Ãcõrẽba bia unuida bʉa zarea trajaibʉrʉ idji carea, jũma bia oi carea. Idjaɓa Jeowaba bʉra carebaida ne bia oi carea. Maʉ̃ bʉrʉ idjia jara ɓʉda “ni cãrẽ Ãcõrẽba oɗaɗebema biɗa dadjirãra idji quĩrĩãnebemada poya ãyã ɓʉɗaẽ́a” (Leadua Romano 8:38, 39).
BIO CAWAƊIDA NAɄ̃ BEƊEAƊE
Acʉɗida cãrẽba poya carebaida wayaẽ́ carea borocuei carea: biara cawaida Jeowara idjaɓa iduari ɓeɗida idjia carebamãrẽã.
4. Biara cawaida Jeowara
¿Jũmasãwã cawaida ɓʉ Jeowara borocuei carea? Bio waiɓʉa cawaida ɓʉa ĩjãi carea Jeowara idjaɓa bio quĩrĩãi carea. Acʉɗadua dji VIDEODA cawaɗi carea cãrẽda obadjiɗaa Ãcõrẽ Beɗea cawabadarãba poya borocueɗi carea. Mãwãnacarea beɗeaɗadua.
-
Naʉ̃ videoɗe acʉbi ɓʉ quĩrãca, ¿cãrẽba carebasida Ãcõrẽ Beɗea cawabadarãba borocueɗi carea?
Leaɗapeɗa Romano 12:2, beɗeaɗadua:
-
Bʉmaarã, ¿Ãcõrẽ Beɗeaba jara ɓʉra jũma ĩjã ɓʉda? Bʉmaarã, ¿Beɗea ɓeara Jeowaɗebemarãba wãrãda jaradiabadada?
-
Bʉa jũma ĩjãẽ́bʉrʉ, ¿cãrẽda poya oida?
5. Beɗea droma eroɓʉmĩna ĩjãdua Ãcõrẽra
Jũmarãda borocuesiɗaɗe beɗea dromara eroɓasiɗaa. Ne jara ɓʉ quĩrãca, acʉɗadua dji VIDEODA. Mãwãnacarea beɗeaɗadua.
-
¿Narangelba cãrẽda oibara ɓasida ĩjãi carea Jeowara?
-
¿Bio quĩrĩã ɓaɗa bẽrã Jeowara cãrẽba carebasida idjia ĩjãi carea Jeowara?
Leaɗapeɗa Proverbios 29:25 idjaɓa 2 Timoteo 1:7, beɗeaɗadua:
-
¿Cãrẽba poya carebaida dadjirãra beɗea droma eropanʉne?
6. Ĩjãdua Jeowara idjia careba ɓʉ bẽrã
Jeowaba carebaida idjia quĩrĩã ɓʉ quĩrãca bʉa ĩjã ɓamãrẽã. Acʉɗapeɗa dji VIDEODA, beɗeaɗadua.
-
¿Cãrẽã jãʉ̃ ẽberãba Ãcõrẽ Beɗea cawabariba waɗi borocueẽ́ basida?
-
¿Cãrẽba carebasida bio ĩjãi carea Jeowaɗera?
Leaɗapeɗa Isaías 41:10, 13, beɗeaɗadua:
-
¿Bʉa cãrẽã wãrãda cawa ɓʉda Jeowaba jara ɓʉra poya ĩjãida bʉa idjía jaraɗa quĩrãca borocuei carea?
7. Bia ɓʉaɗa jaraida ɓʉa Jeowaba quĩrĩã ɓaera
Bʉa bio quĩcha ɓʉbʉrʉ Jeowaba dadjirãra quĩrĩã ɓʉda, bʉa bia ɓʉaɗa jaraida idjía idjaɓa ĩjã quĩrĩã ɓaida. Leaɗapeɗa Salmo 40:5, beɗeaɗadua:
-
Jeowaba jũma ne bia diaɗa, ¿bʉa cãrẽda biara quĩrĩã ɓʉda?
Ãcõrẽneba beɗeabari Jeremiaba bio quĩrĩã ɓasida Jeowara idjaɓa idjia jara ɓʉra. Idjia bio quĩchabadjia idjía jarabʉdaɗe Jeowaɗebemada, Ãcõrẽ trʉ̃da jaraɗa bẽrã. Idjia jarasia: “Bʉ beɗeaba bio capipiabibarida mʉ̃ sora, maʉ̃ bẽrã mʉ̃ra bio ɓʉsriɗa ɓasia, mʉ̃́a beɗea ɓʉ bẽrã Jeowaɗebemada, bʉ trʉ̃da jaraɗa bẽrã” (Jeremías 15:16). Ara naʉ̃da panuida naʉ̃ idi ɓʉra:
-
¿Cãrẽ cãrẽã bio biara ɓʉda Beɗea ɓea Jeowaɗebema ɓaida?
-
¿Bʉra borocue quĩrĩã ɓʉda Beɗea ɓea Jeowaɗebema ɓai carea?
-
¿Cãrẽã bʉa waɗi poya borocueẽ́ ɓʉda?
-
¿Cãrẽda bʉa oibara ɓʉda borocuei carea?
ẼBERÃRÃBA JARA PANɄRA: “Mʉ̃ra borocueẽ́ ɓʉda, borocueɗacare tẽãbe mʉ̃a ne cadjirua poya oida”.
-
¿Bʉa aɓarica quĩcha ɓʉda?
JŨMA BEƊEAƊA
Jeowaba bʉra poya carebaida beɗea dromara eroɓʉmĩna bʉ borocuei carea.
Cawaɗara
-
¿Jũmasãwã cawaida ɓʉa Ãcõrẽ Beɗeaɗebemada bʉra borocuei carea?
-
¿Bʉa cãrẽda oida ɓʉda borocuei naẽna?
-
¿Cãrẽã wayaẽ́da bʉra borocuei carea?
CAWADUA MÃSA
Bio quĩrãcuita acʉida cãrẽã bʉra borocueida.
“¿Bʉra ya poya borocueida?” (Cartaba Jara ɓʉda, 2020, Marzo)
Cawadua cãrẽã oida borocuei naẽna.
“¿Cãrẽã mʉ̃ra poya borocueẽ́ ɓʉda?” (Cartaba Jara ɓʉda, 2019, Marzo)
Acʉdua umaquĩrãba cãrẽda osida idji borocuei carea beɗea droma eroɓasimĩna.
Umaquĩrã aɓa trʉ̃ jarabada Ataa, idjia jũma ĩjãẽ́ basida borocuei carea Ãcõrẽ Beɗeara. Acʉida idjia cãrẽda osida jũma ĩjãi carea idji borocuei carea.
