LYNNONG 47
Hato Phi Long iba la Pynkhreh ban Ïoh Baptis?
Phi la tip shibun kiei kiei shaphang U Jehobah lyngba ka jingïapule Baibl jong phi. Lehse phi la bud bad pyndonkam ïa ki katto katne ki jinghikai ba phi la ïoh na ka Baibl. Hynrei ka lah ban don kaei kaei kaba khanglad ïa phi ban aiti ïalade ha U Jehobah bad ban ïoh baptis. Ha kane ka lynnong ngin ïa peit ïa ki katto katne ki jingkhanglad ban poi sha ka jingbaptis bad kumno phi lah ban jop ïa ki.
1. Haduh katno phi donkam ban tip shuwa ban ïoh baptis?
Ban ïoh baptis, phi donkam ban don “ka jingtip ïa ka jingshisha.” (1 Timothi 2:4) Kane kam mut ba phi dei ban tip ïa baroh ki jubab jong ki jingkylli ba ki briew ki lah ban kylli shaphang ka Baibl. Wat ki Khristan ba la dep baptis la slem bha ruh ki dang ïai ïoh jinghikai. (Kolossai 1:9, 10) Hynrei phi donkam pat ban tip ïa ki jinghikai bakongsan jong ka Baibl. Ki rangbah balang kin ïarap ïa phi ban tip la phi la sngewthuh ne em ïa kita ki jinghikai.
2. Kiei ki katto katne ki sienjam ba phi dei ban shim shuwa ban ïoh baptis?
Shuwa ban ïoh baptis, phi dei ban “kylla kaba mut, bad . . . phai sha U Blei.” (Pule Kam 3:19.) Kane ka mut ba phi la babe shisha ïa ki pop ba phi la leh bad phi kyrpad ïa U Jehobah ha ka jingduwai ban map ïa phi. Phi kut jingmut ruh ban ym leh shuh ïa kaba sniew bad ban im ka jingim kaba pynsngewbha ïa U Jehobah. Nalorkata, phi wan sha ki jingïalang bad phi sdang ban ïalap lang bad ka balang kum ki nongïalap bym pat baptis.
3. Balei phim dei ban ailad ïa ka jingtieng ba kan khanglad ïa phi?
Don kiba tieng ïoh lehse kin ym lah ban leh ïa kaei kaba ki la kular ïa U Jehobah. Hooid, kin don ki por ba phin bakla, bad wat ki shakri ba hok jong U Blei ruh kiba la thoh ha ka Baibl ki bakla. Hynrei U Jehobah um ju khmih lynti ba ki nongmane jong u kin long kiba janai. (Pule Salm 103:13, 14.) U kmen haba ngi ai ïa kaba bha tam. Un ïarap ïa phi. Pynban, u pynthikna ïa ngi ba kan ym don kaei kaei ruh kaban “pynïakhlad noh ïa ngi na kata ka jingieid jong U Blei.”—Pule Rom 8:38, 39.
WAD SHUH SHUH
Peit kumno ka jingtip kaba kham bha shaphang U Jehobah bad ka jingpdiang ïa ka jingïarap jong u ka lah ban ïarap ïa phi ban jop ïa ki jingeh kiba khanglah ïa phi ban ïoh baptis.
4. Tip shuh shuh shaphang U Jehobah
Haduh katno phi donkam ban tip ïa U Jehobah shuwa ba phin baptis? Phi dei ban tip bha ïa u haduh ba kan da pynlong ïa phi ban ieid ïa u bad ban don ka jingkwah ban pynsngewbha ïa u. Peit ïa ka VIDEO ban ïohi ba kumno ki nongpule Baibl ha kylleng ka pyrthei ki la leh ïa kata. Nangta sa ïa peit lang ïa kane ka jingkylli harum:
-
Ha ka video, kaei kaba la ïarap ïa ki katto katne ngut ban pynkhreh na ka bynta ka jingbaptis?
Pule Rom 12:2, bad nangta sa ïa peit lang ïa kine ki jingkylli harum:
-
Hato phi don kano kano ka jingartatien shaphang kaei ba ka Baibl ka hikai, ne la ki Nongsakhi U Jehobah ki hikai ïa ka jingshisha?
-
Lada phi sngew kumta, kaei kaba phi lah ban leh?
