ERISOMO 47
Wanamabirihika Eribatizibwa?
Wamabirigha bingyi oku Yehova erilhabira omw’igha lyawu lye Biblia. Wangabya iwabirikolha esyombinduka ndebe erithoka erighendera okwa bya wuk’igha. Aliwe, hanganabya ihane ekinemukulemesya eriyihayo oku Yehova n’eribatizibwa. Erisomo lino likendi kania okwa bindu birebe ebikanabera erilemesya abandi eribatizibwa kandi ngoku wangabisingura.
1. Wutholere iwatsuka eriminya bingahi wuthe wabatizibwa?
Eribatizibwa, wutholere iwatsuka ‘eriminya ndeke omwatsi w’ekwenene.’ (1 Timoteo 2:4) Eki sikirimanyisaya kithi wutholere iwatsuka eriminya eby’erisubirya okwa buli kibulyo ekihambire okwa Biblia imuwabatizibwa. Nibya n’Abakristayo abamabirighunza buthuku ibanabatizibirwe bakalholha embere erigha. (Abanya Kolosai 1:9, 10) Aliwe wutholere iwaminya esyongangirirya sye Biblia esy’omusingyi. Abasyakulhu b’ekithunga bakendi kuwathikya eriminya nga wanamabiriyira ebya wukaminya.
2. Ni byahi ebya wutholere iwatsuka erikolha imuwabatizibwa?
Wuthe wabatizibwa, wutholere iwayisubamo ‘n’eribindulha omuthima wawu.’ (Soma Emibiri 3:19.) Eki kikamanyisaya kithi wukayikubaya bwomo busana n’ebibi ebyo wabirikolha n’erisaba Yehova wuthi akughanyire. Kandi wukaghanira ighuma omutse mubi n’erithwamu eribya omo ngebe eyikatsemesaya Nyamuhanga. Eryongera okw’ebyo, wukatsuka erisangira omwa mibiiri y’ekithunga omw’ihindana n’erithulira ng’omuthuliri oyuthabatizibirwe.
3. Busana naki siwutholere wukalighira erisaghirira likakulemesya?
Abandi bakasagha bathi sibendithoka erikolha ebyo babirilhagha Yehova. Ni kwenene, okwa bundi buthuku wangana sobya, ng’abalhume n’abakali abathaleghulha abali omwa Biblia ku bakolha. Aliwe Yehova syalisondaya okwa baramya biwe kw’erihikana. (Soma Esyonyimbo 103:13, 14.) Akatsema wukakolha ngoku wangathoka! Akendi kuwathikya. Erithwalira haghuma, Yehova akathukakasaya athi sihali ‘ekyanga thughabulha oko lhwanzo lhwiwe.’—Soma Abanya Roma 8:38, 39.
THASYIGHA BINGYI
Lhangira ngoku wangasingura ekyosi-kyosi ekyanga kulemesya eribatizibwa omw’iminya Yehova ya ndeke n’eriligha obuwathikya bwiwe.
4. Minya Yehova ya ndeke
Wutholere iwatsuka eriminya Yehova ya bungahi wuthe wabatizibwa? Wutholere iwamuminya ndeke erithoka erimwanza n’erianza erimutsemesya. Mubughaye EVIDIYO erilhangira abigha be Biblia erithimba omwa kihugho kyosi nga babirithoka bathi erikolha ekyo. Neryo mukanaye okwa kibulyo ekikakwamako.
-
Omo vidiyo, ni byahi ebya wathikaya abandi eriyitheghekera eribatizibwa?
Soma Abanya Roma 12:2, mwanakania okwa bibulyo bino:
-
Mbwino wunawithe ekya wukathika-thikira okwa bya Biblia yikakangiriraya kutse Abema ba Yehova nga bakanakangiriraya ekwenene?
-
Kyamabya ikwa kiri kithya, wangakolhaki?
