XNAQʼTZBʼIL 47
¿Mape bʼant ttena tuʼn tbautisarina?
Ya o tzʼel tnikʼa tiʼj Jehová noq tuʼnju in xnaqʼtzana tiʼj Tyol. Axlo ikx o bʼant junjun chʼixpubʼil tuʼna toj tanqʼibʼila tuʼnju o kubʼ tbʼinchaʼna aju o tzʼel tnikʼa tiʼj. Noqtzun tuʼnj, atlo jun tiʼ in nel qʼinte ambʼil teya tuʼn t-xi tqʼamaʼna te Jehová tuʼn tajbʼena te ex tuʼn tbautisarina. Toj xnaqʼtzbʼil lu qo xnaqʼtzal kyiʼj junjun tiʼchaq jaku tzʼel qʼinte ambʼil teya tuʼn tbautisarina ex tiʼ jaku bʼant tuʼna tuʼn texa kywitz.
1. ¿Ilpe tiʼj tuʼn tten nim tojtzqibʼila tiʼj Tyol Dios tuʼntzun tbautisarina?
Tuʼn tbautisarina il tiʼj tuʼn tten tojtzqibʼila tiʼj axix tok (1 Timoteo 2:4). Pero nya a t-xilen jlu qa il tiʼj tuʼn tok tojtzqiʼna tkyaqil tzaqʼwebʼil kyiʼj xjel jaku tzaj qanin teya tiʼj Tyol Dios. Axpe ikx qeju o che chʼiy toj kyokslabʼil, il tiʼj tuʼn kukx kyxnaqʼtzaʼn tiʼj Tyol Dios (Colosenses 1:9, 10). Noqtzun tuʼnj, il tiʼj tuʼn tel tnikʼa kyiʼj xnaqʼtzbʼil nim toklen tkuʼx toj Tyol Dios. Ex che onil ansyan tiʼja tuʼn tel tnikʼa tiʼj qa at tojtzqibʼila tiʼj Biblia.
2. ¿Alkye junjun tiʼchaq il tiʼj tuʼn tbʼant tuʼna naʼmxtoq tbautisarina?
In tzaj tqʼamaʼn Biblia jlu: «Tajtztzun tiʼj kyanmiye, ex kyajtz meltzʼaje tukʼil Dios» (uʼjinktza Hechos 3:19). Kbʼantel jlu tuʼna naʼmxtoq tbautisarina. ¿Tiʼtzun t-xilen jlu? A t-xilen tuʼn ttzaj tbʼisa tiʼj jun il o kubʼ tbʼinchaʼna ex tuʼn t-xi tqanina najsam te Jehová. Ax ikx, at toklen jlu tukʼilju tuʼn tel tikʼuna tkyaqil nya bʼaʼn tuʼntzun tanqʼina ik tzeʼn taj Dios. Ex tuʼn tok tchmon tibʼa kyukʼil erman ik tzeʼn aj t-xiʼya kyoj chmabʼil ex aj texa pakbʼal.
3. ¿Tiquʼn mintiʼ tuʼn ttzaj xobʼa tuʼn tbautisarina?
Ateʼ junjun in che tzaj xobʼ tuʼnju in kubʼ kyximen qa jaku kubʼ kybʼinchaʼn jun il ex qa mlay japun twi kyyol kxel kytziyen te Jehová. At maj kʼelel txalpaja, ik tzeʼn bʼaj kyiʼj junjun xinaq ex xuʼj in tzaj qʼamaʼn toj Tyol Dios. Pero bʼaʼn tuʼn ttzaj tnaʼna qa mintiʼ in yon Jehová tuʼn kyok tmajen te tzʼaqli (uʼjinktza Salmo 103:13, 14). Ktzalajel Jehová qa ma tzʼok tilil tuʼna ex kʼonil tiʼja. Ax ikx in tzaj ttziyen qa ni jun jaku qo el tpaʼn «tiʼj tkʼujlalil» (kyuʼjinktze Romanos 8:38, 39).
QO JYON MAS TQANIL
Qo xnaqʼtzan tiʼj tzeʼn jaku tzʼonin tiʼja aj tok tojtzqiʼna Jehová ex aj t-xi tkʼamoʼna onbʼil in xi tqʼoʼn teya tuʼntzun tbautisarina.
4. Bʼaʼn tuʼn tel mas tnikʼa tiʼj Jehová
¿Ilpe tiʼj tuʼn tten nim tojtzqibʼila tiʼj Jehová naʼmxtoq tbautisarina? Miʼn. Pero il tiʼj tuʼn tok tojtzqiʼna tuʼntzun tok tkʼujlaʼna ex tuʼn tnimana te. Kyqʼonke kywitze tiʼj VIDEO tuʼntzun tel kynikʼe tiʼj tzeʼn o bʼant jlu kyuʼn junjun xjal in che xnaqʼtzan tiʼj Tyol Dios twitz tkyaqil Txʼotxʼ. Yajxitl che yoline tiʼj xjel lu:
-
Ik tzeʼn ma tzʼok qkeʼyin toj video, ¿tiʼ onin kyiʼj junjun xjal tuʼn tbʼant kyten tuʼn kybautisarin?
Kyuʼjinktze Romanos 12:2 ex che yoline kyiʼj xjel lu:
-
¿Atpe jun xnaqʼtzbʼil toj Tyol Dios mintiʼxix in nok qeʼ tkʼuʼja tiʼj? ¿In kubʼpe t-ximana qa in xi kyxnaqʼtzaʼn testigos de Jehová axix tok?
