À jẹ́ ang lụmẹ-lụmẹ u-uhye nya iJihova bwula ịBayịbụụ ọjẹ́jẹ nyang lẹ. Ọhẹka à dọmwụ nwụ ọhịhị nyang rịrị chajị nyọlẹ ká kpa ẹla ọlẹ ká jẹ́ họ ụkụrwọ lẹ. Ma, ịngịhyẹ ka juwa ọlẹ ọ́ du ká me irya nyori ọwa nyị́ nwụlanọ nyọka hu ịlọwa ju iJihova ụ-ụbwọ bala ọ-ka hu enyi Ohe lẹka myị́. Ang ọjẹ́jẹ ọlẹ ka ya ẹla u-uhye nya ang ịlẹ kị kaa wu angịnyị lụmẹ-lụmẹ kpa la ọ-ka hu enyi Ohe bala abwọlẹ ká ka bwu kụrwaa.

1. Ányị a tị́ baba nyọka jẹ́ ang pwụ́ ene ká ka hu enyi Ohe?

Ene á ka hu enyi Ohe, à baba nyọka “jẹ́ ẹla nya ịlẹhị . . . yẹẹyẹẹ.” (1 iTimoti 2:4) Ọọwa á ri yẹkẹẹ, à ka jẹ́ ọwẹwẹ nya ịtọ ẹla ọnyị myị́ ọnyị bwu ịBayịbụụ ene á ka hu enyi Ohe ka. Angịnyị nya ịKịrayịsị ịlẹ kị dọmwụ hu enyi Ohe lụka ọtata lẹ, kaa kịnyaa la ang inyeewe ọjẹ́jẹ. (Ala iKolosi 1:9, 10) Ma à baba nyọka jẹ́ ẹla ịkpọnchị ịlẹ ká ịBayịbụụ mẹjẹ. Angịgbahị nya ọjịra-jịra ka dang ụbwọ nyọka jẹ́ kori ká ang ọlẹ ká jẹ́ wẹ á nwà lẹ.

2. Ẹta ẹdịyẹ iyina a tị́ baba nyọka hu ene á ka hu enyi Ohe myị́?

Ene á ka jẹ́-ẹ hu enyi Ohe, à baba nyọka “yẹ irya da . . . [bala ọ-ka] nya tịrẹkpẹ chị Ohe Oluhye ọgụ.” (Wa Ụkụrwọ nya Alẹrụ 3:19.) Ọọwa ri, à ka chị ijẹma nya ịhọbịrị ịlẹ ká họ bala ọ-bịlẹ iJihova kọ ka hịnyọhi hang. À ka myịmyị cheje nyọka pwa ang ọtịpyọ ọhọhọ bala o-cheje nyọka hịhị ụ-ụgbẹyị ọlẹ ká Ohe tịtọ. Da ọọwa u-uhye, à ka dọmwụ nyọka ka ọjịra-jịra bala ọ-kpa ẹrụ ọnyịịla pyẹ ta aanahị ịkịla.

3. Ịyẹ tị́ du á ka ya iwe da ká uhihi ka wung kpa ka?

Angịhyẹ kaa juhi kori kị ka jụ ang ịlẹ kị chị iJihova ehe họ myị́ ka. Ẹlịlẹhị ri, ẹla ka gụng gụ họ myị́ ụka ọhẹ, jaabwọ kọ la ẹ-ẹga nya anchẹ nya iJihova ịlụka onyogo ịlẹ kị dọmwụ la ọmyịmyị yẹẹyẹẹ. Ma iJihova-á yahị guru ká anchẹ nyamwụ ka la kpẹẹkpẹẹ ka. (Wa Eje Ọnyịịla 103:13, 14.) Ọ kaa kpọọ ịpyọ ụka ká họ jaabwọ á ka jụ họ ba myị́! Ọ ka dang ụbwọ. IJihova dọmwụ chịhị ehe nyori ịngịngịhyẹ nyị́ “ka jẹ́-ẹ la ọngịrị chịhị ebwo hi ọháha [nya ọwa] kpá myị́ ẹnẹnẹhẹ kaka.”—Wa Ala iRom 8:38, 39.

 JẸ́ GỤ ỌỌWA

4. Jẹ́ iJihova gụ ọwọwa

5. Kụrụ ang ịlẹ kị ka chịng ochuchuu la o-hu enyi Ohe

 6. Dahịhile ụbwọ ọdada nya iJihova

7. Ọháha nya iJihova a myịng lẹhị gụ ọwọwa

 ẸLỊYẸ A TỊ́ JẸ́?

Bwula ụbwọ ọdada nya iJihova, à ka jẹ́-ẹ kụrụ ang myị́ ang ọlẹ kọ ka chịng ochuchuu la o-hu enyi Ohe.

Ẹlịyẹ A Tị́ Yụbwọ Chị?

• Ányị ọ tị́ chịla á ka jẹ́ ịBayịbụụ ka ba ene á ka hu enyi Ohe?

• Ịyẹ a tị́ baba nyọka nwụhọ ọ-ọhịhị nyang ene á ka jẹ́-ẹ hu enyi Ohe?

• Ịyẹ tị́ du ká ka ya iwe da ká uhi ojuju ka wung kpa ka?