THUTO 47

Na o Nyaka go Kolobetšwa Gore o be Hlatse ya Jehofa?

BAPALA

Ga bjale o šetše o ithutile dilo tše dintši ka Jehofa thutong ya gago ya Beibele. E bile go ka direga gore dilo tše o ithutilego tšona di go thušitše gore o fetoše bophelo bja gago. Eupša go ka ba go na le dilo tšeo di go šitišago gore o ineele go Jehofa le go kolobetšwa. Thutong ye, o tlo kwa ka dilo tšeo gantši di šitišago batho gore ba kolobetšwe, e bile o tlo kwa gore o ka thušwa ke eng gore di se go šitiše.

1. O swanetše go tseba dilo tše di kaakaa’ng pele o kolobetšwa?

Pele o kolobetšwa, o swanetše go ba le “[tsebo] e nepagetšego ya therešo.” (1 Timotheo 2:4) Se ga se re gore o swanetše go tseba Beibele ka moka. Le Bakriste bao e lego kgale ba kolobeditšwe, ba dula ba ithuta Beibele. (Bakolose 1:9, 10) Eupša o swanetše go kwešiša dithuto tše bohlokwa kudu tša ka Beibeleng. Bagolo ba tlo go thuša go bona ge e ba o kwešiša dithuto tšeo gabotse.

2. O swanetše go dira dilo dife pele o kolobetšwa?

Pele o ka kolobetšwa, o swanetše go ‘itshola o be o sokologe.’ (Bala Ditiro 3:19.) Se se ra gore o itshola kudu ka dibe tšeo o di dirilego nakong e fetilego, gomme o kgopela Jehofa gore a go lebalele tšona. Le gona o šoma ka thata gore o se ke wa dira dilo tšeo a di hloilego, e bile o dula o nyaka go mo thabiša. Sa bohlokwa le go feta, o ya dibokeng e bile o bolela ditaba tše dibotse o na le phuthego.

3. Ke ka baka la eng o sa swanela go dumelela go tšhoga go go thibela go kolobetšwa?

Batho ba bangwe ba tšhaba gore ge ba ka kolobetšwa ba ka tla ba palelwa ke go dira dilo tšeo ba di tshepišitšego Jehofa. Ke nnete gore ka dinako tše dingwe o tlo fela o dira diphošo. Gaešita le banna le basadi bao go bolelwago ka bona ka Beibeleng bao ba bego ba tshepega, le bona ba be ba fela ba dira diphošo. Jehofa o a tseba gore re fela re dira diphošo. (Bala Psalme 103:13, 14.) O a thaba ge a bona o iteka. E bile o tlo go thuša! Le gona Jehofa o re tshepiša gore ‘ga gona selo le ge e le sefe se se ka re aroganyago le lerato la gagwe.’—Bala Baroma 8:38, 39.

ITHUTE KA MO GO TSENELETŠEGO

Ekwa gore go tseba Jehofa gabotse le go mo dumelela a go thuša, go ka go thuša bjang gore o se dumelele selo le ge e le sefe se go šitiša go kolobetšwa.

4. Tseba Jehofa gabotse

Pele o kolobetšwa, o swanetše go tseba Jehofa gakaakaa’ng? O swanetše go tseba Jehofa gabotse, gomme se se tlo dira gore o mo rate kudu le go dula o nyaka go mo thabiša. E le gore o kwe gore barutwana ba Beibele lefaseng ka moka ba dirile se bjang, bapalang BIDIO ye. Ke moka le boledišaneng ka potšišo e latelago:

BIDIO: Ke ka Baka la Eng re Kolobetšwa? (3:56)

Bana babo rena le dikgaetšedi ba mo bidiong ye, ba thušitšwe ke’ng gore ba swanelege go kolobetšwa?

Balang Baroma 12:2, gomme le boledišaneng ka dipotšišo tše di latelago:

Na o fela o sa tshepe dilo tšeo Beibele e di rutago, goba o fela o ipotšiša ge e ba Dihlatse tša Jehofa di ruta nnete?
Ge e ba go le bjalo, o swanetše go dira’ng?

5. O se ke wa dumelela selo le ge e le sefe se go thibela go kolobetšwa

Batho ka moka bao ba nyakago go ineela go Jehofa le go kolobetšwa ba ba le mathata. Go bona mohlala wa taba ye, bapalang BIDIO ye, gomme le boledišaneng ka dipotšišo tše di latelago:

BIDIO: Go Rata Jehofa go tla go Dira Gore o Fenye Mathata (5:22)

Bidiong ye, kgaetšedi Narangerel o ile a swanelwa ke go fenya mathata afe gore a hlankele Jehofa?
Go rata Jehofa go ile gwa mo thuša bjang gore a fenye mathata ao?

Balang Diema 29:25 le 2 Timotheo 1:7, gomme le boledišaneng ka potšišo e latelago:

Ke’ng seo se ka re thušago gore re be le sebete e le gore re kgone go fenya mathata?

6. Tshepa gore Jehofa o tla go thuša

Jehofa o tla go thuša gore o dule o mo thabiša. Bapalang BIDIO ye, gomme le boledišaneng ka dipotšišo tše di latelago:

BIDIO: Jehofa Modimo o tla go Thuša (2:50)

Bidiong ye, ke’ng seo se bego se šitiša morutwana wa Beibele gore a se ke a kolobetšwa?
O ile a thušwa ke’ng gore a tshepe Jehofa?

Balang Jesaya 41:10, 13, gomme le boledišaneng ka potšišo e latelago:

Ke ka baka la’ng o dumela gore o ka kgona go dira dilo tšeo o di tshepišitšego Jehofa ge o be o ineela go yena?

7. Tiiša segwera sa gago le Jehofa

Ge o dutše o bona tsela yeo Jehofa a go ratago kudu ka yona, le wena o tlo mo rata kudu gomme wa nyaka go mo hlankela go ya go ile. Balang Psalme 40:5, gomme le boledišaneng ka potšišo e latelago:

Go dilo ka moka tše dibotse tšeo Jehofa a go diretšego tšona, ke dife tšeo o di ratago kudu?

Moporofeta Jeremia o be a rata Jehofa le lentšu la gagwe, e bile o be a ikgantšha ka go mo hlankela. O itše: “Lentšu la gago le ntlišetša tlhalalo le lethabo pelong ya ka; gobane ke bitšwa ka leina la gago, wena Jehofa Modimo.” (Jeremia 15:16) Na le wena o ikwa ka tsela yeo? Araba dipotšišo tše di latelago: