MURU 47
Kodi Mukozeya Ira Mubadiziwe?
Vofiya vano mufunjeda vinjinji vyokuza Yehova kumela m’Baibulo. Kan’nakaikela ira vyevyo mukalilenyo mufunjedanga viukami-ani chenja vyongo vimo-i vamoywinyu. Komave, mwina viikala vyongo vimo-i vyevyo vinaulepeli-ani ira muvipeleke wa Yehova koma teto badiziwa. M’murula ninotapanya vyongo vimo-i vyevyo vinalepeli-a athu badiziwa koma teto vyevyo munairenyo ira vyevi kaviulepeli-eni badiziwa.
1. Kodi munafuneela iziwa vyongo vyoinjiva moi avi ira mubadiziwe?
Ira mubadiziwe, munafuneela ‘iziwa imbarimbari molondola.’ (1 Timoteyu 2:4) Vyevi kavinatapulela ira munafuneela iziwa yosomeda ya yofuka iliyetene ineyo athu kanafukeathu yokuza Baibulo. Ninaonga eeno chifukwa ngakale Akiristu anayo kabadiziwile wan’le, kanodowanave funjeda vyongo vimo-i. (Akolose 1:9, 10) Komave ira mubadiziwe munafuneela ambeela vwechecha pama vyevyo Baibulo linafunji-aathu. Andimuwa a mupingo mwinyu kanoza kaukami-eni iziwa akala muiziwile vyongo mokwakwanela vyokuza Baibulo.
2. Kodi pivyongo vimo-i vyiivi vyevyo munafuneela nyo viira ira mubadiziwe?
Ira mubadiziwe, munafuneela ‘lapa notembenuwa.’ (Welengani Vyoira 3:19.) Vyevi vinatapulela ira munafuneela vivwela chisoni chifukwa ya machimo anayo mwairile nyo koma teto muvepa Yehova ira aukurumuweleni. Munafuneela teto esaesa pewa irana vyevyo Mulungu unaviona liye ira pivyotakala noira vyevyo unafuna liye. Enjedela vevo munafuneela teto ira mupangengana misonkano dapingo koma teto laleela monga ofalisa oobadiziwa.
3. Chifukwa n’ni kamunafuneela lola ira ova uulepeli-eni badiziwa?
Athu amo-iwa kanoova badiziwa chifukwa kanaona ira kanoza kalepele kwakwaneli-eda vyevyo kamulonjezileathu Yehova. Pivyoona ira thawi dimo-i, munokoza chimwi-a vyongo. Koma iziwani ira ngakale alombwana na a-iyana ororomeleya anayo kanaromoliwa m’Baibulo, naaliwene koochimwi-a vyongo vimo-i. Yehova kanadedi-edela ira atumikaye kairenga vyongo moochimwi-a iliyetene. (Welengani Salimo 103:13, 4.) Yehova unosangalala mwaesaesanga irana vyapama. Liye ngokozeya ukami-edani. Teto Yehova unonisimikizela ira ‘kilivo inanimwalani-e na chikondaye.’ — Welengani Aroma 8:38, 39.
FUNJEDANI VYOWENJEDELEYA
Onani mwemo muiziwa pama Yehova koma teto lola ira aukami-eni unaukami-edeleniathu ira mumali-e vyongo vyevyo vinaulepeli-eni badiziwa.
4. Esaesani muiziwa pama Yehova
Kodi munafuneela iziwa vyongo vyoinjiva moi avi vyokuza Yehova ira mubadiziwe? Ira muomeliwengana Yehova koma teto panga vyongo vyomuomela munafuneela muiziwa pama. Onelani VIDIYO ira muone mwemo afwinyu amo-iwa vailambo yetene kairileathu vyevi. Era eeno tapanyani yofuka yo-arelela.
-
Chin’ni yakami-ile athu anayo kali muvidiywela ira kabadiziwe?
Welengani Aroma 12:2, era eeno tapanyani vyofuka vyo-arelavi:
-
Kodi munokaikela ira vyevyo Baibulo linafunji-aathu pivyoona, kapena akala vyevyo a Mboni da Yehova kanafunji-aathu vili vyolondola?
-
Akala chi eeno munairavo n’ni?