5. Rwanisaya ebyanga kulemesya eribatizibwa
Thukabya thukathwamu eriyihayo oku Yehova n’eribatizibwa, ithwe bosi thukabana ebitsibu. Erilhangira eky’erileberyako, mubughaye EVIDIYO, mwanakania okwa bibulyo ebikakwamako.
-
Omo vidiyo, ni byahi ebya Narangerel abya akayithagha erirwanisya erithoka erikolera Yehova?
-
Yehova mwamuwathikya athi erisingurabyo?
Soma Emisyo 29:25 na 2 Timoteo 1:7, mwanakania okwa kibulyo kino:
-
Ni kyahi ekikathuha obuthubaha bw’erisingura ebikathulemesaya?
6. Yikethere obuwathikya bwa Yehova
Yehova akendi kuwathikya erithoka erimutsemesya. Mubughaye EVIDIYO, mwanakania okwa bibulyo ebikwakamako.
-
Omo vidiyo, ni kyahi ekyalemesaya omwigha we Biblia eribatizibwa?
-
Ni byahi ebyo igha ebya muwathikaya erighumya eriyikethera liwe omu Yehova?
Soma Isaya 41:10, 13, mwanakania kibulyo kino:
-
Busana naki wutholere iwasika ngoku wukendiberererya eriyilhagha erya wukakolha wukayihayo oku Yehova?
7. Ongera erisima kutsibu olhwanzo lhwa Yehova
Wukabya wuk’ongera erilengekania oko lhwanzo olho Yehova akuwithire, kwa wukan’ongera wuthya erimusima n’eryongera erianza erimukolera kera na kera. Soma Esyonyimbo 40:5, mwanakania okwa kibulyo kino:
-
Kwilhabirirya ni mighisa yahi eyo Yehova abirikuha eya wukasima kutsibu?
Omuminyereri Yeremia aby’anzire Yehova n’ekinywe kiwe, kandi iniakasima kutsibu olhusunzo lhw’eryahulhwa omo lina lya Yehova. Mwabugha athi: “Ebinywe byawu mubyabya butseme busana naghe, n’eritsanga ly’omuthima waghe. Kusangwa ngahulhawa omo lina lyawu, iwe Mwami Mukulhu [Yehova] Nyamuhanga.” (Yeremia 15:16) Subiraya ebibulyo bino:
-
Busana naki ni lhusunzo lhw’embaghane eribya Mwema wa Yehova?
-
Wunanzire eribatizibwa ng’Omwema wa Yehova?
-
Hane ekikakulemesaya erikolha ekyo?
-
Wukalengekanaya wutholere iwakolhaki erihika okwa kilhubirirwa ky’eribatizibwa?
ABANDI BAKABUGHA BATHI: “Singasi indi nangana thoka olhukwamirwa lhw’eribatizibwa.”
-
Mbwino kwa wukayowa wuthya?
OMWA BIKUHI
Busana n’obuwathikya bwa Yehova, wangana singura ekyosi-kyosi ekyanga kulemesya eribatizibwa.
Eriyibukya
-
Wutholere iwatsuka eriminya bingahi omwa Biblia imuwabatizibwa?
-
Ni mbinduka syahi esya wutholere iwakolha wuthe wabatizibwa?
-
Busana naki siwutholere wukalighira erisaghirira likakulemesya?
MINYA BINGYI
Minya erithwamu eribatizibwa nga litholere iryaseghemera okuki.
“Wanamabirihika Eribatizibwa?” (Akaleberyo, Okwakasathu 2020)
Minya ngoku wangasingura ebitsibu birebe ebyanga kulemesya.
“Ni Kyahi Ekikanyikakiraya okw’Ibatizibwa?” (Akaleberyo, Okwakasathu 2019)
Lhangira ngoku omulhume mughuma asingura ebitsibu birebe erithoka eribatizibwa.
Okw’itsuka, omulhume oyukahulhawamo Ataa mwasagha eribatizibwa. Lhangira ekyaleka inialigha ngoku atholere iniakolha ekiika kikulhu eki.
