OSHILESHWA 47
Mbela owe lilongekidila ngoo okuninginifwa?
Owe lihonga shihapu kombinga yaJehova okupitila mokukonakona Ombiibeli. Nokape na omalimbililo, ou na okukala wa ninga omalunduluko, opo u tule moilonga osho to lihongo. Ashike natango otashi dulika pe na shimwe osho tashi ku imbi u liyapulile Jehova nou ninginifwe. Moshileshwa eshi, ohatu ka kundafana amwe omomashongo, oo taa dulu oku ku imba u ninginifwe nosho yo nghee to dulu oku a finda.
1. Mbela owa pumbwa eshiivo li fike peni, opo u dule okuninginifwa?
Opo u dule okuninginifwa, owa pumbwa ‘okushiiva nawa oshili.’ (1 Timoteus 2:4) Osho inashi hala okutya owa pumbwa okukala u shii enyamukulo kepulo keshe lopaMbiibeli, opo u kale wa wana okuninginifwa. Nokuli nOvakriste, ovo va kala va ninginifwa pa pita omido dihapu, otava twikile nokulihonga. (Ovakolossi 1:9, 10) Ashike owa pumbwa okushiiva omahovelohongo Ombiibeli. Ovakulunhuongalo otave ke ku kwafela, opo u mone ngeenge ou na eshiivo la wana, u dule okuninginifwa.
2. Eenghatu dilipi wa pumbwa okukatuka, ofimbo ino ninginifwa?
Ofimbo ino ninginifwa, owa pumbwa ‘okulidilulula nokulialuluka.’ (Lesha Oilonga 3:19.) Sha hala okutya ou na okulivela ombedi omolwomanyono aeshe oo wa ninga nokupula Jehova e ku dimine po. Ou na yo okweefa po elihumbato keshe inali koshoka nokukala nonghalamwenyo oyo tai hafifa Kalunga. Shikwao vali, owa pumbwa okukala ho kala pokwoongala, okukufa ombinga muko nosho yo okukala ho udifa u li omuudifi ina ninginifwa.
3. Omolwashike uhe na okweefa oumbada u ku imbe u ninginifwe?
Vamwe ohava kala ve na oumbada kutya itava ka dula okuwanifa po osho va udanekela Jehova. Oshoshili kutya oto ka ninga omapuko omafimbo amwe. Nokuli novalumenhu nosho yo ovakainhu ovadiinini, ovo va popiwa mOmbiibeli, ova li va ninga omapuko. Jehova ina teelela ovapiya vaye va kale ihava ningi omapuko. (Lesha Epsalme 103:13, 14.) Oha kala a hafa, ngeenge to ningi eenghendabala, note ke ku kwafela. Jehova okwe tu shilipaleka kutya kape na nande osha tashi dulu ‘oku tu tukula mohole yaye.’— Lesha Ovaroma 8:38, 39.
KONAKONA MOULE
Tala nghee to dulu okufinda eshongo keshe, olo tali dulu oku ku imba u ninginifwe, mokulihonga shihapu kombinga yaJehova nokutambula ko ekwafo laye.
4. Shiiva nawa Jehova
Mbela owa pumbwa okushiiva shi fike peni kombinga yaJehova, ofimbo ino ninginifwa? Opo u kale u hole Jehova nou dule oku mu hafifa, owa pumbwa okushiiva shihapu kombinga yaye. Dana OKAVIDIO, opo u mone nghee ovakonakonimbiibeli mounyuni va ninga sha faafana. Opo nee tamu kundafana epulo tali shikula.
-
Ngaashi sha ulikwa mokavidio, oshike sha kwafela oohandimwe, opo va kale ve lilongekida okuninginifwa?
Lesha Ovaroma 12:2, ndele tamu kundafana omapulo taa shikula:
-
Mbela oho kala wa limbililwa osho Ombiibeli tai hongo, ile kutya Eendombwedi daJehova ohadi hongo ngoo oshili?
-
Ngeenge osho, oshike u na okuninga po?
