OSHILESHWA 47
Mbela owa gwana ngaa okuninginithwa?
Sho wa kala to konakona Ombiimbeli, owi ilonga iinima oyindji kombinga yaJehova. Otashi vulika wa ninga omalunduluko gamwe, opo wu tule miilonga shoka wi ilonga. Ihe otashi vulika pu na sha tashi ku imbi wu iyapulile Jehova e to ninginithwa. Oshileshwa shika otashi kundathana iinima mbyoka oyo unene hayi imbi omuntu a ninginithwe, nankene to vulu oku yi sinda.
1. Owa pumbwa ontseyo yi thike peni manga inoo ninginithwa?
Opo wu ninginithwe, owa pumbwa ‘okutseya oshili.’ (1 Timoteus 2:4) Shika inashi hala okutya, manga inoo ninginithwa, owu na okukala wu shi eyamukulo lyepulo kehe kombinga yOmbiimbeli. Nokuli nAakriste mboka ya ninginithwa ethimbo ele, nayo otaya tsikile okwiilonga kombinga yaKalunga. (Aakolossa 1:9, 10) Ihe owa pumbwa okukala wu na ontseyo yopetameko yomalongo gOmbiimbeli. Aakuluntugongalo otaye ke ku kwathela wu mone ngele owu na ontseyo ya gwana.
2. Iinima yini wu na okuninga manga inoo ninginithwa?
Manga inoo ninginithwa, owu na ‘okwiitedhulula, e to galukile kuKalunga.’ (Lesha Iilonga 3:19.) Shika osha hala okutya, okukala wu uvitile nayi omayono ngoka wa ninga, e to pula Jehova e ku dhimine po. Owu na wo okuyanda okuninga oshinima kehe oshiwinayi nokukala wa tokola toko okwiihumbata momukalo ngoka tagu nyanyudha Kalunga. Shimwe ishewe, owu na okutameka okukutha ombinga momaipyakidhilo gegongalo, ngaashi okuya kokugongala nokuninga omuuvithi inaa ninginithwa.
3. Omolwashike uumbanda kaawu na oku ku imba wu ninginithwe?
Yamwe oya tila kutya pamwe itaya ka vula okuninga shoka yu uvanekela Jehova. Odhoshili kutya omathimbo gamwe oto ka ninga omapuko, nokuli nomOmbiimbeli omwa popiwa aalumentu naakiintu yamwe aadhiginini mboka nayo ya li ya ningi omapuko. Ihe dhimbulukwa kutya Jehova ina tegelela mboka haye mu longele ya kale ya gwanenena. (Lesha Episalomi 103:13, 14.) Oha kala a nyanyukwa ngele oho ningi ngaashi to vulu. Shimwe ishewe, ote ke ku kwathela. Jehova okwe tu uvanekela kutya ‘kapu na sha tashi vulu oku tu topola ko kohole ye.’ — Lesha Aaroma 8:38, 39.
ILONGA OSHINDJI
Ilonga nkene to vulu okutaaguluka omandangalati ngoka hagi imbi aantu ya ninginithwe mokutseya nawa Jehova nokutaamba ko ekwatho lye.
4. Tseya Jehova nawa
Owa pumbwa okutseya Jehova shi thike peni, manga inoo ninginithwa? Owa pumbwa oku mu tseya nawa sigo to kala wu mu hole nokukala wa hala oku mu nyanyudha. Dhana OKAVIDIO, wu uve nkene aakonakonimbiimbeli yamwe ye shi ningi, e tamu kundathana epulo tali landula.
-
Oshike sha kwathele aantu yamwe mboka ya popiwa mokavidio yi ilongekidhile okuninginithwa?
Lesha Aaroma 12:2, e tamu kundathana omapulo taga landula:
-
Mbela owa limbililwa ngele shono Ombiimbeli tayi ti nenge shono Oonzapo dhaJehova hadhi longo aantu oshoshili ngaa?
-
Ngele osho, oshike to vulu okuninga po?
