CIIYO 47
Sa Mwalibambila Kubombekwa?
Kwiiya Baibo kwamucafwa kushiba shiinji pali Yehova. Cilyeelete kwaamba ayi kuli shimwi nshemwaalulaako kwaamba ayi mukonkele nshomwakeeya. Nacibi boobo, mpashi kuli cimwi citoomupa kwaamba ayi mwaalilwe kulyaaba kuli Yehova akubombekwa. Muciiyo ici mutokwiiya shipa kwaamba ayi baanji bawayewaye kubombekwa alimwi ansheenga mwaciita kwaamba ayi mukome shintu isho.
1. Ino mulyeelete kushiba shintu shiinji buyani kamutana kubombekwa?
Kwaamba ayi mubombekwe mulyeelete kuba “alushibo lwa cancinencine.” (1 Timoti 2:4, NWT) Ici tacaambi ayi mulyeelete kushiba cikumbulo kumwiipusho uli woonse ngweenga bantu bamwiipusha pamakani amu Baibo. Mukwiinga nabibo Beneklistu bakabombekwa kale kale balatolelela kwiiya. (Bene Kolose 1:9, 10) Nacibi boobo, mulyeelete kushiba njiisho shakutaanguna shamu Baibo. Bamanene mulibungano balaakumucafwa kwaamba ayi mushibe na mulicite lushibo lukwene kabotu.
2. Ino nshiinshi nshomweelete kucita kamutana kubombekwa?
Kamutana kubombekwa, mulyeelete “kwaana . . . alimwi akupiluluka.” (Amubelenge Milimo 3:19, NWT.) Ici cilaamba kulinyumfwa cibiibi pashibiibi shili shoonse nshemwakacitawo kale kale akusenga Yehova kwaamba ayi amulekelele. Alimwi mulyeelete kuba bashinishite kuleya kucita shintu Lesa nshaabona ayi nshibiibi. Kwiilikaawo, mulatalika kucanika kumabungano alimwi akwaabanamo lubasu mukushimikila pomwi alibungano.
3. Ino nceebonshi tamweelete kuwayawaya kubombekwa ceebo cakuloonda?
Bamwi balaloonda kubombekwa ceebo cakuyeeya ayi teshi bakacikoonshe kutolelela kushomeka kuli Yehova. Ncakwiila cimwi ciindi inga mwaciita cilubo, bweenka mbuli mbocakalinga kubasankwa abanakashi bashomeka baambwa mu Baibo. Nacibi boobo, Yehova taalangili basebenshi bakwe batamaninite kucita shintu mbuli bantu bamaninite. (Amubelenge Kulumbaisha 103:13, 14.) Alakondwa na kamucita nsheenga mwacikonsha! Alaakumucafwa. Alimwi alatuyuminisha ayi taakuwo “ceenga catupansaanya alusuno lwakwe.”—Amubelenge Bene Loma 8:38, 39.
AMWIIYILEWO ASHIMWI
Amubone kushiba kabotu Yehova alimwi akusumina lucafwo lwakwe mbweenga kwamucafwa kusalawo kubombekwa.
4. Amumushibe kabotu Yehova
Ino mulyeelete kushiba makani aanji buyani pali Yehova kamutana kubombekwa? Mulyeelete kuba alushibo lweenga lwamucafwa kusuna Yehova alimwi akusuna kucita sheenga shamusangalasha. Amweebele VIDYO kwaamba ayi mubone bashikwiiya Baibo nsengwe yoonse mbobatoocita boobo. Lyalo amubandike mwiipusho utokonkelaawo.
-
Kweelana anshomweebela muvidyo, ino nciinshi cakacafwa bamwi kulibambila kwaamba ayi beelele kubombekwa?
Amubelenge Bene Loma 12:2, akubandika miipusho iyi:
-
Sa kuli njiisho shimwi shamu Baibo nshomutoonsha na sa mulatoonsha na Bakamboni Bakwe Yehova balaiisha cancine?
-
Na mulatoonsha, ino nshiinshi nsheenga mwaciita?
