TLAMACHTIJLI 47

¿Tikchiujtika tlen noneki niman ijkon timoapolaktis?

REPRODUCIR EN

Aman ika timomachtia Biblia, miyek yotikasikamat itech Jehová. Niman kanaj hasta yotikajkauj seki tlen xkuajli tikchiuaya niman ijkon tikchiuas tlen toTajtsin kuelita. San ika, kanaj onka itlaj tlen xmitskauilia xmosentemaka itech Jehová niman xmoapolakti. Miyekej noijki ijkon inpan nochiuaya, san ika, ouel onoapolaktijkej. Ipan yejuin tlamachtijli, tikitaskej tlenon okinpaleui niman kenijki yejon noijki uelis mitspaleuis.

1. ¿Kech noneki tikmatis itech Biblia niman ijkon uelis timoapolaktis?

Tla tikneki timoapolaktis, noneki tikixmatis “on tlen melauak” (1 Timoteo 2:4). Yejuin xkijtosneki ika noneki nochi tikmatis itech Biblia niman ijkon nochipa kuajli titlanankilis ijkuak yakaj itlaj mitstlajtoltis. ¿Tleka ijkon tikijtouaj? Pampa hasta akin youejkaujkej kitekichiuiliaj toTajtsin ok noneki nomachtijtoskej (Colosenses 1:9, 10). San ika, kema noneki tikmatis tlen más ueyi kijtosneki ipan Biblia. Tlayekankej akin nemij ipan tlanechikojli mitspaleuiskej xmati tla yotikasikamat tlen noneki niman ijkon uelis timoapolaktis.

2. ¿Tlenon noneki tikchiuas niman ijkon uelis timoapolaktis?

Biblia kijtoua: “Xmoyolpatlakan niman xpatlakan nemonemilis” (xkita Hechos 3:19). Tla tikneki timoapolaktis, noneki tikchiuas tlen kijtoua yejuin texto. San ika ¿tlenon kijtosneki? Kijtosneki ika noneki tikteititis ika melauak mitsajmana tlen yeuejkaui xkuajli tikchiuaya niman ika tiktlajtlanilis Jehová mamitstlapopolui. Noijki kijtosneki ika aman xok tikchiuas tlen Jehová xkuelita niman ika san yejua tikyolpaktis. Niman xsan yejon, noijki kijtosneki ika yopeuj tikueyichiua Jehová imiuan tokniuan akin nemij ipan tlanechikojli, kanaj aman nochipa tiauj tlanechikoltin niman titenojnotsa imiuan tokniuan.

3. ¿Tleka xnoneki timomojtis timoapolaktis?

Sekimej nomojtiaj noapolaktiskej pampa kinemiliaj ika uelis kichiuaskej itlaj tlen xkuajli niman kiyolkokoskej Jehová. Melauak, kemantika tejua kanaj noijki timopopolos ijkon ken onopopolojkej sekimej itekipanojkauan Jehová akin yeuejkaui onenkej. San ika, xkilnamiki ika Jehová xkichia ika tejuamej maka keman matopopolokan (xkita Salmo 103:13, 14). Jehová yolpakis tla tejua timokojtilia nochipa tiktlakamatis. Niman yejua mitspaleuis para ijkon xchiua. Yejua hasta techijlia ika xtlaj “uelis techxelos itech itetlajsojtlalis Dios” (xkita Romanos 8:38, 39).

OKSEKI XKASIKAMATI

Matikitakan kenijki uelis mitspaleuis xmoapolakti tla tejua más kuajli tikixmati Jehová niman tla tikmokauilia mamitspaleui.

4. Más kuajli xkixmati Jehová

¿Kech noneki tikmatis itech Jehová niman ijkon uelis timoapolaktis? Noneki melak kuajli tikixmatis niman ijkon uelis tiktlasojtlas niman tiknektos tiktlakamatis. Xkitakan VIDEO niman ijkon nenkimatiskej tlenon okinpaleui sekimej akin kemach nomachtijtoyaj Biblia manoapolaktikan. Tla yonenkitakej video, aman xtlajtokan itech yejuin:

VIDEO: Tlen okinpaleui manoapolaktikan (3:56)

¿Tlenon okinpaleui akin ouajneskej ipan video manoapolaktikan?

Xkitakan Romanos 12:2 niman xtlajtokan itech yejuin:

¿Onka itlaj tlen xtikasikamati itech Biblia? ¿Tikneltoka ika iteixpantijkauan Jehová temachtiaj tlen melauak?
Tla itlaj xmás tikasikamati, ¿tlenon uelis tikchiuas?

5. Maka itlaj mamitstelti

Tinochimej otikixnamijkej itlaj tlen xkuajli ijkuak otiktlapejpenijkej tosentemakaskej itech Jehová niman toapolaktiskej. Xkitakan VIDEO niman ijkon nenkixmatiskej se siuatl akin ijkon ipan onochiuj. Tla yonenkitakej video, aman xtlajtokan itech yejuin:

VIDEO: Nochi uelis tikxikos tla tiktlasojtla Jehová (5:22)

¿Tlenon ononek kichiuas Narangerel niman ijkon kitekichiuilis Jehová?
¿Tleka tikijtouaj ika yejua melak kitlasojtlaya Jehová?

Xkitakan Proverbios 29:25 niman 2 Timoteo 1:7, niman xtlajtokan itech yejuin:

¿Akinon techpaleuiya matitlaxikokan ijkuak itlaj tikixnamikij?

6. Xmatsto ika Jehová mitspaleuis

Jehová mitspaleuis xchiua tlen yejua mitstlajtlanilia. Xkitakan VIDEO niman xtlajtokan itech yejuin:

VIDEO: Jehová mitspaleuis (2:50)

¿Tleka xkinekiya noapolaktis yejon tlakatl akin otikitakej ipan video?
¿Tlenon okipaleui más matlaneltoka itech Jehová?

Xkitakan Isaías 41:10, 13 niman xtlajtokan itech yejuin:

¿Tleka uelis kuajli tikmatstos ika uelis tikchiuas nochi tlen otikijli Jehová ijkuak itech otimosentemakak?

7. Xtlasojkamati pampa Jehová mitstlasojtla

Ijkuak más titlanemilis itech kenijki Jehová melak mitstlasojtla, más tiktlasojkamachilis niman más tiknekis nochipa tiktekichiuilis. Xkitakan Salmo 40:5 niman xtlajtokan itech yejuin:

Itech nochi tlen yotechtlayokoli Jehová, ¿tlenon más tikpatiojkaita?

Teotlajtoketl Jeremías melak kitlasojtlaya Jehová niman iTlajtoltsin, noijki melak kipatiojkaitaya kitekichiuilis. Yejua okijto: “Motlajtol [...] onechmakak pakilistli ipan noyojlo, pampa nejua nimoyaxka, noTEKO niman noDios” (Jeremías 15:16). Aman xnankili yejuin: