MUTU 47
Kansi Nimwe Okonzeka Kubatizika?
Cifukwa cophunzila Baibo, mwaziŵa zinyinji zokhuza Yehova. Payakine umoyo wanu wacinja cifukwa coseŵenzesha zinthu zamuphunzila. Koma mwina pali zinthu ziyakine zukupangishani kuona kuti nimwe osakonzeka kuzipeleka kwa Yehova nobatizika. M’mutu uno, tikambilane vinthu viyakine vamene vingakukangisheni kubatizika noona mwamungavigonjesele.
1. Kansi mufunika kuziŵa zinthu zinyinji tyani kuti mubatizike?
Kuti mubatizike, mufunika ‘kuziŵa cendi molondola.’ (1 Timoteyo 2:4) Izi zutanthauza lini kuti mufunika kuziŵa yankho ya konsho iliyonse ya m’Baibo yaangakukonsheni ŵanthu. Olo Akhristu amene ebatizika nikale, opitilizhya kuphunzila. (Akolose 1:9, 10) Koma mufunika kumvwisha ziphunziso zoyambilila za m’Baibo. Akulu mumpingo akuyavyeni kuziŵa ngati muzimvwishisha ziphunziso zoyambilila za m’Baibo.
2. Ni zinthu zotyani zamufunika kucita kuti mubatizike?
Mukaliyobatizika, mufunika ‘kulapa . . . notembenuka.’ (Ŵelengani Machitidwe 3:19.) Izi zutanthauza kuti mufunika kuzimvwila cisoni pa macimo yemwenzocita, nosenga Yehova kuti akukhululukileni. Mufunika soti kunkhala osimikizhya kupewa vinthu vakuzonda Mulungu, noyesayesa kunkhala na umoyo wokondwelesha Mulungu. Kuyangizhyila apo, mufunika kupezeka pa misonkhano nthawi zonse noyamba kulalikila pamozi na mpingo, monga wofalisa wosabatizika.
3. Ndaŵa yanji mufunika lini kulola mantha kukuwezhyani kuvuli?
Ŵanthu ayakine oyopa kuti angakwanishe lini kusunga lonjezo yao kwa Yehova. N’cendi kuti nthawi ziyakine mungalakwise zinthu. Olo analume na anakazi okhulupilika otomolewa m’Baibo, nthawi ziyakine nao enzolakwa. Koma Yehova oyembekezela lini atumiki ŵake kucita zinthu mwangwilo. (Ŵelengani Salimo 103:13, 14.) Koma oyamikila ngati munthu oyesayesa kucita zinthu zomukondwelesha! Ndipo akuyavyeni. Yehova otisimikizhyila kuti ‘paliye cingatilekanishe na cikondi cake.’—Ŵelengani Aroma 8:38, 39.
PHUNZILANI ZINYINJI
Onani mwamungagonjesele vinthu vamene vingakukangisheni kubatizika, mwa kuziŵa bwino Yehova nolandila thandizo yake.
4. Muziŵeni bwino Yehova
Kansi mufunika kuziŵa Yehova kufwika pamlingo wotyani kuti mubatizike? Mufunika kumuziŵa bwino cakuti mukwanisha kumukonda nocita zinthu zomukondwelesha. Onelelani VIDYO kuti muone mwamene ophunzila Baibo pacalo conse acitila izi. Pavuli pake, kambilanani konsho yokonkhapo.
-
Molingana na zataona m’vidyo, n’cinji cecicita analume na anakazi aŵa kuti ayenelele ubatizo?
Ŵelengani Aroma 12:2, nokambilana makonsho aŵa:
-
Kansi mukaikila zinthu ziyakine zayuphunzisa Baibo, olo zakuti a Mboni za Yehova ophunzisa cendi?
-
Ngati n’tetyo, n’cinji camungacite?
