DILONGESHA DIA 47
Ukadi mudiakaje bua kubatijibua anyi?
Dilonga diebe dia Bible ndikumanyishe malu a Yehowa a bungi. Pamuapa ukadi mushintuluke mu malu kampanda bua kutumikila biudi mulonge. Kadi kutshidi mua kuikala bualu bukuabu budi bukupangisha bua kudilambula kudi Yehowa ne kubatijibua. Mu dilongesha edi, neumonamu amue malu atu apangishangana bua kubatijibua, kabidi neumone muudi mua kuatshimuna.
1. Bidi bikulomba dimanya bungi kayi kumpala kua kubatijibua?
Bua wewe kubatijibua, udi ne bua kuikala ne “dimanya dijalame dia bulelela.” (1 Timote 2:4) Kadi kabiena biumvuija ne: udi ne bua kumanya mandamuna a nkonko yonso ya malu a mu Bible bua wewe kushisha kubatijibua to. Nansha bena Kristo bakabatijibua kale batshidi anu benda balonga. (Kolosayi 1:9, 10) Kadi tshiudi ne bua kuikala natshi ndimanya dia malongesha manene a nshindamenu a mu Bible. Bakulu ba mu tshisumbu nebakuambuluishe bua umanye ni ukadi ne dimanya dikumbane.
2. Mmalu kayi audiku ne bua kukumbaja kumpala kua wewe kubatijibua?
Kumpala kua wewe kubatijibua, udi ne bua kuanji ‘kunyingalala bua mpekatu, ne kushintuluka.’ (Balayi Bienzedi 3:19.) Mmumue ne: udi ne bua kunyingalala bua mibi yonso iuvua muenze ku kale ne kulomba Yehowa luse. Udi kabidi ne bua kulekela bienzedi bionso bibi ne muoyo umue ne kudisuika bua kuenza malu adi Nzambi musue. Pashishe, udi ne bua kutuadija kuenza midimu ya mu tshisumbu pa kuikala kubuela mu bisangilu ne kuyisha paukadi mulue mumanyishi udi kayi muanji kubatijibua.
3. Bua tshinyi ki mbimpe kulekela buôwa bukupingaja panyima?
Bamue badi batshina ne: kabalu kupanga kukumbaja malu adibu balaya Yehowa. Bushuwa, newenze pamuapa bilema misangu mikuabu, anu muakabienza bakaji ne balume ba lulamatu ba kale badi Bible utela. Kadi Yehowa katu utulomba tuetu batendeledi bende bua tuikale bapuangane to. (Balayi Misambu 103:13, 14.) Tshidi tshimusankisha mpaudi udienzeja, wenza muebe muonso bua kuepuka bubi! Yeye neakuambuluishe. Yehowa udi mene utujadikila ne: tshintu nansha tshimue katshiena “mua kutupandulula ku dinanga [diende] nansha.”—Balayi Lomo 8:38, 39.
BUELA MU BUONDOKE
Mona muudi mua kutshimuna bionso bidi mua kukupangisha bua kubatijibua pa kulonga mua kumanya Yehowa bimpe ne kuitaba diambuluisha dia kudiye.
4. Longa mua kumanya Yehowa bimpe
Udi ne bua kuanji kupeta dimanya bungi kayi dia Yehowa bua wewe kushisha kubatijibua? Udi ne bua kumumanya bimpe bikumbane bua kumunanga ne kujinga bua kumusankisha. Tangilayi FILME bua umone mudi balongi ba Bible benze bia muomumue pa buloba bujima. Pashishe nuandamune lukonko ludi lulonda.
-
Tshivua tshiambuluishe bantu ba mu filme eu bua kudiakaja bua batismo ntshinyi?
Balayi Lomo 12:2, pashishe nuandamune nkonko eyi:
-
Utu welakana bua malu adi Bible ulongesha peshi udiebeja bikala malongesha a Bantemu ba Yehowa ni mmalelela anyi?
-
Biobi nanku, tshia kuenza ntshinyi?