5. Taaguluka omandangalati ngoka haga imbi aantu ya ninginithwe
Ngele otwa tokola okwiiyapulila Jehova e tatu ninginithwa, otatu ka adhika komashongo. Opo wu mone oshiholelwa shimwe, dhana OKAVIDIO, e tamu kundathana omapulo taga landula.
-
Mokavidio haka, iinima yini Narangerel a li e na okweetha po, opo a longele Jehova?
-
Ohole ye yokuhola Jehova oye mu kwathele ngiini a ethe po iinima mbyono?
Lesha Omayeletumbulo 29:25 nosho wo 2 Timoteus 1:7, e tamu kundathana epulo tali landula:
-
Oshike hashi tu pe uulaadhi tu sinde omashongo?
6. Kala wi inekela kutya Jehova ote ku kwathele
Jehova ote ku kwathele wu mu nyanyudhe. Dhana OKAVIDIO, e tamu kundathana omapulo taga landula.
-
Oshike sha li tashi imbi omukonakonimbiimbeli ngoka a popiwa mokavidio a ninginithwe?
-
Okwi ilongo shike shoka she mu kwathele a kale i inekela muJehova?
Lesha Jesaja 41:10, 13, e tamu kundathana epulo tali landula:
-
Omolwashike to vulu okukala wu na omukumo kutya oto ka gwanitha po euvaneko lyoye ndyoka wa ningi sho wi iyapulile Jehova?
7. Tsikila okupandula Jehova sho e ku hole
Ngele owa kala ho dhiladhila kutya Jehova oku ku hole shi thike peni, oto ka kala we mu pandula noto ka kala wa hala oku mu longela sigo aluhe. Lesha Episalomi 40:5, e tamu kundathana epulo tali landula:
-
Omayambeko geni ga za kuJehova wa pandula unene?
Omuhunganeki Jeremia okwa li e hole Jehova nosho wo Oohapu dhe. Okwa li wo a pandula lela uuthembahenda we wokulongela Jehova. Okwa ti: “Ngame ogwoye, Omuwa Omunankondoawike nomolwaashoka oohapu dhoye dhu udha omwenyo gwandje enyanyu nelago.” (Jeremia 15:16) Yamukula omapulo taga landula:
-
Omolwashike shi li uuthembahenda wi ikalekelwa okukala Onzapo yaJehova?
-
Mbela ino hala okuninginithwa wu ninge Onzapo yaJehova?
-
Mbela opu nasha tashi ku imbi wu shi ninge?
-
Sho to tala, oshike wa pumbwa okuninga, opo wu kale wa gwana okuninginithwa?
AANTU YAMWE OHAYA TI: “Kandi wete tandi ka vula okugwanitha po shoka ndu uvaneka, ngele onda ninginithwa.”
-
Mbela nangoye osho wu uvite ngawo?
OWI ILONGO SHIKE?
Kekwatho lyaJehova, oto vulu okusinda kehe shimwe shoka tashi ku imbi wu ninginithwe.
Omapulo geendululo
-
Owa pumbwa ontseyo yOmbiimbeli yi thike peni, opo wu ninginithwe?
-
Omalunduluko geni tashi vulika wu kale wa pumbwa okuninga, manga inoo ninginithwa?
-
Omolwashike kuu na okweetha uumbanda wu ku imbe wu ninginithwe?
UUYELELE WA GWEDHWA PO
Tala kutya etokolo lyoye lyokuninginithwa oli na okukala li ikolelela koshike.
“Mbela owi ilongekidha okuninginithwa?” (Oshungolangelo, Maalitsa 2020)
Lesha oshitopolwa shika wu uve shoka tashi vulu oku ku kwathela, wu sinde omashongo ngoka tage ku imbi wu ninginithwe.
“Oshike tashi imbi ndje ndi ninginithwe?” (Oshungolangelo, Maalitsa 2019)
Tala okavidio haka, wu uve nkene omulumentu gumwe a sindi omashongo gamwe nomupondo, opo a ninginithwe.
Petameko, omulumentu gwedhina Ataa okwa li ta kakadhala okuninginithwa. Tala shoka she mu tompo a katuke onkatu ndjika ya simana.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
