MWAHA 47
Apwanne Muri Ooreheryeya wi Mpatisiwe?
Nyuwaano moohuserya ichu sincipale vooloca sa Yehova moorweela wa yoohuserya anyu ya Piipiliya. Akhweya moopaka matorokelo makina wi nwerye opharihela yeeyo muhusenryaanyu. Nyenya akhweya yookhalavo echu enoohiihaani wi mwiiveleele wa Yehova ni opatisiwa. Mmwaha yoola, nnahaala woona ichu savakhaani seiho saahaala woohiihaani opatisiwa, ni mukhalelo muneeraanyu mvoothe.
1. Apwanne munaphwanela osuwela soothene sa Mpiipiliyani wi mpatisiwe?
Wi mpatisiwe, nyuwaano munaphwanela ‘osuwela eparipari.’ (1 Timóteo 2:4) Eyo henataphulela wi munaphwanela osuwela waakhula makoho oothene yaawo anapakiwa vooloca sa Piipiliya wi mpatisiwe. Ophiyerya tho yaale apatisiwe khalai ennatitelela ohuserya vooloca sa Yehova. (Kolosi 1:9, 10) Nyenya munaphwanela osuwela mahusiheryo ari mathipelo a Masu a Muluku. Atokweene a mmulokoni anahaala wookhaviheryaani osuwela waakhanle wi moohuserya mwawaakhwanela wi mpatisiwe.
2. Ichu taani ikina munaphwanelaanyu weera muhaakumve opatisiwa?
Muhaakumve opatisiwa, nyuwaano munaphwanela ‘ocharuwa ni orukunuxa murima.’ (Mwaalakhanye Saweriwa T’arummwa 3:19.) Eyo enataphulela wi munnaphwanela othanana wa ichu soonanara mpankaanyu khalai nave omveka Yehova nikhurumuwelo. Enataphulela tho wi muri oolakelela okhala mwawiiwanana ni yookhwela ya Yehova nave tho hamunachuna opaka yeeyo owo onaloceiye wi ti yoonanara. Echu ekina nyuwaano munaphwanelaanyu opaka ori othukumana ni olaleerya vamoha ni muloko.
3. Ntakhara heeni hamunaphwanela woova opatisiwa?
Akina annoova ohaakhwaniherya soothene eroromelinhaaya wa Yehova. Eparipari wi ikwaha ikina nyuwaano munanwerya ohesa. Ophiyerya tho, alopwana ni athiyana yaawo analociwa Mpiipiliyani yaanahesa. Nyenya Yehova hanaweherya wi alapeli awe ekhale oophaameya. (Mwaalakhanye Salumu 103:13, 14.) Owo onnahakalala vaavaa munapakaanyu owetha wanyu! Owo onamookhaviheryaani. Mweeparipari, Yehova onnaroromeliha wi hiyaavo “enawerya onimwalanya ni okhwela [wawe].”—Mwaalakhanye Aroma 8:38, 39, BNM.
OHUSERYA MWAWIISEELA
Omusuwela phaama Yehova ni weemererya nikhaviheryo nawe, enahaala woovahaani ikuru seiho munachunaanyu wi mvoothe nikacamiho vyakala nenlo nnoohiihaani opatisiwa.
4. Mmusuwele phaama Yehova
Ophiyerya mweeryo taani munaphwanelaanyu omusuwela Yehova muhaakumve opatisiwa? Nyuwaano munaphwanela omusuwela Yehova ophiyerya omusivela ni ochuna omuhakalaliha yoowo. Moone EXILEMA wi musuwele yeeyo oohuserya a Piipiliya orukurerya elapo apankaaya wi ewerye omusuwela phaama Yehova. Voocharela muthokororye nikoho nnacharela.
-
Mu exilema, tiheeni yaakhavihenrye akina wiirehererya wi epatisiwe?
Mwaalakhanye Aroma 12:2, nave voocharela muthokororye makoho ala:
-
Apwanne nyuwaano mookhalano minikwa vooloca sa yeeyo Piipiliya onahusiheiye? Nyuwaano mookhalano minikwa wi Anamoona a Yehova anahusiha eparipari?
-
Vaavaa munakhalaanyuno minikwa, tiheeni munaphwanelaanyu weera?