5. Gonjesani vinthu vamene vingakukangisheni kubatizika
Tikazipeleka kwa Yehova nobatizika, tonse tukumana na mavuto osiyanasiyana. Kuti muone cisanzo ca mavuto yatingakumane nayo, onelelani VIDYO, nokambilana makonsho okonkhapo.
-
M’vidyo iyi, ni zopinga zotyani zecigonjesa Narangerel kuti ayambe kutumikila Yehova?
-
Kansi kukonda Yehova kwemuyavya tyani kugonjesa zopinga izi?
Ŵelengani Miyambo 29:25 na 2 Timoteyo 1:7, nokambilana konsho iyi:
-
N’cinji cingatiyavye kunkhala otang’a mtima kuti tigonjese zopinga?
6. Dalilani thandizo ya Yehova
Yehova akuyavyeni kucita zinthu zomukondwelesha. Onelelani VIDYO, nokambilana makonsho okonkhapo.
-
M’vidyo iyi, ndaŵa yanji wophunzila Baibo enzowayawaya kuti abatizike?
-
N’cinji ceciphunzila camene cemuyavya kutang’isha cidalilo cake pa Yehova?
Ŵelengani Yesaya 41:10, 13, nokambilana konsho iyi:
-
Ndaŵa yanji mungankhale na cidalilo cakuti mungakwanishe kusunga lonjezo yanu kwa Mulungu?
7. Kulishani cikondi canu pa Yehova
Ngati muganizila ngako pa cikondi ca Yehova, munkhale ofunishisha kumutumikila mpaka kale-kale. Ŵelengani Salimo 40:5, nokambilana konsho iyi:
-
Ni madaliso yotyani yakukupasani Yehova yamuyamikila ngako?
Mneneli Yeremiya enzokonda Yehova na mau ŵake, ndipo enzoyamikila ngako mwai woziŵika na zina ya Yehova. Ekamba kuti: “Mau ŵanu onikondwelesha nosangalasa mtima wangu, cifukwa nuziŵika na zina yanu, mweo Yehova Mulungu.” (Yeremiya 15:16) Yankhani makonsho aŵa:
-
Ndaŵa yanji ni mwai ukulu kunkhala Mboni ya Yehova?
-
Kansi mufuna kubatizika nonkhala wa Mboni za Yehova?
-
Pali ciliconse cukukangishani kubatizika?
-
Muganiza kuti mufunika kucitanji kuti mukwanilishe colinga canu cofuna kubatizika?
ŴANTHU AYAKINE OKAMBA KUTI: “Nuona kuti ningakwanishe lini kucita zinthu zonse zakucita ŵanthu obatizika.”
-
Kansi namwe muona tetyo?
MFUNDO ZACIDULE
Na thandizo ya Yehova, mungakwanishe kugonjesa ciliconse camene cukukangishani kubatizika.
Kuwelezhya mfundo zikulu-zikulu
-
Mufunika kuziŵa zinthu zinyinji tyani za m’Baibo kuti mubatizike?
-
Ni zinthu zotyani zamufunika kucinja pa umoyo wanu kuti mubatizike?
-
Ndaŵa yanji mufunika lini kulola mantha kukukangishani kubatizika?
FUFUZANI
Onani zinthu zamene zufunika kukusonkhezelani kubatizika.
“Kansi Nimwe Okonzeka Kubatizika?” (Nsanja ya Mulonda, March 2020)
Onani mwamungagonjesele vinthu vamene vukukangishani kubatizika.
“N’cinji Cunilesha Kubatizika?” (Nsanja ya Mlonda, March 2019)
Onani mwamene munalume muyakine egonjesela zopinga zikulu-zikulu kuti abatizike.
Poyamba, munalume wa zina yakuti Ataa enzowayawaya kuti abatizike. Onani cemulimbikisha kuti abatizike.
Kansi N’cendi Kuti N’ne Woyenelela Kulandila Madaliso Aŵa? (7:21)