5. Nsheenga mwaciita kwaamba ayi mukome sheenga shamupa kuwayawaya kubombekwa
Soonse tuleenda mumapensho ceebo cakusala kulyaaba kuli Yehova akubombekwa. Kwaamba ayi mubone cakubonenaako, amweebele VIDYO, lyalo akubandika miipusho itokonkelaawo.
-
Kweelana anshomweebela muvidyo, ino ngamapensho nshi ba Narangerel ngobakalinga kuyandika kukoma kwaamba ayi basebensele Yehova?
-
Ino kusuna Yehova kwakabacafwa buyani kukoma mapensho ayo?
Amubelenge Tushimpi 29:25 alimwi a 2 Timoti 1:7, akubandika mwiipusho uyu:
-
Ino nciinshi citucafwa kukoma mapensho cakutaloonda?
6. Amushome mulucafwo lwakwe Yehova
Yehova alaakumucafwa kucita sheenga shasangalasha nguwe. Amweebele VIDYO, akubandika miipusho itokonkelaawo.
-
Kweelana anshomweebela muvidyo, ino nciinshi cakapa kwaamba ayi shikwiiya Baibo awayewaye kubombekwa?
-
Ino nciinshi ncakeeya cakayumya lushomo lwakwe muli Yehova?
Amubelenge Isaya 41:10, 13, akubandika mwiipusho uyu:
-
Ino nceebonshi inga mwashoma ayi mulaakucikonsha kukumanisha cishomesho ncomwakashomesha ndyemwakalyaaba?
7. Amutolelele kutondesha kulumba kwanu palusuno lwakwe Yehova
Na kamuyeeya bunene Yehova mbwaamusuni, cilaakumucafwa kulumba abuumbi alimwi kucita boobo kulaakumupa kusuna kumusebensela kwamuyayaya. Amubelenge Kulumbaisha 40:5, akubandika mwiipusho uyu:
-
Ino nshoolwe nshi kuswa kuli Yehova nshomulumba abuumbi?
Mushinshimi Jelemiya wakalinga kumusuni abuumbi Yehova alimwi a maswi akwe, alimwi wakalumba abuumbi pacoolwe cakushimikila paliina lyakwe Yehova. Wakaamba ayi: ‘Maswi ako akansangalasha akulengesha moyo wangu kukondwa, ceebo ndeetwa aliina lyako, O Yehova Lesa.’ (Jelemiya 15:16) Amukumbule miipusho iyi:
-
Ino nceebonshi ncoolwe cilibetele kuba womwi wa Bakamboni Bakwe Yehova?
-
Sa mulisuni kubombekwa mbuli womwi wa Bakamboni Bakwe Yehova?
-
Sa kuli cimwi citoopa kwaamba ayi mwaalilwe kucita boobo?
-
Ino nciinshi ncemutobona ayi mutoyandika kucita kwaamba ayi mweelele kubombekwa?
BANTU BAMWI BALAAMBA AYI: “Ntooloonda kubombekwa mukwiinga inga ndaakwaalilwa kutolelela kushomeka.”
-
Sa amwebo mbomulinyumfwa?
CITEENTE CINENE
Kwiinda mulucafwo lwakwe Yehova, inga mwacikonsha kukoma lipenshi lili lyoonse.
Kwiindulukaamo
-
Ino ngamakani amu Baibo aanji buyani ngomuyandika kushiba kwaamba ayi mubombekwe?
-
Ino nshiinshi nshomweelete kwaalula kamutana kubombekwa?
-
Ino nceebonshi tamweelete kuloonda kubombekwa?
AMULANGWETEEWO ASHIMWI
Amubone ceelete kumupa kusalawo kubombekwa.
“Sa Mwalibambila Kubombekwa?” (Njashi Yamulindilishi, March 2020)
Amwiiye nsheenga mwaciita kwaamba ayi mucikoonshe kukoma mapensho eenga amupa kuwayawaya kubombekwa.
“Ino Nciinshi Citoonkasha Kubombekwa?” (Njashi Yamulindilishi, March 2019)
Amubone musankwa umwi mbwaakakoma mapensho amwi kwaamba ayi acikoonshe kubombekwa.
Pakutaanguna, musankwa waliina lya Ataa wakalinga kuwayawaya kubombekwa. Amubone cakayuminisha musankwa uyu kucita cintu ici ciyandika.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