5. Mvoothe nikacamiho vyakala wi mpatisiwe
Oothene ahu ninnahoolela makacamiho vaavaa nnalakelelaahu oveleela okumi ahu wa Yehova ni opatisiwa. Wi moone yootakiherya emoha, moone EXILEMA, nave voocharela muthokororye makoho anacharela.
-
Mu exilema, makacamiho taani Narangerel aaphwaneleiye ovootha wi amurumeele Yehova?
-
Osivela Narangerel aareiyeno ni Yehova, waamukhavihenrye hai ovootha makacamiho yaala?
Mwaalakhanye Masiposipo 29:25 ni 2 Timóteo 1:7, nave voocharela muthokororye nikoho nla:
-
Tiheeni enanivaha olipa murima wi nivoothe makacamiho?
6. Muroromele nikhaviheryo na Yehova
Yehova onahaala wookhaviheryaani omuhakalaliha yoowo. Moone EXILEMA, nave voocharela muthokororye makoho anacharela.
-
Mu exilema, tiheeni yaamuhiiha oohuserya a Piipiliya mmoha opatisiwa?
-
Tiheeni yaalipinhe nroromelo nawe mwa Yehova?
Mwaalakhanye Isaiya 41:10, 13, nave voocharela muthokororye nikoho nla:
-
Wakhala wi mohiiveleela wa Yehova, muni nwerye hai olekecheya wi ti wooweryeya waakhwaniherya nlakano mpankaanyu?
7. Mwaaceererye othamalela wanyu ntakhara osivela wa Yehova
Wuupuwelela mukhalelo Yehova onoosiveleiyeeni onahaala waaceererya omuthamalela wanyu yoowo ni nchuno na omulapela yoowo okhala wookhala. Mwaalakhanye Salumu 40:5, nave voocharela muthokororye nikoho nla:
-
Mareeliho taani a Yehova yaawo ari avameekhaaya wa nyuwaano?
Mulipa a miririmu Yeremiya aanamusivela Yehova ni masu Awe, nave owo aanavaha esisapo ekari ya omurumeela yoowo. Yeremiya aahi: “Kaaphwannyaaka masu anyu, kaamirya. Mmurimani mwaka yaakihakalaliha, kichapa, ntakhara kinniichaneliwa nsina nanyu, [Yehova] Muluku mwaneene a ikuru soothene.” (Yeremiya 15:16) Mwaakhule makoho ala:
-
Ntakhara heeni okhala Namoona a Yehova ekari yavameekhaaya?
-
Apwanne nyuwaano munnachuna opatisiwa ni okhala Namoona a Yehova?
-
Akhweya yookhala enoohiihaani weerano yeeyo?
-
Mmoonelo anyu, tiheeni munaphwanelaanyu opaka wi mpatisiwe?
ACHU AKINA ANI: “Mi kinnoova opatisiwa nave voocharela keere echu yoonanara.”
-
Nyuwaano muniisoona mmukhalelo yoola?
MUKWASU
Nnikhaviheryo na Yehova, nyuwaano munanwerya ovootha nikacamiho vyakala nnoohiihaani opatisiwa.
Makoho awuuluulela
-
Apwanne munaphwanela osuwela soothene sa Mpiipiliyani wi mpatisiwe?
-
Matorokelo taani akhweya munaphwanelaanyu opaka muhaakumve opatisiwa?
-
Ntakhara heeni hamunaphwanela weemererya wi woova woohiiheeni opatisiwa?
OTHOLATHOLA
Moone yeeyo enahaala wooceenyeryaani opaka yoolakelela ya opatisiwa.
“Apwanne Mooreheryeya wi Mpatisiwe?” (Mulipeleli a Marsu a 2020)
Moone mukhalelo wa ovootha makacamiho makina yaawo yaahaala woohiihaani opatisiwa.
“Tiheeni Enahiiha wi Miyo Kipatisiwe?” (Mulipeleli a Marsu a 2019)
Moone mukhalelo mulopwana mmoha aavoontheiye saweeha itokweene wi apatisiwe.
Woopaceryani, mulopwana mmoha awiichaniwa Ataa aakhalano minikwa waakhanle wi aanaphwanela opatisiwa. Moone echu yaamulekenche opaka yoolakelela yeela yoochuneyaxa.