5. Pivyowandeya mali-a vyongo vyevyo vinaulepeli-eni badiziwa
Uliwetene unogumana na mavuto asakula vipeleka wa Yehova koma teto badiziwa. Ira muone isazo ya vyevi, onelani VIDIYO, era eeno tapanyani vyofuka vyo-arelavi.
-
Kodi Narangerel awandile mali-a vyongo vyiivi vyevyo vyamulepeli-e tumikela Yehova?
-
Kodi omeliwana Yehova wamukami-ile avi ira awande mali-a vyongo vyevyo vyamulepeli-e badiziwa?
Welengani Miyambo 29:25 na 2 Timoteyu 1:7, era eeno tapanyani yofuka yo-arelela:
-
Chifukwa n’ni ninalimba murima mali-a vyongo vyevyo vyanilepeli-e tumikela Yehova?
6. Kamukaikelenga ira Yehova unoukami-ani
Yehova ngokozeya ukami-ani ira muirenga vyongo vyomusangalasa. Onelani VIDIYO, era eeno tapanyani vyofuka vyo-arelavi.
-
Muvidiywela chin’ni ineyo yalepeli-a ofunjedole ira abadiziwe?
-
Kodi afunjedile likundo liivi lelo lamukami-ile ira kakaikelenga vyoi Yehova unomukami-a?
Welengani Yesaya 41:10, 13, era eeno tapanyani yofuka yo-arelela:
-
Chifukwa n’ni kamunafuneela kaikela ira munowanda panga vyetene vyevyo mwalonjezile nyo vevo mwavipeleka nyo wa Yehova?
7. Dowananive yamikela Yehova chifukwa ya chikondi ineyo autonyi-edeleni liye
Mwaganizelanga vinjinji chikondi ineyo Yehova autonyi-edeleni liye, pavevo munamuyamikela nyo vinjinji teto vyevi vinouiri-ani ira mumutumikelenga wa moywinyu wetene. Welengani Salimo 40:5, era eeno tapanyani yofuka yo-arelela:
-
Kodi pivyongo vyiivi vyevyo Yehova uuireleni liye vyevyo munaviyamikela nyo vinjinji?
Namaongela Yeremiya oomeliwana Yehova na Mawaye koma teto ooyamikela vinjinji mwai woiziweya na zina la Yehova. Liye aongile ira: “Mawinyu kanoomeli-a nosangalasa murimanga voi miyo ndinoromoliwa na zina linyu, nyo Yehova Mulungu.” (Yeremiya 15:16) Somedani vyofuka vyo-arelavi:
-
Chifukwa n’ni kala wa Mboni da Yehova ngumwai wavadela?
-
Kodi nyo munofuna badiziwa nokala wa Mboni da Yehova?
-
Kodi viikala iliyetene ineyo inaulepeli-ani badiziwa?
-
Kodi munaire avi ira mukwakwani-e yolinga inyu yoi mubadiziwe?
ATHU AMO-IWA KANAONGA IRA: “Ndinaova ira ndabadiziwa ndinokoza lepela kwakwaneli-eda vyetene vyevyo ndinalonjeze miyo.”
-
Kodi nanyene munaona eeno?
VYEVYO NIFUNJEDILE IYO
Yehova unokoza ukami-ani, mali-a vuto lililetene lelo linaulepeli-eni ira mubadiziwe.
Vyofuka Vyoweli-eda
-
Kodi munafuneela iziwa vyongo vyoinjiva moi avi ira mubadiziwe?
-
Kodi munafuneela chenja vyongo vyiivi vamoywinyu ira mubadiziwe?
-
Chifukwa n’ni kamunafuneela ova badiziwa?
ONANI VIMO-I
Onani chifukwa iwa omeliwana Yehova kofuneya vinjinji ira muthu abadiziwe.
“Kodi Ndinu Okonzeka Kubatizidwa?” (Nsanja ya Olonda, March 2020)
Welengani khanila ira muiziwe vyevyo munaire nyo akala vali vyongo vimo-iviwa vyevyo vinaulepeli-eni badiziwa.
“Chikundiletsa Kubatizidwa N’chiyani?” (Nsanja ya Olonda, March 2019)
Onani vyevyo muthu m’mo-iwa airile liye ira amali-e vyongo vyevyo vyamulepeli-a badiziwa.
Vowambeela muthu m’mo-iwa zina lae Ataa oozengeleza badiziwa. Onani vyeyo vyamusimikizele ira unafuneela badiziwa.