5. Finda omashongo oo tae ku imbi u ninginifwe
Atushe ohatu shakeneke omashongo, konima ngeenge twa tokola okuliyapulila Jehova nokuninginifwa. Opo u mone oshihopaenenwa shaumwe oo a finda omashongo, dana OKAVIDIO, ndele tamu kundafana omapulo taa shikula.
-
Ngaashi sha ulikwa mokavidio, omashongo elipi Narangerel a li a pumbwa okufinda, opo a dule okulongela Jehova?
-
Ongahelipi ohole yaye yokuhola Jehova ye mu kwafela a dule okufinda omashongo a tya ngaho?
Lesha Omayeletumbulo 29:25 nosho yo 2 Timoteus 1:7, ndele tamu kundafana epulo tali shikula:
-
Oshike hashi tu tu omukumo, opo tu dule okufinda omashongo?
6. Lineekela ekwafo olo Jehova te ku pe
Jehova ota dulu oku ku kwafela, opo u dule oku mu longela. Dana OKAVIDIO, ndele tamu kundafana omapulo taa shikula.
-
Ngaashi sha ulikwa mokavidio, oshike sha li sha imba omukonakoni a ninginifwe?
-
Oshike e lihonga, osho she mu kwafela a kale e na elineekelo muJehova?
Lesha Jesaja 41:10, 13, ndele tamu kundafana epulo tali shikula:
-
Omolwashike to dulu okukala noushili kutya oto dulu okuwanifa po eudaneko olo wa ninga peliyapulo loye?
7. Kala u na olupandu omolwohole yaJehova
Ngeenge owa kala to diladila kunghee Jehova e ku hole neenghono, oto ke mu pandula noto ka kala wa hala oku mu longela fiyo alushe. Lesha Epsalme 40:5, ndele tamu kundafana epulo tali shikula:
-
Omanangeko noupuna a dja kuJehova elipi ho hafele unene?
Omuprofeti Jeremia okwa li e hole Jehova nosho yo Eendjovo daye, nosha li oufembanghenda munene kuye okupopya kombinga yedina laJehova. Okwa ti: “Eendjovo doye oda li kwaame enyaku nehafo lomutima wange, osheshi ame onda lukilwa edina loye, Omwene, Kalunga.” (Jeremia 15:16) Nyamukula omapulo taa shikula:
-
Omolwashike shi li oufembanghenda okukala Ondombwedi yaJehova?
-
Mbela owa hala okuninginifwa u li umwe womEendombwedi daJehova?
-
Mbela ope na sha osho tashi ku imbi u ninginifwe?
-
Mbela oto diladila kutya oshike wa pumbwa okuninga, opo u dule okuhanga elalakano loye li na sha nokuninginifwa?
VAMWE OHAVA TI: “Kandi wete ngeenge ohandi ka dula okuwanifa po oinima aishe oyo nda udaneka kutya ohandi ka wanifa po, ngeenge nda ninginifwa.”
-
Mbela naave osho ho kala u udite ngaho?
ENGONGO
Kekwafo laJehova, oto dulu okufinda eshongo keshe, olo tali ku imbi u ninginifwe.
Eendululo
-
Mbela owa pumbwa eshiivo lOmbiibeli li fike peni, opo u dule okuninginifwa?
-
Omalunduluko elipi tashi dulika wa pumbwa okuninga, ofimbo ino ninginifwa?
-
Omolwashike ino pumbwa okweefa oumbada u ku imbe u ninginifwe?
TALA OUYELELE WA WEDWA PO
Lihonga kutya etokolo loye li na sha nokuninginifwa oli na okukala la kanghamena kushike.
“Mbela owa wana okuninginifwa?” (Oshungonangelo, Marsa 2020)
Lihonga nghee to dulu okufinda omashongo, oo taa dulu oku ku imba u ninginifwe.
“Oshike tashi imbi nge ndi ninginifwe?” (Oshungonangelo, Marsa 2019)
Tala nghee omulumenhu umwe a finda nomupondo omashongo a kwata moiti, opo a dule okuninginifwa.
Potete, omulumenhu wedina Ataa okwa li ta ongaonga okuninginifwa. Tala kutya oshike she mu kwafela, opo a katuke onghatu oyo ya fimana.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
