Nawˬ Liꞈ hpu henˇ laˬ ve hkʼaw Yaˬhoˉvaˬ htaꞈ caˉ daꞈ ve laiˉ ceuˬ gʼa henˇ ve yoˬ. Nawˬ gʼa henˇ ve awˬ ceuˬ htaꞈ yuˬ yehˇ tuˬ, te hkʼaˇ dawˇ hkʼaˇ laiˉ ceuˬ pa˗oˬ ve yoˬ hehˉ. Yaꞈ hkʼaˇ, nawˬ Yaˬhoˉvaˬ htaꞈ awˬ to chiˇ aꞈ piˇ leh Baˆtiˆsaˬ maˇ haꞈ yuˬ gʼa sheˍ tehꞈ dawˇ ve yoˬ hehˉ. Nawˬ Baˆtiˆsaˬ maˇ haꞈ yuˬ gʼa tuˬ te laˇ ve shoꞈ shaꞈ ve aˬ htoꞈ ma cawˬ ve le, leh nawˬ awˬ lawn chi htaꞈ hkʼaˬ hkʼe te tawˍ daꞈ gʼa ve le, chi teˇ lawn hkʼaw teˇ geh henˇ tuˬ yoˬ.

1. Baˆtiˆsaˬ haꞈ yuˬ gʼa tuˬ nawˬ hkʼaˬ hkʼe taw gʼa shiˍ cawˇ ve le?

Baˆtiˆsaˬ haꞈ yuˬ gʼa tuˬ, nawˬ ‘hteˇ ve cawˇ ve htaꞈ gʼa shiˍ ve yoˬ.’ (1 Tiˆmoˉseˍ 2:4) Chi lehˬ nawˬ Baˆtiˆsaˬ maˇ haꞈ yuˬ sheˍ htaˇ, shu nawˬ htaꞈ Liꞈ hpu hkʼaw ve awˬ lawn na laˇ ve na hkawˇ teˇ maˬ le le htaꞈ gʼa hkʼawꞈ piˇ gʼa ve tehꞈ kʼoˆ gaˇ ve maˇ heˆ. Awˬ lawn kʼo, Baˆtiˆsaˬ haꞈ yuˬ maw˗oˬ ve chaw htawˇ caˉ leh Liꞈ hpu gʼa henˇ sheˍ ve yoˬ. (Kawˇlawˇsehˇ 1:9, 10) Yaꞈ hkʼaˇ, nawˬ Liꞈ hpu hkʼaw maˍ laˇ ve a yeˇ uiˍ ve awˬ lawn awˉ lawˉ gʼa shiˍ cawˇ ve yoˬ. Leh nawˬ shiˍ ve awˬ ceuˬ lawꞈ˗oˬ laˇ tehꞈ nawˬ shiˍ gaˇ ve kʼo, Hkriꞈ yaˇ awˬ moˍ hkʼaw ve nyi haꞈ shaˉ paˍ nawˬ htaꞈ ga laˇ gʼa ve yoˬ.

2. Nawˬ Baˆtiˆsaˬ maˇ haꞈ yuˬ sheˍ htaˇ aˬ htoꞈ ma gʼa te ve le?

Baˆtiˆsaˬ haꞈ yuˬ gʼa tuˬ, nawˬ ‘venˇ baˆ htaꞈ dawˇ hpfuhˆ leh nyi ma gʼa kʼawꞈ pa ve yoˬ.’ (Tcuh yaˇ 3:19 gʼaw sheˍ.) Chi lehˬ nawˬ te yaꞈ jaw ve awˬ ceuˬ htaꞈ awˬ tehˬ awˬ na gʼa dawˇ hpfuhˆ ve tehꞈ kʼoˆ gaˇ ve yoˬ. Leh Yaˬhoˉvaˬ nawˬ htaꞈ venˇ baˆ hpehˇ laˇ tuˬ bon lawˬ sheˍ. Chi hkʼoˆ kaꞈ, Yaˬhoˉvaˬ maˇ daꞈ tehꞈ kʼoˆ laˇ ve awˬ ceuˬ htaꞈ nawˬ maˇ gʼa te leh, nawˬ a shaꞈ teꞈ kuiˬ hkʼaw yawˇ nyi hkʼaˇ suh ve awˬ ceuˬ htaꞈ coˇ caˇ leh gʼa gʼaꞈ te ve yoˬ. Hkʼe te leh, Hkriꞈ yaˇ awˬ moˍ hkʼaw hkʼaˬ htaˆ kaꞈ hpawnˬ daꞈ˗e leh gʼa hto toˇ ve yoˬ.