5. Tshimuna malu adi mafuane kukupangisha bua kufika ku batismo
Patutu tupangadija bua kudilambula kudi Yehowa ne tubatijibua, tutu tutuilangana bonso ne ntatu ya kapangisha. Bu tshilejilu, tangilayi FILME, pashishe nuandamune nkonko idi ilonda.
-
Mu filme eu, mmalu kayi avua mafuane kupangisha Narangerel bua kuenzela Yehowa mudimu avuaye ne bua kutantamena?
-
Mmunyi muvua dinanga diende dia Yehowa dimuambuluishe bua kutshimuna malu au?
Balayi Nsumuinu 29:25 ne 2 Timote 1:7, pashishe nuandamune lukonko elu:
-
Tshidi tshitupetesha dikima dia kutantamena malu adi mua kutupingaja panyima ntshinyi?
6. Eyemena Yehowa
Yehowa neakuambuluishe bua kumulengelela. Tangilayi FILME, pashishe nuandamune nkonko idi ilonda.
-
Ntshinyi tshivua tshipangisha mulongi wa Bible wa mu filme eu bua kubatijibua?
-
Mbualu kayi buakalongaye buvua bumuambuluishe bua kueyemena Yehowa ne muoyo mujima?
Balayi Yeshaya 41:10, 13, pashishe nuandamune lukonko elu:
-
Tshidi mua kukupesha dishindika dia ne: neukumbaje malu awalaya Yehowa paudi udilambula kudiye ntshinyi?
7. Vudija dianyisha diebe dia mudi Yehowa mukunange
Wewe welangana meji bikole a mudi Yehowa mukunange, neumvue mua kumuleja dianyisha divule ne neujinge kabidi bikole bua kumuenzela mudimu kashidi. Balayi Misambu 40:5, pashishe nuandamune lukonko elu:
-
Mmabenesha kayi a kudi Yehowa autu nangananga musue kumuelela tuasakidila?
Muprofete Yelemiya uvua munange Yehowa ne dîyi diende, ne uvua ne dianyisha divule bua diakalenga dia kuikala ne dîna dia Yehowa. Wakamba ne: “Dîyi diebe diakalua disanka dikole kundi ne disanka dia muoyo wanyi, bualu badi bambikila ku dîna diebe, wewe Yehowa Nzambi.” (Yelemiya 15:16) Andamunayi nkonko eyi:
-
Bua tshinyi kuikala Ntemu wa Yehowa ndiakalenga dia pa buadi?
-
Udi musue kubatijibua bu Ntemu wa Yehowa anyi?
-
Kudiku tshintu tshidi tshikupangisha bua kubatijibua anyi?
-
Ntshinyi tshiudi umona ne: bidi bikengela wewe kutshienza bua kushisha kufika ku batismo?
BAMUE BATU BAMBA NE: “Ndi ntshina bua kubatijibua bua tshilu pashishe kupangila mua kukumbaja mêyi anyi.”
-
Ke muudi pebe umvua anyi?
TSHIA KUKUATA
Udi mua kutantamena malu onso adi mua kukupangisha bua kubatijibua anu ne diambuluisha dia Yehowa.
Diambulula
-
Udi ne bua kuikala ne dimanya bungi kayi dia malu a mu Bible bua wewe kushisha kubatijibua?
-
Mmu malu kayi muudi ne bua kushintuluka kumpala kua wewe kubatijibua?
-
Bua tshinyi ki mbimpe wewe kulekela buôwa bukupangisha bua kubatijibua?
BIA KUTANGILA KABIDI
Longa tshidi ne bua kukusaka bua kuangata dipangadika dia kubatijibua.
“Ukadi mukumbane bua kubatijibua anyi?” (Tshibumba tshia Nsentedi, 3/2020)
Mona mua kutantamena ntatu misunguluke idi mua kukupingaja panyima.
“Ntshinyi tshidi tshimpangisha bua kubatijibua?” (Tshibumba tshia Nsentedi, 3/2019)
Mona muvua muntu mutantamene ntatu minene ivua mua kumupangisha bua kubatijibua.
Muntu uvua diende dikale Ataa, wakanji kuelakana bua kubatijibua. Kadi mona tshiakamumbusha dielakana dia kuitaba bua kubatijibua.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