5. Ïaleh ïa ki jingeh kiba lah ban khanglad ïa phi ban ïoh baptis
Baroh ngi mad jingeh haba ngi shim ïa ka rai ban aiti ïalade ha U Jehobah bad ban ïoh baptis. Ban peit ïa ka nuksa, peit ïa ka VIDEO, bad nangta sa ïa peit lang ïa kine ki jingkylli harum:
-
Ha ka video, kiei ki jingeh kiba i Narangerel i la donkam ban ïaleh ban shakri ïa U Jehobah?
-
Kumno ka jingieid ïa U Jehobah ka la ïarap ïa i ban jop ïa kita ki jingeh?
Pule Proberb 29:25 bad 2 Timothi 1:7, bad nangta sa ïa peit lang ïa kane ka jingkylli harum:
-
Kaei kaba ai jingshlur ïa ngi ban ïaleh ïa ki jingeh?
6. Shaniah ha ka jingïarap jong U Jehobah
U Jehobah un ïarap ïa phi ban pynsngewbha ïa u. Peit ïa ka VIDEO, bad peit ïa ki jingkylli harum:
-
Ha ka video, kaei kaba la khanglad ïa i nongpule Baibl ban ïoh baptis?
-
Ka jinghikai aïu kaba la ïarap ïa i ban pynkhlaiñ ïa la ka jingshaniah ha U Jehobah?
Pule Isaïah 41:10, 13, bad nangta sa ïa peit lang ïa kane ka jingkylli harum:
-
Balei phi lah ban sngewskhem ba phin lah ban leh ïa kaei kaba phi kular ïa U Jehobah?
7. Pyni ba phi sngewnguh shisha ïa ka jingieid jong U Jehobah ïa phi
Katba phi nang pyrkhat ba haduh katno U Jehobah u ieid ïa phi, katta phin sa nang kham sngewnguh ïa u bad phin sa nang kwah ban shakri ïa u junom. Pule Salm 40:5, bad nangta sa ïa peit lang ïa kane ka jingkylli harum:
-
Kiei ki jingkyrkhu ba phi la ïoh na U Jehobah kiba phi sngewnguh bha?
U Jeremaïah u la ieid ïa U Jehobah bad ïa ka ktien jong u, bad u sngewnguh shisha ïa ka burom ba u la ïoh ban sakhi ïa ka kyrteng U Jehobah. U la ong: ‘Ki ktien jong me ki la long ha nga ka jingkmen bad ka jingshadkmen ka dohnud jong nga, namar la khot ïa nga da ka kyrteng jong me, A Jehobah U Blei ki paid.’ (Jeremaïah 15:16) Jubab ïa kine ki jingkylli harum:
-
Balei ka long ka burom kaba kyrpang ban long iwei na ki Nongsakhi U Jehobah?
-
Hato phi kwah ban ïoh baptis kum iwei na ki Nongsakhi U Jehobah?
-
Hato ka don kaei kaei kaba khanglad ïa phi ban leh kumta?
-
Kaei tharai phi donkam ban leh ban poi sha ka thong jong ka jingbaptis?
DON KIBA ONG: “Ngam tharai ba ngan lah ban im katkum ki aiñ U Jehobah ynda nga la dep baptis.”
-
Hato phi ruh phi sngew kumta?
KI MAT BAKONGSAN
Da ka jingïarap U Jehobah, phin lah ban jop ïa kano kano ka jingeh kaba khanglad ïa phi ban ïoh baptis.
Peit Biang
-
Haduh katno phi donkam ban tip shaphang ka Baibl ban ïoh baptis?
-
Kiei ki jingkylla kiba phi donkam ban pynkylla ha la ka jingim shuwa ban ïoh baptis?
-
Balei phim dei ban ailad ïa ka jingtieng ban khanglad ïa phi?
PULE SHUH SHUH
Peit ïa ka daw bakongsan ba balei phi dei ban baptis.
“Hato Phi Long iba la Pynkhreh ban Ïoh Baptis?” (Ka Kutphira, Lber 2020, Phareng)
Peit kumno phi lah ban jop ïa ki jingeh kiba lah ban khanglad ïa phi ban ïoh baptis.
Kaei kaba Khanglad ïa Nga ban Ïoh Baptis? (Ka Kutphira, Lber 2019, Phareng)
Peit kumno uwei u briew u la jop ïa ki katto katne ki jingeh kiba khraw khnang ban ïoh baptis.
Ha kaba nyngkong, uwei u briew uba kyrteng u Ataa u la artatien ban shim ïa ka rai ban ïoh baptis. Peit kaei pat kaba la pynsngewskhem ïa u ban shim ïa kane ka sienjam bakongsan.