3. Aˬ htoꞈ ma te nawˬ Baˆtiˆsaˬ haꞈ yuˬ tuˬ maˇ kawˆ cawˇ ve le?

Chaw teˇ hpaˍ kʼo Yaˬhoˉvaˬ geh ka tiꞈ te taˍ ve htaꞈ gʼaꞈ te maˇ gʼa la ve kawˆ ve yoˬ. Awˬ tehˬ yoˬ, teˇ pawˆ pawˆ kʼo nawˬ kaꞈ te yaꞈ ve, leh Liꞈ hpu hkʼaw ka tiꞈ yeˬ ve chaw htawˇ te yaꞈ ve yoˬ. Yaꞈ hkʼaˇ, Yaˬhoˉvaˬ lehˬ yawˇ htaꞈ oˉ kʼoˍ pui ve chaw geh hkʼa peu˗eˬ te biˇ gʼa tuˬ maˇ dawˇ law. (Chiˇ mvuh ve 103:13, 14 gʼaw sheˍ.) Nawˬ te gʼa ve hkʼe te ve kʼo, yawˇ ha lehˬ jaˇ tuˬ yoˬ! Leh yawˇ nawˬ htaꞈ ga laˇ tuˬ yoˬ. Yaˬhoˉvaˬ ngaˬ hui htaꞈ kʼoˆ laˇ ve, teˇ ceuˬ kaꞈ ‘yawˇ ve haꞈ pehnˇ ve awˬ hkʼaw lo ngaˬ hui htaꞈ yuˬ hpaˆ laˇ maˇ hpehꞈ.’—Roˉmaꞈ 8:38, 39 gʼaw sheˍ.

 Henˇ shiˍ maˇ la tuˬ

4. Yaˬhoˉvaˬ htaꞈ gʼaˇ hteꞈ shiˍ daꞈ sheˍ

5. Baˆtiˆsaˬ haꞈ yuˬ maˇ gʼa tuˬ te laˇ ve shoꞈ shaꞈ ve htaꞈ tawˍ daꞈ ve

 6. Yaˬhoˉvaˬ ga laˇ ve htaꞈ gʼaˇ va sheˍ

7. Yaˬhoˉvaˬ haꞈ laˇ ve htaꞈ awˬ hpfuhˇ shiˍ sheˍ

 A yeˇ uiˍ ve awˬ lawn

Baˆtiˆsaˬ haꞈ yuˬ tuˬ nawˬ Yaˬhoˉvaˬ htaꞈ ga laˇ tcuh ve kʼo, shoꞈ shaꞈ ve hkʼa peu˗eˬ htaꞈ tawˍ daꞈ gʼa ve yoˬ.

Kʼawꞈ gʼaꞈ na ve

• Nawˬ Baˆtiˆsaˬ haꞈ yuˬ gʼa tuˬ Liꞈ hpu hkʼaw ve awˬ lawn hkʼaˬ hkʼe taw gʼa shiˍ ve le?

• Nawˬ Baˆtiˆsaˬ maˇ haꞈ yuˬ sheˍ htaˇ, aˬ htoꞈ ma gʼa pa cawˇ sheˍ ve le?

• Aˬ htoꞈ ma pa taw nawˬ Baˆtiˆsaˬ haꞈ yuˬ tuˬ maˇ kawˆ cawˇ ve le?