-
Qa mintiʼ in nok qeʼ tkʼuʼja tiʼj jun xnaqʼtzbʼil, ¿tiʼ jaku bʼant tuʼna?
5. Jaku kubʼ tiʼj alkyexku nya bʼaʼn tuʼna
Qkyaqilx in qo ok weʼ twitz nya bʼaʼn aj tkubʼ qximen tuʼn t-xi qqʼamaʼn te Jehová tuʼn qajbʼen te ex tuʼn qbautisarin. Tuʼn tel kynikʼe tiʼj jun techel, kyqʼonke kywitze tiʼj VIDEO ex che yoline kyiʼj xjel lu:
-
¿Alkye junjun nya bʼaʼn kubʼ kyiʼj tuʼn Narangerel tuʼntzun tajbʼen te Jehová?
-
¿Tzeʼn onin tkʼujlabʼil at tiʼj Jehová tuʼntzun tkubʼ kyiʼj nya bʼaʼn tuʼn?
Kyuʼjinktze Proverbios 29:25 ex 2 Timoteo 1:7, ex che yoline tiʼj xjel lu:
-
¿Alkye in nonin qiʼj tuʼn tten qipumal tuʼn tkubʼ kyiʼj nya bʼaʼn quʼn?
6. Bʼaʼn tuʼn tok qeʼ tkʼuʼja tiʼj qa kʼonil Jehová tiʼja
Kʼonil Jehová tiʼja tuʼn tkubʼ tbʼinchaʼna aju bʼaʼn in nela toj twitz. Kyqʼonke kywitze tiʼj VIDEO ex che yoline kyiʼj xjel lu:
-
¿Tiquʼn nya tajtoq xjal setz yekʼin toj video tuʼn tbautisarin?
-
¿Tiʼ onin tiʼj tuʼn tok qeʼ mas tkʼuʼj tiʼj Jehová?
Kyuʼjinktze Isaías 41:10 ex 13, ex che yoline tiʼj xjel lu:
-
Ik tzeʼn in tzaj kyqʼamaʼn versículo lu, ¿tiquʼn jaku tzʼok qeʼ tkʼuʼja tiʼj qa kjapunel twi tyola kxel ttziyena te Jehová?
7. Bʼaʼn tuʼn t-xi tqʼoʼna chjonte tiʼj tkʼujlabʼil Jehová
Aj t-ximana tiʼj qa nim kʼujlaʼna tuʼn Jehová, kʼonil tiʼja tuʼn t-xi tqʼoʼna chjonte te ex tuʼn tkubʼ t-ximana tuʼn tajbʼena te te jumajx. Kyuʼjinktze Salmo 40:5 ex che yoline tiʼj xjel lu:
-
Tiʼj tkyaqil oyaj o tzaj tqʼoʼn Jehová teya, ¿alkye jun mas nim toklen toj twitza?
Kʼujlaʼntoq Jehová ex Biblia tuʼn Jeremías, ex in tzalajtoq tuʼnju tok tbʼi Dios tiʼj. Tqʼama jlu: «Tej ttzaj yolina weye, kyaj wawaʼne tyola tuj wanmiye, nim o chin tzalaje kyiʼj ex e ok te jun tzalajbʼil tuj wanmiye, porke etzan qine tuʼna, aya Nman Dios» (Jeremías 15:16). Jaʼlo jaku tzaj ttzaqʼweʼna qe xjel lu:
-
¿Tiquʼn jun tbʼanel oklenj tuʼn qok te testigo de Jehová?
-
¿Tajpe teya tuʼn tbautisarina tuʼn toka te testigo de Jehová?
-
¿Atpe jun tiʼ in nel qʼinte ambʼil teya tuʼn tbʼant jlu tuʼna?
-
¿Tiʼ jaku bʼant tuʼna tuʼn tbautisarina?
AJU IN TZAJ KYQʼAMAʼN JUNJUN XJAL: «Nya waje tuʼn nbautisarine tuʼnju in chin tzaj xobʼe tuʼn tkubʼ nbʼinchaʼne jun il ex tuʼn ttzaj tbʼis Jehová wuʼne».
-
¿Axpe jlu in kubʼ tnaʼna?
TOJ CHʼIN YOL
Kʼonil Jehová tiʼja tuʼn tkubʼ kyiʼj nya bʼaʼn tuʼna tuʼntzun tbautisarina.
Aju ma qo yolin tiʼj
-
¿Jniʼ tojtzqibʼila tuʼn tten tiʼj Biblia tuʼntzun tbautisarina?
-
¿Alkyeqe tiʼchaq il tiʼj tuʼn tbʼant tuʼna naʼmxtoq tbautisarina?
-
¿Tiquʼn mintiʼ tuʼn ttzaj xobʼa tuʼn tbautisarina?
OJTZQINKA CHʼINTL
Bʼaʼn tuʼn tel tnikʼa tiʼj tiquʼn kbʼel t-ximana tuʼn tbautisarina.
«¿Ope bʼant ttena tuʼn tjaw aʼ twiʼya?» (Aju Xqʼuqil, marzo te 2020)
Qʼonka twitza tiʼj tzeʼn jaku kubʼ kyiʼj junjun nya bʼaʼn tuʼna aqeju in nel kyiʼn ambʼil teya tuʼn tbautisarina.
Ojtzqinka alkye tten kubʼ kyiʼj junjun nya bʼaʼn tuʼn jun xjal tuʼntzun tbautisarin.
In jawjetoq tkʼuʼj Ataa tuʼn tbautisarin. Qʼonka twitza tiʼj tiquʼn kubʼ t-ximen tuʼn tbautisarin.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
